2 տարում երկիր քանդել սովորեցինք, 23 տարում չենք կարողանում կառուցել. Ալավերդու քաղաքապետ

Նախօրեին լրացավ Ալավերդի խոշորացված համայնքի ղեկավար Սասուն Խեչումյանի պաշտնավարման 100 օրը: 100 օրերի ընթացքում կատարած ու չկատարված աշխատանքների շուրջ «Հայկական ժամանակ»-ը զրուցել է խոշորացված համայնքի ղեկավար Սասուն Խեչումյանի հետ:

- Պարոն խեչումյան, ինչպիսի՞ն էր պաշտոնավարման 100 օրը:

- Աշխատանքային:

- Ալավերդու նախկին քաղաքապետերը մի համայնք էին ղեկավարում՝ Ալավերդին, խոշորացումից հետո Ձեր վրա դրվեց եւս 5 համայնք ղեկավարելու պատասխանատվությունը: Ինչի՞ վրա ծախսվեց պաշտոնավարման առաջին 100 օրը:

- Քանի որ խոշորացումը ենթադրում էր նաեւ վերակազմավորման գործընթացներ ու իրավական փաստաթղթային լուրջ աշխատանք, կապված լուծարումների ու նոր համայնքի ձեւավորման, ավագանու որոշումների ու օրենսդրական գործընթացների հետ, մենք 100 օրը անց ենք կացրել հենց այդ ուղղություններով աշխատելու վրա, չմոռանալով նաեւ ՏԻՄ օրենքով մեզ վերապահված պարտադիր լիազորությունները՝ աղբահանություն, կոմունալ ծառայությունների կազմակերպում ու ոչ միայն, անկախ նրանից, որ մենք գտնվում էինք վերակազմակերպման գրծընթացում, մենք պարտավոր էինք այնպես անել, որ խոշորացված համայնքի կյանքը չտուժեր: Խոշորացված համայնքի կազմի մեջ մտնող համայնքների բոլոր աշխատակիցները նոյեմբերի 10-ի դրությամբ ազատվել էին աշխատանքից, նրանց հետ պայմանագրերի կնքում, պաշտոնի անձնագրեր եւ այլն…: Մեծ փաստաղթային աշխատանք էր դրված մեր առջեւ, որը ժողովրդի համար տեսանելի չէր:

- Պարոն Խեչումյան, Ձեր նշած փաստաթղթաշրջանառությունից զատ, ընթացիկ աշխատանքներ կային՝ Ամանոր, ձմեռային պաշտպանություն, մարզական ու մշակութային կյանք: Այս մասով ի՞նչ արվեց:

- Ճիշտ եք նշում, այդ ամենին գումարվեցին նաեւ ձմեռային պաշտպանության խնդիրները, տոնական միջոցառումները, քաղաքը տոնական տեսքի բերելը, ու դու պարտավոր ես մեկ ամսում հասցնել, քանի որ պարտավոր ես…բայց որ ամենակարեւոր ու լուրջ հարցն էր՝ պետք է հասցնեինք 2018- բյուջեն կազմել ու հաստատել: Սրա հետ մեկտեղ էլ այցեր համայնքներ, հանդիպումներ բնակչության հետ: Նոր-նոր ուզում ենք «շունչ քաշել»:

- Պատկերացում ունեի՞ք, որ քաղաքապետի պաշտոն ստանձնելիս այդչափ հարցեր են դրվելու ձեր առջեւ նոր ՏԻՄ օրենքով ու խոշորացումով:

- Ես մինչ քաղաքապետ դառնալը 15 տարի եղել եմ պետական ու համայնքային ծառայող, որից 14-ը՝ Ալավերդու քաղաքապետարանում: Ես նաեւ հանդիսանում եմ Տարածքային կառավարման եւ զարգացման նախարարության կոլեգիայի անդամ, այսինքն խոշորացումն ինձ համար նորություն չէր, ես քաջատեղյակ էի իրավական ու փաստաթղթային նրբություններին:

- Պարոն Խեչումյան, 100 օրերի ընթացքում կատարված այցերով ու հանդիպումներով ի՞նչ պարզեցիք, որո՞նք են այն հիմնական խնդիրները, որ հրատապ լուծում են պահանջում:

- Մենք քաղաքապետարանում ընդունելության օր չենք սահմանել, ոչ թե որ մեր աշխատանքը չենք կանոնակարգում, այլ այնպես ենք անում, որ բնակիչը նաեւ իր հարմար օրը մեզ հետ հանդիպի՝ նախապես, իհարկե, համաձայնեցնելով: Մենք որդեգրել ենք բաց դռների քաղաքականություն: Խնդիրները բազմաթիվ են՝ շատ-շատ: Առանձնացնելը սխալ է, բոլորն էլ լուծում են պահանջում՝ ըստ հերթականության:

- Ամեն դեպքում, որո՞նք են հրատապ խնդիրները:

- Խնդիրներն այնքան շատ են, որ մտածում ես դրանց առաջնահերթության մասին: Ես չեմ պատրաստվում Ալավերդի սուզանավ բերել, եթե նավ անգամ չկա…ինձ համար ամենակարեւոր խնդիրը մեր բնակչության մոտեցումը փոխելն է դեպի համայնք ու պետություն: Մենթալիտետի փոփոխություն է պետք: Բնակիչը պետք է սիրի իր համայնքը, հոգ տանի, աղբ չթափի, փորձի խնդիրը նաեւ իր միջոցով լուծել: Ես ուզում եմ, որ բնակիչը սեփականատերի հոգեբանությամբ նայի իր քաղաքին: Ոնց եղավ, որ երկու տարում երկիր քանդել սովորեցինք, հարկերից խուսափել սովորեցինք, պահանջատեր ու սպառող դարձանք, բայց հաջորդ 23 տարիներին չենք կարողանում երկիր կառուցել սովորել, սպառողից դառնալ արտադրող…այ էստեղ ունենք խնդիր, որը ժամանակի ընթացքում կլուծվի:

- Ալավերդու քաղաքապետի վերջին ընտրություններում կրիմինալը ակտիվ չէր, արդյո՞ք որեւէ ազդեցություն ունեցավ Ձեր ու ալավերդցու վրա կրիմինալը ընտրություններից հետո:

- Համայնքային կառավարումն ու քրեական աշխարհը իրարից շատ հեռու են: Ես չէ, որ պետք է գնահատական տամ՝ քաղաքը քրեական է, թե ոչ: Ինձ համար Ալավերդին քրեական չէ, այլ մշակութային ու սպորտային: Իրականում Ալավերդին քրեականից շատ է հեռու: Ես աշխատում եմ օրենքով սահմանված կարգով, հետեւաբար՝ ոչինչ չի կարող ինձ խանգարել աշխատել:

- Քրեական հեղինակություն համարվող Ալավերդցի Վահագնի մայրը լրատվամիջոցների հետ զրույցում ասել էր, որ իր որդուն ձերբակալելուց հետո Ալավերդիում բնակարանային գողությունները շատացել են, ի՞նչ կասեք այդ առումով:

- Ճիշտն ասած, ես առաջին անգամ եմ լսում, որ Ալավերդիում բնակարանային գողությունները շատացել են։ Ալավերդիում ամեն ինչ հանգիստ է։ Իրավական հարցերով, խնդրում եմ, դիմել իրավապահ մարմիններին։

-Ի՞նչ գնահատական կտաք Ալավերդցի Վահագի գործունեությանը:

- Ես որեւէ գնահատական չեմ կարող տալ:

Հարցազրույցը տպագրվել է «Հայկական ժամանակ» օրաթերթի փետրվարի 24-ի համարում, 4-րդ էջում: