Սերժ Սարգսյանի պատկերով փուչիկները օդ նետեցին՝ ազատվելով գաղջ մթնոլորտից

Այսօր Ազատության հրապարակում տեղի ունեցավ «ՄերժիրՍերժին» նախաձեռնության կողմից կազմակերպված հանրահավաքը: Հանրահավաքի մասնակիցում էին Րաֆիի Հովհաննիսյանը, Ժառանգություն կուսակցության նախագահ Արմեն Մարտիրոսյանը, «Նոր Ժամանակներ» կուսակցության նախագահ Արամ Կարապետյանը, իրավապաշտպան Ավետիք Իշխանյանը, «Հանուն Հայաստան պետության» ճակատի հիմնադիր Ալեք Ենիգոմշյանը, երգահան Եղիշե Պետրոսյանը, պարուսույց Սարգիս Հակոբյանը եւ ուրիշներ:

Ելույթով հանդես եկան ժուռնալիստների «Ասպարեզ» ակումբի նախագահ Լեւոն Բարսեղյանը, իրավապաշտպան Արթուր Սաքունցը, «Ժողովրդավարական հայրենիք» կուսակցության նախագահ Պետրոս Մակեյանը, «Մերժիր Սերժին» նախաձեռնության անդամ Դավիթ Սանասարյանը, ազատամարտիկ Վոլոդյա Ավետիսյանը, «Ազգային համաձայնություն» կուսակցության նախագահ Արամ Հարությունյանը եւ այլք:

Հանրահավաքը մարդաշատ չէր. հավաքվել էին մոտ 150 քաղաքացիներ: Հիմնական թեման Սերժ Սարգսյանի վարչապետացումը կանխելն էր: «Մերժիր  Սերժին» նախաձեռնության անդամ Դավիթ Սանասարյանը Սանասարյանը հայտարարեց. «Քանի դեռ այն ժամանակաշրջանն է, որ Սերժ Սարգսյանը պաշտոն չի զբաղեցնում, պետք է դա հավերժ դարձնել: «Մերժին Սերժին» վանկարկումները չէին դադարում: Հանրահավաքի կազմակերպիչները շարունակում էին իրենց դրամահավաքը` Սերժ Սարգսյանին թոշակի ուղարկելու համար:

Միջոցառմանը Սերժ Սարգսյանի պատկերով փուչիկներ կային, Դավիթ Սանասարյանը նշեց, որ այդ փուչիկների մեջ Սերժ Սարգսյանի նշած գաղջ մթնոլորտն է, եւ դրանք օդ նետելով՝ կազատվեն գաղջից: Օդ նետվեցին տասնյակ կարմիր փուչիկներ:

Լեւոն Բարսեղյանը հայտարարեց, որ իրենք Ազատության հրապարակ են հրավիրել Սերժ Սարգսյանին, եւ, բեմահարթակ բարձրացավ Չեբուռաշկայի հագուկապով անձ, որը ներկայացավ որպես Սերժ Սարգսյան եւ ելույթ ունեցավ:

«Տասը տարում ես կառուցեցի այս ֆալոցենտրիկ համակարգը: Ես ասել եմ, որ 2040 թվականին ՀՀ-ի բնակչությունը կլինի 4 միլիոն մարդ: Անշուշտ, Հայաստանում 2040 թվականին կմնա 4 միլիոն մարդ, եթե 2018 թվականին Հայաստանի բնակչությունը լինի 10 միլիոն: Ես իմ խոսքի տերն եմ եղել՝ ասելով, որ Հայաստանի քաղաքացին ապրելու է ավելի լավ երկրում: Հիմա նրանք ապրում են ավելի լավ երկրում՝ Գերմանիայում, Ֆրանսիայում, Անգլիայում և այլն: Ես ասել եմ, որ կլինեն հազարավոր աշխատատեղեր, բայց հստակ չեմ ասել՝ որ երկրում: Ինձ ասել են, որ դու մուտիտ ես արել: Ես ուզում եմ անկեղծանալ՝ ես ունեցա շատ բուռն գիշեր, որի արդյունքում Հայաստանը հայտնվեց Մաքսային միությունում: Ունեցանք 800 հեկտար ամայի տարածքի կորուստ, և, որպեսզի, դրանք չլինեն ամայի, դրանց վրա տնկելու ենք կազինոյի ապարատի ծառեր և վիլլաների թփեր. ասում են՝ ինձ մոտ դա լավ է ստացվում: Երկնքից ընկավ երեք մեդալ՝ մեկն իմ անփոխարինելի եղբայր Սաշիկին, մյուսն՝ անփոխարինելի փեսա Միշիկին, մյուսը՝ վաստակաշատ զավակ Շարմազանովին»,- ասաց բեմահարթակին կանգնած անձը:

«Մարդ նամուս, արժանապատվություն պետք է ունենա՝ հայտարարելու համար, որ Սերժ Սարգսյանն անփոխարինելի է: Ուրեմն, էս հայության, ՀՀ-ի մեջ էլ մարդ չէր մնացել, որ երկիր կառավարեր, մնացել էր Սերժ Սարգսյանը, որ գա ու իր խայտառակությունները շարունակի»,- ասում էր Լևոն Բարսեղյանը:

Արթուր Սաքունցը հայտարարեց, որ պայքարը չպետք է լինի Սերժ Սարգսյանի դեմ, պայքարը պետք է լինի համակարգի դեմ: «Սրան որպես հակափաստարկ ես կարող եմ բերել հետևյալը՝ Հայաստանում իշխանությունը անձակենտրոն է: Սերժ Սարգսյանի վարչապետության անցմանը խոչընդոտելու դեպքում համարկարգը, որը կառուցված է իր վրա, կփլուզվի շատ պարզ։ Ինչո՞վ է անփոխարինելի` 7 մլրդ դոլարի պարտքով, անփոխարինելի է պանամյան փաստաթղթերում հիշատակվող անձին՝ Միհրան Պողոսյանին, նորից պատգամավոր հռչակելո՞վ, թե՞ անփոխարինելի է Տիգրան Սարգսյանի կոռուպցիոն հանցագործությունը կոծկելով»,- հարցադրում էր անում Արթուր Սաքունցը:

Հանրահավաքին հաջորդեց երթ Երեւանի Երեւանի կենտրոնական փողոցներով: Երթի մասնակիցները փակեցին Ամիրյան-Մաշտոցի պողոտա խաչմերուկը։ Նրանք վանկարկում էին «Մերժիր Սերժին», «Ազատ, անկախ Հայաստան»: