Քաղաքական իրավիճակը լարելու միտում կա. Վահրամ Բաղդասարյանը՝ ԵԼՔ-ի երթի մասին (տեսանյութ)

Նախատեսվում է ԱԺ-ում գնաճի խնդրի թեմայով խորհրդարանական լսումներ հրավիրել: Այս մասին այսօր հայտարարել է ԱԺ նախագահ Արա Բաբլոյանը: ԵԼՔ դաշինքն առաջարկում է դուրս գալ փողոց եւ պահանջել փոփոխություններ՝ Հարկային օրենսգրքում: Այս թեմայի շուրջ «Հայկական ժամանակ»-ը զրուցել է ՀՀԿ խմբակցության ղեկավար Վահրամ Բաղդասարյանի հետ:

- Պարոն Բաղդասարյան, հունվարի 1-ից վառելանյութի գնաճ ունեցանք: ՏՄՊՊՀ-ն արձանագրեց, որ դա կապված է Հարկային օրենսգրքի նոր դրույթների ուժի մեջ մտնելու հետ: Եթե այս օրենքի ընդունումը գնաճ էր կանխատեսում, ինչու՞ ՀՀԿ-ն գնաց այդ քայլին:

- Քաղաքական մեծամասնությունը չի նայում, թե գնաճը քանի տոկոսով անի կամ չանի, այլ նայում է հնարավորության սահմանները: Եթե այդ հարկային, մաքսային օրենսգիրքը չընդունեինք, ինչ-որ տեղ կսիրաշահեինք մեր հանրությանը, բայց 1-2 տարի հետո կունենայինք լուրջ խնդիրներ: Դրա համար կազմակերպվում է խորհրդարանական լսումներ, որպեսզի բոլոր համապատասխան գերատեսչությունների ղեկավարները ներկայանան եւ հիմնավորեն գնաճի յուրաքանչյուր էլեմենտ: Եթե կլինեն արհեստական երեւույթներ, ապա դրան առանձին կանդրադառնանք: Խնդրում եմ, որ նայեն համեմատության դաշտը: Չի եղել տարի, որ մենք գնաճ չունենանք: Անցած տարի նույն ժամանակահատվածում ունեցել ենք 5 տոկոս գնաճ, այս տարի ունենք՝ 2,5 տոկոս: Իհարկե, սա սփոփանք չի լինելու իշխանության համար: Եթե կա տեղ, որ պետք է գնաճը զսպող քաղաքականություն տանել, ապա իշխանությունը պարտավոր է այն տանել, եթե տեղերը ունենք:

- Պարոն Բաղդասարյան, այս պահին գնաճը իշխանությունների համար վերահսկելի՞ է:

- Պետք է շատ լուրջ ուսումնասիրվեն գնաճ ծնող պատճառները: Եթե կան այդ պատճառները, պետք է անենք հետեւություն: Մնացածը պարզ կդառնա լսումների ժամանակ:

- Պարոն Բաղդասարյան, այս պահին օրակարգում ունենք երկու քաղաքական ուժի առաջարկ՝ գնաճի հետ կապված: ՀՀԿ-ն կողմ է խորհրդարանական լսումներին, ԵԼՔ դաշինքն առաջարկում է դուրս գալ փողոց եւ պահանջել Հարկային օրենսգրքի փոփոխություն: Ո՞ր ուժի նախաձեռնությունն արդյունք կտա:

- Երկրի համար թիվ մեկ քաղաքական ամբիոնն Ազգային ժողովի ամբիոնն է: Իմ կողմից հարգված ԵԼՔ դաշինքի գործընկերներն ունեն լայն հնարավորություն երկրի թիվ մեկ ամբիոնից իրենց խնդիրները բարձրաձայնելու, հանրությանը տեղյակ պահելու, ունեն նաեւ օրենսդրական առաջարկություն անելու հնարավորություն: Փորձեք պատմական էքսկուրս անել եւ տեսնել, թե որ երկրում են փողոցային նման տիպի երթերը նպաստավոր պայմաններ ստեղծել տվյալ երկրի համար: Սա կարող է քաղաքական իրավիճակը լարելու միտում լինել: Չեմ ցանկանա իմ ընդդիմադիր գործընկերների մարտավարությանը գնահատականներ տալ: Յուրաքանչյուր քաղաքական ուժ ունի իր մարտավարությունը:

- ԵԼՔ-ի ընդդեմ գնաճի երթը քաղաքական ենթատեքստ ունի՞:

- Երթը իրենք կարող էին անել անցած տարի նույն ժամանակահատվածում, բայց ինչու՞ չարեցին: Այդ հարցը մնում է ինձ համար հանելուկ: Նաեւ այս զարգացումները, որ մենք լիարժեք անցում ենք կատարում խորհրդարանական կառավարման, նախագահի ընտրություններ են լինելու: Այստեղ կարելի է այս տեսանկյունից դիտարկել, որ ռեսուրսների ուսումնասիրում է պարզապես:

- ԵԼՔ-ի երթ անցկացնելու հայտարարությունից հետո Սերժ Սարգսյանի մոտ երկու հանդիպում տեղի ունեցավ տնտեսական բլոկի ղեկավարների հետ: Իշխանությունը մտավախություն ունի՞ այս դաշինքի գործողությունների հետեւանքից:

- Բնականաբար, մենք ինչ հանդիպում ունեցել ենք, կարող եք վերագրել ԵԼՔ-ի հայտարարությանը: Այդ հանդիպումը նախատեսված էր դեռ վաղուց: Սա բնականոն գործընթաց է, որը որ կատարվում է եւ յուրաքանչյուր քաղաքական ուժի կամ հանրային անհանգստություն մենք պետք է քննության առարկա դարձնենք: Մեզ համար վիրավորանք չէ, որ ԵԼՔ-ի անհանգստությունը քննարկման առարկա ենք դարձնում:

- ԵԼՔ-ի երթից հետո հնարավո՞ր է, որ իշխանափոխության պահանջ առաջանա:

- Ոչ: