Սասուն Միքայելյանը, Նիկոլ Փաշինյանը եւ Արարատ Միրզոյանը արդարացվածի կարգավիճակ ունեն

ՀՀ ԱԺ պատգամավորներ Նիկոլ Փաշինյանը, Սասուն Միքայելյանը եւ Արարատ Միրզոյանն արդարացվածի կարգավիճակ ունեն:

Այս մասին մեր հարցին ի պատասխան ասաց պատգամավորների փաստաբան Նիկոլայ Բաղդասարյանը:

Պատգամավորները ձերբակալվել էին ապրիլի 22-ին՝ օրենքով սահմանված կարգի խախտմամբ հավաք դիտավորությամբ կազմակերպելու եւ անցկացնելու անմիջականորեն ծագած կասկածանքով, ապա հաջորդ օրն ազատ արձակվել:

Մեր հարցին, թե պատգամավորներն այժմ ի՞նչ կարգավիճակ ունեն Բաղդասարյանը պատասխանեց. «Քրեական դատավարության օրենսգրքով սահմանված է հետեւյալ ընթացակարգը՝ եթե անձը ձերբակալվել է, որի արդյունքում ձեռք է բերել կասկածյալի կարգավիճակ եւ 72  ժամվա ընթացքում մեղադրանք չի առաջադրվել, ապա վերջիններս արդեն ձեռք են բերում արդարացվածի կարգավիճակ: Այս փուլում արդարացվածի կարգավիճակը նույնն է, ինչը դատարանի դատավճռով անձը համարվի անմեղ»:

Բաղդասարյանն ասաց, որ դիմել է ՀՀ գլխավոր դատախազին, որպեսզի պատգամավորներին ապօրինի ձերբակալելու փաստի առթիվ հարուցվի քրեական գործ, որովհետեւ ըստ փաստաբանի՝ նրանց նկատմամբ քրեական հետապնդումն իրականացվել է ՀՀ Սահմանադրության նորմերի խախտմամբ: «Հետեւաբար այն մարդիկ, որոնք պատգամավորների նկատմամբ սկսել են քրեական հետապնդում, պետք է ենթարկվեն քրեական պատասխանատվության: Վկայակոչել եմ նաեւ այն փաստը, որ գործի օբյեկտիվ քննության համար պետք է ձերբակալման հետ առնչություն ունեցող անձանց, այդ թվում՝ նաեւ ոստիկանապետի, փոխոստիկանապետի եւ մի շարք այլ պաշտոնատար անձանց լիազորությունները ժամանակավորապես դադարեցվեն, մինչեւ տվյալ գործով նախաքննության ավարտը»,- ասաց Բաղդասարյանը, հավելելով, որ դեռ դիմումին պատասխան չի ստացել:

Փաշինյանը, Միրզոյանը եւ Սասուն Միքայելյանը ձերբակալվեցին ապրիլի 22-ին՝ Արցախի փողոցում՝ ՀՀ արդեն նախկին վարչապետ Սերժ Սարգսյանի եւ նրա հրաժարականը պահանջող ցուցարարներին առաջնորդող ԱԺ պատգամավոր Նիկոլ Փաշինյանի հանդիպումից մոտ կես ժամ անց: Սերժ Սարգսյանի եւ Փաշինյանի՝ «Մարիոթ» հյուրանոցում տեղի ունեցած, այսպես կոչված, բանակցությունները տեւեցին ընդամենը մի քանի րոպե. բանակցությունները տապալվեցին, քանի որ Սերժ Սարգսյանը սպառնաց Մարտի 1-ի կրկնությամբ եւ հեռացավ: Հանդիպումից հետո Փաշինյանը կոչ արեց կրկնակի թափով շարունակել քաղաքացիական անհնազանդության գործողությունները՝ հայտարարելով, որ ժամը 19:00-ին Երեւանի Հանրապետության հրապարակում կանցկացնեն հերթական հանրահավաքը:

Ցուցարարները Հանրապետության հրապարակից երթ սկսեցին դեպի Էրեբունի վարչական շրջան: Արցախի փողոցի վրա, սակայն ցուցարարները հանդիպեցին ոստիկանական պատի. ոստիկանությունը տարածքից հեռացրեց Ազգային ժողովի պատգամավորներ Նիկոլ Փաշինյանին, Սասուն Միքայելյանին եւ Արարատ Միրզոյանին, ինչից հետո հատուկ միջոցների գործադրմամբ ոստիկանությունը փորձեց ցրել ցույցը՝ բերման ենթարկելով տասնյակից ավելի ցուցարարների:

Տեւական ժամանակ գաղտնի էր պահվում երեք պատգամավորի գտնվելու վայրը. միայն ժամեր անց ՀՀ գլխավոր դատախազությունը հաղորդագրություն տարածեց՝ նշելով, որ երեք պատգամավորները ձերբակալված են եւ կասկածվում են օրենքով սահմանված կարգի խախտմամբ հավաք կազմակերպելու եւ անցկացնելու մեջ՝ այդպես էլ չնշելով նրանց գտնվելու վայրը: Հաջորդ օրը՝ ապրիլի 23-ին, ՀՀ փոխվարչապետ Կարեն Կարապետյանը դիմել էր դատախազին՝ պատգամավորներին կալանավորելու միջնորդությունը ետ վերցնելու համար, ապա այցելել էր ՁՊՎ, տեսակցել Փաշինյանի հետ, ինչից հետո էլ պատգամավորներն ազատ էին արձակվել: