Սերժ Սարգսյանը իր վարչապետության մասին մեծ շուքով չի հայտարարի․ Արմեն Գրիգորյան

Երեկ ՀՀԿ ԳՄ նիստից հետո ՀՀԿ խոսնակ Էդուարդ Շարմազանովը լրագրողներին ասաց, որ վարչապետի ընտրության հարց մինչ օրս ՀՀԿ-ում չի քննարկվել։ Հնարավոր է նման բան, թե՝ ոչ, ո՞վ կլինի նոր վարչապետը, այս եւ այլ հարցերին պատասխանեց քաղաքագետ Արմեն Գրիգորյանը։

- Պարոն Գրիգորյան, երեկ Էդուարդ Շարմազանովը ՀՀԿ ԳՄ նիստից հետո ասել է, որ վարչապետի ընտրության հարց մինչ օրս ՀՀԿ-ում չի քննարկվել, արդյո՞ք հնարավոր է, որ քննարկված չլինի։

- Քանի որ ՀՀԿ-ում միշտ վերջում են իմանում Սերժ Սարգսյանի որոշումների մասին, ապա կարծում եմ, ավելի շատ այս տեսանկյունից իրենց պարզապես որոշումը կհրամցվի այնպես, ինչպես օրինակ Սերժ Սարգսյանը որոշեց, որ Արմեն Սարգսյանը պետք է լինի նախագահ։ Այդ առումով, կարծում եմ, որ ՀՀԿ-ն որեւիցե հարց չի էլ քննարկի։ Եթե նայեք ամբողջ գործընթացը, թե ինչպես է կառավարության գործունեությունը փոխվում, ապա կարելի է ասել՝ Սերժ Սարգսյանը որոշում է ընդունելու ժամկետին։

- Այսինքն՝ նա արդեն որոշե՞լ է, թե ով է լինելու վարչապետ, եւ խոսքը հենց ի՞ր մասին է։

- Կարծում եմ, որ՝ այո, ինքը որոշել է, որ ինքն է լինելու, եւ սա նոր որոշում չի: 2015-ին, երբ Սահմանադրություն էր փոխում, Սերժ Սարգսյանը հենց այդ նպատակով էլ փոխում էր, որպեսզի ինքը դառնա վարչապետ։

- Իսկ ե՞րբ ՀՀԿ-ն կհայտարարի իր թեկնածուի անունը։

- Քանի որ վարչապետի ընտրությունները ապրիլի 17-ին են, կարծում եմ՝ դրան մոտ ժամանակահատվածում են հայտարարելու։

- Իսկ եթե մի բան բացահայտ է իրենց համար, ինչո՞ւ են այսքան թաքցնում։

- Ես կարծում եմ, որ Սերժ Սարգսյանը այս տեսակ հարցերում շատ զգուշավոր է, եւ նա փորձում է հնարավորինս մեղմ իրավիճակներում դա հայտարարել։ Հանրության վերաբերմունքը իմանալով, կարծում եմ, նա փորձում է ավելի շատ մեղմել այդ հայտարարումը, նույնիսկ կարծում եմ, որ դա մեծ շուքով չի լինի, որպեսզի հանրային աղմուկ չբարձրացնեն։

- Սերժ Սարգսյանը 2014-ին իր ելույթում նշել էր, որ այլեւս որեւէ պաշտոն չի զբաղեցնելու, նա չի՞ կատարում իր խոստումը։

- Իրականում Սերժ Սարգսյանի խոսքերին հավատալը միամտություն է, նա նաեւ ասել է, որ ատոմակայան ենք կառուցելու, Հայաստան-Իրան երկաթգիծ ենք կառուցելու, 7 տոկոս տնտեսական աճ չապահոված կառավարությունը հրաժարական է տալու, եւ այսպես կարելի է նվազագույնը այսպիսի 50 հայտարարության ցուցակ ասել, որի մասին Սերժ Սարգսյանը հայտարարել է, այնուհետեւ այդ խոսքերը իրականություն չեն դարձել։ Եւ իրականում ապրիլի այդ հայտարարությունից հետո նա վերջերս սիրիական հեռուստաընկերությանը տված հարցազրույցում չի բացառել իր առաջադրումը։

Նշենք, որ մինչեւ ապրիլի 9-ը ՀՀԿ-ն հնարավորություն ունի իր թեկնածուի անունը չբացահայտել։ Նոր նախագահն իր լիազորությունները ստանձնելու է ապրիլի 9-ին։ Հենց այդ ժամանակ էլ կդադարեն գործող նախագահի լիազորությունները և կառավարությունը հրաժարական կտա։ Նոր կառավարություն ձևավորելու համար Ազգային ժողովի խմբակցությունները պետք է ներկայացնեն վարչապետի թեկնածուներին։

Խմբակցությունները վարչապետի թեկնածուին ներկայացնելու համար մեկ շաբաթ ժամանակ ունեն՝ ապրիլի 9-16-ը, որից հետո Ազգային ժողովը նիստում պետք է ընտրի վարչապետ։ Խորհրդարանի ընտրած թեկնածուին վարչապետ է նշանակելու հանրապետության նախագահը։ Նշանակվելուց հետո արդեն հանրապետության վարչապետն առաջադրելու է փոխվարչապետներին, նախարարների թեկնածուներին՝ 5-օրյա ժամկետում։

Անցումը խորհրդարանական կառավարման համակարգին ավարտված կհամարվի այն օրը, երբ լիազորությունները կստանձնի հանրապետության նորընտիր նախագահը։

                                                                                                          Նիկոլայ Ավետիսյան