Ով ասում է՝ աղքատը միս չի ուտում, դեգեներատ է. Նապոլեոն Ազիզյան

«Պաշտոնական տվյալներով 30 տոկոս է, բայց ես կասեի ավելի շատ է աղքատությունը: Ես մարդկանց հետ շատ եմ շփվում եւ գիտեմ այդ մասին»,- «Հայկական ժամանակ»-ի հարցին՝ մտահոգվա՞ծ է գնաճով, աղքատությամբ, թե՞ ոչ, այսպես պատասխանեց Ծառուկյան խմբակցության պատգամավոր Նապոլեոն Ազիզյանը:

- Պարոն Ազիզյան, առաջիկայում գնաճի թեմայով խորհրդարանական լսումներ եւ երթ է տեղի ունենալու: Ըստ Ձեզ՝ ո՞րն արդյունք կտա:

- Ճիշտը, որ ասեմ երկուսն էլ լուրջ արդյունք չեն տա: Ամեն դեպքում, ամեն ինչ պետք է արվի, որ այս գնաճը կանխվի, խեղդվի, թե չէ ահավոր վատ վիճակ է ժողովրդի մոտ:

- Պարոն Ազիզյան, Ազգային վիճակագրական ծառայության տվյալների համաձայն՝ նախորդ տարվա գնաճը եղել էր 2,6 տոկոս, իսկ Հայաստանում գնաճի թույլատրելի սահմանն, ըստ պետբյուջեի՝ 4 տոկոսն է: Այսինքն՝ ստացվում է, որ երկրում գնաճը նորմայի սահմաններում է: Այդ դեպքում ի՞նչ եք կարծում Սերժ Սարգսյանն ինչու՞ է խուճապահար խորհրդակցություններ հրավիրում, հատկապես որ դեկտեմբերի իր հարցազրույցում նշել էր, թե շոշափելի գնաճ չունենք:

- Դուք հարցրեցիք, թե ինչո՞ւ է պաշտոնապես 30 տոկոս ասվում, երբ ես ասեցի, որ ավելի շատ է աղքատությունը: Հիմա այստեղ էլ բոլոր տեղերի նման արդար չէ, որ այս մի տեղի վրա զարմանում եք:

- Ասում եք՝ աղքատությունն ավելի շատ է, քան պաշտոնական տվյալներում է հրապարակված: Իսկ փողոց դուրս գալու ե՞ք՝ հանուն աղքատության վերացման:

-Ո՛չ:

- Ինչո՞ւ:

- Որովհետեւ բան չի տալու:

- Լսումներին մասնակցելո՞ւ եք:

- Այո:

- Բայց ասացիք՝ դրանից էլ ակնկալիքներ չունեք:

- Լսումներին ավելի շատ բան կարելի է անել: Մենք արդեն քանի տարի է, որ այդ երթերը տեսնում ենք: Մինչեւ մեկ միլիոն մարդ էլ է հավաքվել, արդյու՞նքը: Երթերին մարդիկ ենք կալանավորվում, մարդիկ են մեռնում, ի՞նչ տվեցին այդ երթերը:

- Պարոն Ազիզյան, իսկ գնաճը Ձեզ, Ձեր ընտանիքին անհանգստացնու՞մ է:

- Կարո՞ղ ա ես լուսնից եմ իջել: Ոնց չի անհանգստացնում:

- Կա ինչ-որ ապրանքատեսակ, որոնցից հրաժարվել եք:

- Հիմա գազը պետք է անջատենք, մեքենայով քիչ գնանք, որովհետեւ սեղմված գազը թանկացել է: Գումարը քիչ է, չի բավարարում: Գազի գինը շղթայական ռեակցիայի նման ամեն ինչի վրա ազդում է, թանկանում է ամեն ինչ:

- Այսինքն՝ պատգամավորների գրպանին էլ է ազդու՞մ գնաճը:

- Կարո՞ղ ա գիտես, ես եսիմ ով եմ: Իմ վրա ազդում է: Էդ ովքեր, որ չեն հասկանում, ասում են՝ 3 հազարը ինչ փող ա, որ ասում են՝ միս մեկ ա աղքատները չեն առնում: Ես այդ մարդկանցից չեմ, ես դրանց դեգեներատներ եմ համարում:

Հիշեցնենք, որ նմանատիպ արտահայտություն արել էր ՀՀԿ-ական մեկ պատգամավոր՝ Խոսրով Հարությունյանը, ով ասել էր. «Պատկերացրեք՝ կա ընտանիք, որը միայն կարտոֆիլ է օգտագործում: Հիմա եթե միսը թանկ է կամ էժան, ինքը միեւնույն է գումար չունի միս գնելու, շարունակում է կարտոֆիլ օգտագործել»: Հիշեցնենք նաեւ, որ Հակոբ Հակոբյանը ժամանակին ասել էր. «30 հազար դրամ ամսական եկամուտ ունեցող քաղաքացու վրա գազի գնի բարձրացման հետեւանքով ավելացած 2000 դրամ ծախսը չի ազդի»: