Ծառուկյան դաշինքը չի քննարկել ու չի քննարկելու Սերժ Սարգսյանի 2014-ի հայտարարությունը

Լուսանկարը՝ Ֆոտոլուրի, Սերժ Սարգսյանը պարգեւատրում է Գագիկ Ծառուկյանին, Երեւան, 2016, սեպտեմբերի 18

ԱԺ ընդդիմադիր համարվող Ծառուկյան խմբակցությունը քաղաքական իրադարձությունների ետնաբեմում է մնացել: Այս ընթացքում, երբ քաղաքական դաշտում ակտիվ խմորումներ են՝ ԵԼՔ-ը փողոցային պայքարի  ճանապարհային քարտեզն է վերջնական տեսքի բերում, «Հանուն Հայաստան պետության» ճակատն արդեն մեկ հանրահավաք է իրականացրել եւ նախապատրաստվում է մարտի 16-ին 2-րդն անել, խորհրդարանական մեծությամբ առաջին ընդդիմադիր ուժը դիտորդի դերում է մնացել: «Հայկական ժամանակ»-ի հետ զրույցում Ծառուկյան խմբակցության պատգամավոր Սերգեյ Բագրատյանն ասում է. «Եթե ԵԼՔ-ում դեռ ընդհանրական հայտարարի չեն եկել, ինչու՞ եք Ծառուկյան խմբակցությունից գործողություններ պահանջում»:

«ԵԼՔ-ից միայն Քաղաքացիական պայմանագիրն է ասել, որ միանալու են մարտի 16-ին կայանալիք հանրահավաքին,  անգամ իրենք այդ մասով միասնական դիրքորոշում չունեն, իսկ դուք ուզում եք, որ Ծառուկյան դաշինքը դիրքորոշում արտահայտի՞: Մենք ունենք մեր օրակարգը եւ այդ սկզբունքներով ցանկացած պայքարի մեթոդ ընդունելի է մեզ համար: Այս պահին հարթակում հնչող տեսակետները դեռեւս մեզ համար բավարար չեն եւ մեր օրակարգում չունենք այդ հարցերը»,- ասում է Բագրատյանը եւ նշում, որ իրենց առջեւ դրած խնդիրն այժմ այն է, որ ՀՀԿ-ն չկարողանա գերակայություն ձեռք բերել այլ ինստիտուտներում:

«Մենք չենք ուզում ետ նայել, ուզում ենք հստակ օգտվել պառլամենտական կառավարման համակարգի տված հնարավորություններից: Ուսումնասիրվա՞ծ է, որ կա փողոց դուրս գալու պահանջ: Մենք չեն հասկանում հանրահավաք ասելով ի՞նչ են ասում, նրանց առջեւ ի՞նչ խնդիր է դրված: Ամեն մեկը մի քանի հոգի հավաքի գնա կանգնի այնտե՞ղ: Հանրահավաք անի, որ ի՞նչ անի: Պետք է դրա պատասխանը ունենանք, մենք չենք տեսնում ձեւակերպված օրակարգ, չենք տեսնում քայլեր եւ քայլերի հերթականություն: Այս պահին առաջարկ էլ չունենք, որ միացեք այս խնդրին, ինքնանպատակ փողոց դուրս գանք ի՞նչ անենք»:

Ծառուկյան խմբակցությունում, պարզվում է, Սերժ Սարգսյանի 2014 թվականի սեպտեմբերի հայտնի հայտարարությունը քննարկման առարկա չի դարձել: ՀԺ-ն Բագրատյանից հետաքրքրվեց, եթե ստացվի այնպես, որ Սերժ Սարգսյանը վարչապետի թեկնածու առաջադրվի, Ծառուկյան դաշինքը որպես քաղաքական ուժ, ի՞նչ եզրակացություն կտա նման քաղաքական գործունեությանը:

«Մենք նման քննարկում չենք ունեցել, որովհետեւ ձեր ասած հայտարարությունը կատարվել է այլ կուսակցության նախագահի կողմից, դա հանրապետական կուսակցության ներքին խնդիրն է: Ծառուկյան դաշինքը չի քննարկել ու չի քննարկելու Սերժ Սարգսյանի հայտարարությունը»,- ասում է Բագրատյանն ու հայտարարում, որ քանի դեռ ՀՀԿ-ն վարչապետի թեկնածու չի առաջադրել, Ծառուկյան դաշինքը մեկնաբանություններից զերծ է մնալու:

«Ժողովուրդն ասում է՝ ջրին չհասած, մի բոբիկացեք: Մենք չգիտեն ընթացքը, միայն ենթադրություններով ենք առաջ գնում»,- ասում է նա:

Ծառուկյան խմբակցությունը ՀՀԿ-ի կողմից առաջադրված նախագահի թեկնածուին կողմ էր քվեարկել եւ հիմնավորել, որ Արմեն Սարգսյանի եւ Ծառուկյան դաշինքի ծրագրերը ներդրումների մասով համընկնում են: «Հայկական ժամանակ»-ը Սերգեյ Բագրատյանից հետաքրքրվեց՝ հնարավոր է, որ ՀՀԿ-ի վարչապետի թեկնածուի ներկայացրած ծրագիրն էլ ԲՀԿ-ականների սրտով լինի եւ կրկին կողմ քվեարկեն:

«Քաղաքականության մեջ ոչինչ չի բացառվում: Սակայն քանի դեռ չկա ծրագիրը, չկա թեկնածուն, չկա ծրագիրը ոչինչ չենք կարող ասել»,- ասաց նա:

Սերգեյ Բագրատյանը եւս մտահոգված է այն խնդրով, որ վարչապետի ընտրությունն ի տարբերություն նախագահի, Բարձրագույն դատական խորհրդի կազմի եւ ՍԴ անդամի ընտրության, փակ չի լինելու:

«Ես ճիշտ եմ գտնում, որ բոլոր քվեարկությունները փակ անցկացվեն: Բաց քվեարկելու մեջ ես որեւէ առանձնահատկություն չեմ տեսնում, բայց փակ-գաղտնի քվեարկությունը շատ ավելի կարեւոր է»,- ասում է եւ միաժամանակ նշում, որ, եթե Սահմանադրությամբ է բաց քվեարկության  ընթացակարգ նշված, ուրեմն ամեն ինչ տեղի է ունենում օրենքի շրջանակներում: