Մենք ավելի շատ ենք. «Ծառուկյան» խմբակցությունը կպաշտպանի՞ «Ելք»-ի նախագահի թեկնածուին

Հայաստանի Ազգային ժողովի ընդդիմադիր «Ելք» խմբակցությունը պատրաստվում է նաեւ 2018 թվականի համար վարչապետի թեկնածու առաջադրել: Խմբակցության պատգամավորները «Հայկական Ժամանակ»-ի թղթակցի հետ զրույցում նշում են, որ վարչապետի թեկնածուի հարցում դեռ վերջնական որոշման չեն եկել: Թեկնածուի անունը պարզ է դառնալու առաջիկայում սպասվող խմբակցության նիստի ժամանակ:

2018 թվականի ապրիլի 9-ից ուժի մեջ մտնող Սահմնադրության համաձայն՝ յուրաքանչյուր խմբակցություն անկախ իր պատգամավորների թվից կարող է առաջադրել վարչապետի թեկնածու: Եթե նախագահի թեկնածուի առաջադրման համար անհրաժեշտ է պատգամավորների ¼-ի ստորագրությունը, ապա վարչապետի թեկնածություն առաջադրելու համար սա պարտադիր պայման չի համարվում:

«Հայկական ժամանակ»-ի այն հարցին՝ խմբակցությունը վարչապետի թեկնածություն է առաջադրու՞մ միայն այն բանի համար, որ ունի դրա սահմանադրական իրավունքը, թե՞ ցանկանում է իսկապես այլընտրանք լինել եւ կա՞ շանս, որ արդյունքի կհասնեն, «Ելք»-ի պատգամավորներից մի քանիսը պատասխանեցին, որ ցանկանում են այլընտրանքային թեկնածու առաջադրել:

«Մենք ցույց ենք տալիս, որ «Ելք» դաշինքն իր կազմով ունի մարդիկ, ովքեր ապացուցել են հայրենիքի հանդեպ ունեցած իրենց սերը, ովքեր չեն պատրաստվում Ղարաբաղը ծախել, ովքեր երկիրն այս տնտեսական վիճակից հանելու համար կոնկրետ ծրագրեր են առաջարկում: Այդ մարդկանց «Ելք» դաշինքն իշխանությանն այլընտրանքային թեկնածուներ է առաջադրում»,- ասաց «Հանրապետություն» կուսակցության նախագահ, «Ելք» դաշինքի պատգամավոր Արամ Սարգսյանը:

«Հայկական ժամանակ»-ի դիտարկմանը, թե հնարավո՞ր է, որ «Ելք»-ը վարչապետի թեկնածուի հարցով էլ «Ծառուկյան» դաշինքին համագործակցության առաջարկություն անի կամ ստացվի այնպես, որ «Ելք»-ը «Ծառուկյանի» վարչապետի թեկնածուին սատարի, Արամ Սարգսյանն ասաց.

«Կմիանա «Ծառուկյան» դաշինքը, թե՝ ոչ, դա իրենց որոշելիքն է: Նրանք են որոշում պաշտպանո՞ւմ են «Ելք»-ի առաջադրած թեկնածուին, թե՞ իրենք են իրենց թեկնածուին առաջադրում, երբ կանի հայտարարույթուն, այդ ժամանակ էլ պարզ կդառնա: Մենք պարտավոր ենք մեր թեկնածուին առաջադրել, քանի որ հակառակ դեպքում հարց է առաջանում, թե՝ գնացել եք Ազգային ժողով ի՞նչ եք անում, ունե՞ք տեսլական, ունե՞ք մարդիկ: Ընդդիմությունը պարտավոր է իշխանական ալտերնատիվ համակարգին հակակշիռ ներկայացնել նաեւ անհատների տեսքով»,- նշում է Սարգսյանը:

2018-ի ապրիլի 9-ից ամբողջությամբ ուժի մեջ մտնող Սահմանադրության 149-րդ գլխի համաձայն՝ Ազգային ժողովը վարչապետին ընտրում է պատգամավորների ընդհանուր թվի ձայների մեծամասնությամբ: Վարչապետ չընտրվելու դեպքում քվեարկությունից յոթ օր հետո անցկացվում է վարչապետի նոր ընտրություն, որին մասնակցելու իրավունք ունեն պատգամավորների ընդհանուր թվի առնվազն մեկ երրորդի առաջադրած թեկնածուները: Եթե պատգամավորների ընդհանուր թվի ձայների մեծամասնությամբ վարչապետ չի ընտրվում, ապա Ազգային ժողովն արձակվում է իրավունքի ուժով:

«Ելք»-ի ու «Ծառուկյան» խմբակցության համագործակցությունը նախագահի եւ վարչապետի թեկնածու առաջադրելու հարցում կստացվի՞, թե՞ ոչ, առայժմ պարզ չէ:

Թեեւ «Ծառուկյան» խմբակցության պատգամավորներից մեկը «Հայկական ժամանակ»-ի լրագրողի հետ ունեցած մասնավոր զրույցում հետաքրքիր հարցադրում է արել, որից կարելի է ենթադրել, որ ԲՀԿ-ում «Ելք»-ի համագործակցության առաջարկին գրկաբաց չէին սպասում:

«Ինչու՞ է «Ելք»-ին թվում, թե մենք պետք է իրենց առաջարկած թեկնածուին սատարենք՝ այն դեպքում, երբ իրենք 9 հոգանոց խմբակցություն են, իսկ մենք իրենցից երեք անգամ շատ: Մենք միայնակ էլ կարող ենք մեր նախագահի կամ վարչապետի թեկնածուին առաջադրել, որովհետեւ մեր պատգամավորների թիվը մեզ այդ հնարավորությունը տալիս է»,- «ՀԺ»-ի լրագրողի հետ զրույցում ասել է խմբակցության պատգամավորներից մեկը:

Սրան զուգահեռ նույն խմբակցությունից պաշտոնապես նշում են, որ «Ելք»-ի հետ համագործակցության շուրջ դեռ քննարկումներ չեն եղել: Նշենք, որ «Ելք» խմբակցության ղեկավար Նիկոլ Փաշինյանն երեկ պաշտոնապես դիմել է «Ծառուկյան» խմբակցությանը՝ Արտակ Զեյնալյանի՝ 2018 թվականի նախագահի թեկնածությունը սատարելու համար:

Արամ Սարգսյանը «Ծառուկյան» խմբակցության ներքին դիրքորոշման մասին նշեց.

«Որ իրենք իրենց խմբակցությամբ «Ելք» դաշինքից մեծ են՝ դա փաստ է: Համագործակցելու առաջարկն ընդունելը կամ չընդունելն իրենց որոշելիքն է»:

«Ծառուկյան» դաշինքի պատգամավորի շեշտադրումից, որ իրենք «Ելք»-ից շատ են, կարելի է նաեւ ենթադրել, որ գուցե չհրաժարվեն համագարծակցել, բայց, իրենց թեկնածուի շուրջ: Այսինքն, եթե իրենք  նախագահի թեկնածու առաջադրեն եւ «Ելք»-ը պաշտպանի, քանի որ նրանք կրկին ոչ պաշտոնապես հայտարարել են, որ վարչապետի թեկնածու չեն առաջադրելու: