Բռնություն կիրառելը միակ մեթոդը կլինի Ազգային ժողովի դարպասները բացելու համար. քաղաքագետ

Քաղաքագետ Արմեն Բաղդասարյանը կարծում է, որ ընդդեմ Սերժ Սարգսյանի վարչապետության հանրահավաքներին Ազատության հրապարակում լուրջ թվով քաղաքացիներ կհավաքվեն: Միաժամանակ նա կարծում է, որ եթե Նիկոլ Փաշինյանը եւ իր թիմը շրջափակեն Ազգային ժողովի շենքի մուտքերը, ապա ոստիկանությունը բռնության կդիմի: Բաղդասարյանի խոսքով՝ բռնությունը միակ մեթոդն է, որով հնարավոր կլինի բացել ԱԺ-ի դարպասները:

- Պարոն Բաղդասարյան, այսօր երեկոյան ՀՀԿ գործադիր մարմինը նիստ է հրավիրելու: Ի՞նչ եք կարծում՝ վարչապետի թեկնածուի անունն արդեն պաշտոնապես կհայտարարե՞ն:

- Ես կարծում եմ, որ կարելի է ասել՝ արդեն պաշտոնապես հրապարակել են այդ մասին: Գուցե վաղը հանդիսավոր հայտարարեն, բայց պաշտոնապես արդեն հայտարարել են: Այստեղ կասկած չի կարող լինել, թե ում անունն են տալու: Վաղը կասեն, թե՝ մյուս օրը, դա արդեն էական չէ:

- Կարեն Կարապետյանը հայտարարեց, որ առաջադրելու են Սերժ Սարգսյանի թեկնածությունը: Սա ինչպե՞ս կմեկնաբանեք:

- Կուսակցությունն այդպես է որոշել: Այլ հարց է, թե ինչու Կարեն Կարապետյանը հայտարարեց: Նա կուսակցության երկրորդ դեմքն է եւ դրա համար էլ ինքը հայտարարեց: Քննարկվում է, որ վարչապետ Կարապետյանի ցուցանիշները լավն են եւ խոսակցություն կար, թե ինչու ինքը չլինի: Դրա համար, որպեսզի թիմի համերաշխությունը ցույց տային, նպատակահարմար են գտել, որ հենց Կարեն Կարապետյանը հայտարարի:

- Սա Կարեն Կարապետյանի համար ցավոտ հայտարարություն չէ՞ր:

- Ես չեմ կարծում, որովհետեւ, ըստ էության, ոչինչ չի փոխվում: Էդուարդ Շարմազանովն էլ բաց տեքստով հայտարարեց, որ Կարեն Կարապետյանի լիազորությունները չեն փոխվում, չեն սահմանափակվում: Այսինքն՝ առաջին փոխվարչապետի պաշտոնում Կարեն Կարապետյանն ունենալու է նույն ֆունկցիաները եւ նույն լիազորությունները, ինչն ուներ վարչապետի պաշտոնում: Նա շարունակելու է տնտեսությունը ղեկավարել, տնտեսական բլոկի ղեկավարն է լինելու, ինչպես մինչեւ այս փոփոխություններն էին:

- Կարեն Կարապետյանն այս հայտարարությունն արեց Սերժ Սարգսյանի ցուցումո՞վ, քանի որ Սերժ Սարգսյանի վերջին աշխատանքային օրը նրանք հանդիպում էին ունեցել եւ քննարկել էին նաեւ վարչապետի թեկնածության հարցը:

- Չգիտեմ՝ Սերժ Սարգսյանի ցուցումով է եղել, թե՝ ոչ, բայց միանշանակ համաձայնեցված է եղել: Հակառակ դեպքում նման հայտարարություն չէր կարող անել՝ առանց Սերժ Սարգսյանի գիտության: Թիմի որոշումը չի կարող լինել առանց Սերժ Սարգսյանի: Առավել եւս, որ նա հայտարարել էր, թե չի բացառվում, որ կզբաղեցնի վարչապետի պաշտոնը:

- Պարոն Բաղդասարյան, «GALLUP International association»-ի անցկացրած վերջին հարցումներով՝ Սերժ Սարգսյանի վարկանիշը, որպես վարչապետի թեկնածու, բարձրացել է, իսկ Կարեն Կարապետյանինը՝ նվազել: Սա ինչո՞վ է պայմանավորված:

- Ես ինքս մեծ վստահություն չունեմ սոցիոլոգիական հարցումների նկատմամբ՝ հատկապես Հայաստանում: Ամեն դեպքում, նույնիսկ այդ ցուցանիշերի համաձայն՝ Սերժ Սարգսյանը զբաղեցնում է պատվավոր երրորդ տեղը: Կարեն Կարապետյանի եւ Գագիկ Ծառուկյանի ընդհանուր վարկանիշներն ավելի բարձր են: Խոսել այն մասին, որ Սերժ Սարգսյանի վարկանիշը բարձրացել է, Կարեն Կարապետյանինը՝ իջել, նույնիսկ այդ հարցումներով Կարեն Կարապետյանի վարկանիշը բարձր է: Իսկ ինչ մնում է Կարապետյանի վարկանիշի անկմանը, ապա նա շատ բարձր նոտայով մտավ քաղաքականություն, սպասելիքները բարձր էին: Վարկանիշն ընկավ, որովհետեւ սպասելիքները չարդարացան:

- Հնարավո՞ր է, որ այս մեկ շաբաթվա ընթացքում Սերժ Սարգսյանի վարկանիշն անցնի Կարեն Կարապետյանի վարկանիշից:

- Կարծում եմ՝ չէ, որովհետեւ հասարակության մեջ մեծ հիասթափվածություն կա: Սերժ Սարգսյանը հրապարակավ խոստացել էր, որ չի հավակնում վարչապետի պաշտոնին, բայց փաստորեն դրժեց իր խոսքը եւ սա իր վարկանիշի վրա միայն բացասական ազդեցություն կունենա:

- Նա 10 տարի շարունակ խոստում է տվել եւ չի իրականացրել: Ինչպե՞ս է ստացվում, որ այս ընթացքում իր վարկանիշը բարձրանում է:

- Ես չեմ կարծում, որ Սերժ Սարգսյանի վարկանիշը բարձրացել է եւ վստահություն չունեմ այդ հարցումների նկատմամբ: Ես չեմ ճանաչում այնպիսի մարդու, որն այս իշխանություններից գոհ լինի:

- Պարոն Բաղդասարյան, այսօր արդեն 12-րդ օրն է՝ ինչ շարունակվում է Նիկոլ Փաշինյանի կողմից նախաձեռնած #ԻմՔայլը արշավը, կա նաեւ #Մերժիր Սերժին նախաձեռնություն, Հայաստան Պետության Ճակատի գործողություններն՝ ընդդեմ Սերժ Սարգսյանի վարչապետության: Այս գործընթացներն ի՞նչ արդյունք են տալու:

- Այն արդյունքը կտա, որ իշխանությունների տոնական տրամադրությունը կփչանա: Կարծում եմ, որ Ազատության հրապարակում մարդկանց լուրջ թիվ կլինի, չեմ կարծում, որ կլինի արդյունք՝ Սերժ Սարգսյանի վարչապետությունը կանխելու առումով: Այս քաղաքական ակտիվությունը իր դրական դերակատարումը կունենա այն իմաստով, որ իշխանությունները հաշվի կնստեն հասարակության կարծիքի հետ՝ լրիվ չեն թուլանա ու հաճույք ստանա:

- Եթե Սերժ Սարգսյանի վարչապետությունը չի կանխվելու, ապա ի՞նչ մասով են հասարակության կարծիքի հետ հաշվի նստելու:

- Եթե հասարակական ակտիվություն կա, միշտ էլ վտանգը կա, որ հասարակությունը կարող է բողոքի ալիք բարձրացնել, ապա իշխանություններն ավելի պատասխանատու են վերաբերվում իրենց աշխատանքին: Եթե այդպիսի վտանգ չկա, ապա ինչ ուզում, անում են:

- Նիկոլ Փաշինյանը եւ իր թիմակիցները նշում են, որ ապրիլի 17-ին փակելու են Ազգային ժողովին հարող փողոցները, խորհրդարանի մուտքերը, հարկ եղած դեպքում նաեւ իշխանական պատգամավորների տան ելքերը: Սա իրատեսակա՞ն ծրագիր է, արդյունքներ կլինե՞ն:

- Որպես քաղաքական պայքարի ձեւ՝ մեթոդները լրիվ ընդունելի են, եւ սա այն դեպքում, երբ բացառում են բռնությունը: Սերժ Սարգսյանի վարչապետության կանխելու մասով արդյունք չի տա: Այս մասին կազմակերպիչներն էլ գիտեն, բայց գնում են այդ քայլին, որովհետեւ հստակ արդյունք ունենալու են: Այսինքն, հասարակության մեջ հուսալքվածության տրամադրությունները մի քիչ մեղմելը եւս արդյունք է:

- Ոստիկանության կողմից ինչպիսի՞ գործողություններ կլինեն: Բռնություն կկիրառվի՞:

- Ես հույս ունեմ, որ բանը դրան չի հասնի, բայց ոստիկանությունից ասել են, որ կատարելու են իրենց պարտականությունները: Սա նշանակում է, որ, եթե շրջափակվի ԱԺ-ի շենքը, ոստիկանությունը բնականաբար բռնությունների դիմելու է: Այլ մեթոդներով Ազգային ժողովի դարպասները բացելն ուղղակի ես չեմ պատկերացնում:

- Ոստիկանությունն արդեն սկսել է ՔՊ-ի իրազեկում անցկացնող անդամներին բերման ենթարկել: Սա զգուշացու՞մ է, որ մեծամասշտաբ բռնություններ են լինելու:

- Ոստիկանությունը զբաղվել է նրանով, ինչով զբաղվել է միշտ: Հենց որ քաղաքական ակտիվ գործընթացներ են սկսվում, դիմում են նույն ռեսպրեսիվ մեթոդներին: Այստեղ նորություն չկա, եւ նախաձեռնողները սա շատ լավ պետք է հաշվի առնեն:

- Իշխանությունն արդեն մտահոգվա՞ծ է:

- Բնականաբար, մտահոգված է, բայց ոչ իշխանությունը կորցնելու խնդրով: Մտահոգված է, որ կարող է ստիպված լինել բռնություններ կիրառել եւ միջազգային հանրության առջեւ, կոպիտ ասած՝ խայտառակ լինել: Մտահոգված է միջազգային վարկանիշն ընկնելու համար:

- Ի վերջո, այս պայքարի նախաձեռնությունը որքանո՞վ է խորանալու:

- Այս փուլում չի խորանա: Այս փուլում կլինի որոշակի լարվածություն, հետո աստիճանաբար կհանդարտվի, բայց տրամաբանությունն այն է, որ մինչեւ հաջորդ խորհրդարանական ընտրությունները ձեւավորվի լուրջ թիմ:

- Կարծում եք, որ Սերժ Սարգսյանը միաձայն վարչապետ է ընտրվելո՞ւ:

- Կարծում եմ, որ՝ այո: Բացառությամբ՝ ԵԼՔ-ի, բայց շատ մեծ ձայներով ընտրվելու է: Կարծում եմ, որ Ծառուկյան խմբակցությունը կորոշի ազատ քվեարկության թողնել եւ խմբակցության մեծ մասը կողմ կքվեարկի: Նրանք, ովքեր չեն ցանկանա մտնել այդ խաղի մեջ, ինչ-որ պատրվակով կբացակայեն նիստից:

- Տարօրինակ չէ՞ր, որ Գագիկ Ծառուկյանը չէր մասնակցում Արմեն Սարգսյանի ինաուգուրացիային:

- Նրա չմասնակցելը պետք չէր ինչ-որ քաղաքական իրադարձություն սարքել: Նրա թիմակիցներն ասեցին, որ նա երկրում չէ:

- Գուցե Գագիկ Ծառուկյանը դեռ սրտնեղա՞ծ է, որ ինքը 2018-ին չդարձավ նախագահ, քանի որ շատ էր ցանկանում:

- Չեմ կարծում, որ նման բան կա:

Տպագրվել է «Հայկական ժամանակ» օրաթերթի ապրիլի 11-ի համարում: