ԱԺ-ում սկսվել է վարչապետի քվեարկության նիստը, Փաշինյանին ուղղված հարցեր չկան. թարմացվող

13:45- Խոսքը տրվեց վարչապետի թեկնածու Նիկոլ Փաշինյանին, այնուհետեւ հայտարարվեց քվեարկություն: Փաշինյանի թեկնածությանը կողմ քվեարկեց 59 պատգմավոր, դեմ՝ 42: Նիկոլ Փաշինյանն ԱԺ հատուկ նիստում ընտրվեց ՀՀ վարչապետի պաշտոնում: 

13:25- Վահրամ Բաղդասարյանը կրկնեց գրեթե նույն տեքստը, ինչ ասվել էր մայիսի 1-ի քվեարկության ժամանակ, նշեց, որ պարզապես խաղաղության սահմանման համար են աջակցելու Նիկոլ Փաշինյանի ընտրվելուն, իրենց կարծիքը չի փոխվել, տա Աստված՝ իրենք սխալվեն: Նրա օգտին կքվեարկեն 11 պատգամավոր: Վահրամ Բաղդասարյանը հորդորեց 11 պատգամավորին չանձնավորել, չհամարել, որ նրանք անցել են հակառակ կողմը, այլ պարզապես այդ 11 պատգամավորին ՀՀԿ-ն է կոչ արել քվեարկել՝ քվե ապահովելու համար, նրանց փոխարեն կարող էր լինել այլ 11 պատգամավոր:

13:12- ՀՅԴ խմբակցության անունից ձայնը տրվեց Արմեն Ռուստամյանին:

13:10- Հերթը խմբակցությունների ներկայացուցիչների ելույթներինն է: ԵԼՔ-ից ելույթ է ունենում Էդմոն Մարուքյանը. «Մենք հասել ենք մի հանգրվանի, երբ բոլորս կարող ենք մասնակցել փոփոխությունների կատարմանը: Համակարգը քանդվել է, եւ մենք այսօր հնարավորություն ունենք կառուցելու նորը՝ ՀՀ պետական շահերի, քաղաքացու հիմնարար իրավունքների հիման վրա: Բոլոր ջանքերը՝ ուղղված ՀՀ քաղաքացու հաղթանակը կոտրելուն, կանցնեն ապարդյուն:

Թող Աստված պահպանի հայ ժողովրդին»:

13:05- Մտքերի փոխանակության ավարտից հետո Արա Բաբլոյանը լրացրեց Լենա Նազարյանի խոսքը՝ նշելով, որ իսկապես ճիշտ է ասված, որ հայ ժողովրդի, հայերի մասին խոսում է ողջ աշխարհը, ճիշտ է, որ աշխարհը հիացած է այս հեղափոխությամբ, բայց նաեւ պետք է նշել, որ աշխարհը ցնցված է նաեւ ՀՀ իշխանության ու ոստիկանության պահվածքից:

13:00- Ելույթներով հանդես եկան Արամ Սարգսյանը, Արարատ Միրզոյանը, Լենա Նազարյանը, այժմ խոսում է ԲՀԿ-ից Նաիրա Զոհրաբյանը: Արարատ Միրզոյանը կոչ արեց չկոտրել ժողովրդի ոգին:

12:48- Նիկոլ Փաշինյանի ելույթից հետո, հարց ու պատասխանների համար հերթագրվելիս պարզվեց՝ հարցեր չկան:

Ելույթների համար հերթագրվեց 5 պատգամավոր՝ 4-ը ԵԼՔ-ից ու Նաիրա Զոհրաբյանը:

12:42- Նիկոլ Փաշինյանը շնորհավորեց Շուշիի ազատագրման տարեդարձի կապակցությամբ, նշեց, որ հենց այս օրը վարչապետի թեկնածու ընտրելն ու ժողովրդի դե յուրե հաղթանակը նշելը պատահական չէ:

«Համոզված եղեք՝ սիրո և համերաշխության հեղափոխությունը ոչ միայն վտանգ չի պարունակում, այլև նոր հնարավորություններ է բացում Արցախի ժողովրդի համար: ՀՀ-ում իրականացված ոչ բռնի ու թավշյա հեղափոխությունը զարմացրել ու հիացրել է ամբողջ աշխարհին, Հայաստանի և հայ ժողովրդի վարկանիշն այսօր ավելի բարձր է, քան երբևէ։ Այսօր Հայաստանի Հանրապետության միջազգային հեղինակություն ավելի ծանրակշիռ է, քան երբևէ, ինչը մենք պետք է ծառայեցնենք ՀՀ շահերին»,- ասաց Փաշինյանը, շարունակելով ելույթն ու նշելով իր՝ վարչապետ ընտրվելու դեպքում իրականացվելիք առաջնահերթությունները՝ մենաշնորհների ու կոռուպցիայի վերացման, բիզնեսի խթանման, ներգաղթի նպաստման, բանկային տոկոսների կրճատման ու տասնյակ այլ հարցերի շուրջ:

«Առաջնահերթություններից մեկն այն է, որ մեծ տեմպերով պետք է զարգանա նաեւ գյուղատնտեսությունը, չափազանց կարեւոր է, որ կառավարությունը օգնի գյուղացուն՝ վարկային անտանելի բեռը թեթեւացնելու համար: Մենք մտադիր ենք կրճատել բանկային ահռելի տոկոսները, նոր հնարավորություններ կստեղծվեն դեպի Իրան եւ ԵԱՏՄ ներկրումների համար: ՀՀ-ում ոռոգման ջուրն այնքան հասանելի պետք է դառնա, ինչքան էլեկտրաէներգիան:

Վերջին 1 ամսում մեր երկիրը համաշխարհային մամուլի ուշադրության կենտրոնում է, մեր երկիրը լուսաբանվել է մեծամասամբ դրական լույսի ներքո՝ բարձրացնելով մեր երկրի վարկանիշը, սա կանխատեսում է զբոսաշրջության զգալի աճ՝ տարվա երկրորդ կեսին:

Քրեածին մակարդակը մեր երկրում պետք է հասնի մաքսիմալ ցածր մակարդակի, այս համերաշխության մթնոլորտը պետք է նպաստի դրան:

ՀՀ արտաքին քաղաքականության մեջ մեր շահը պետք է շարունակի մնալ ՀՀ քաղաքացին: ՀՀ-ն կշարունակի մնալ ԵԱՏՄ եւ ՀԱՊԿ անդամ, ՌԴ դաշնակցային հարաբերությունների բնագավառներում զարգացումը մեր գլխավոր առաջնահերթությունների թվում է: Մենք Ռուսաստանի հետ համագործակցությունը դիտարկում ենք որպես մեր երկրի առաջնահերթություններից մեկը»:

12:12- «Մենք՝ բոլորս, մասն ենք ժողովրդական զարթոնքի, որն իր խաղաղության ու անգամ տոնականության շնորհիվ արդեն իսկ անվանվում է եւ մեր հիշողության մեջ կմնա որպես սիրո հեղափոխություն: Հայաստանի քաղաքացիները, ովքեր տարիներ շարունակ իրենց մերժվածության, անարդարության զգացումը կիսել են միայն ընտանիքի անդամների հետ, այդ ճնշվածությունը դուրս հանեցին փողոց, սակայն այդ վախը չվերածվեց բռնության, այլ վերածվեց միասին գործելու ոգեւորության: Տարբեր գաղափարների ու տարբեր սոցիալական խավերի մարդիկ իրենց ձայնը բարձրացրեցին, հասան հաղթանակի:

Ինձ համար մեծ ուրախություն է ՀՀ վարչապետի պաշտոնում ներկայացնելու համաժողովրդական շարժման առաջնորդ եւ ժողովրդի բացարձակ մեծամասնության սերը վայելող թեկնածուին՝ Նիկոլ Փաշինյանին»,- նշեց Լենա Նազարյանը ու ներկայացրեց Նիկոլ Փաշինյանի կենսագրական մանրամասները:

12:04- Ազգային ժողովում արդեն մեկնարկել է վարչապետի ընտրության համար հրավիրված նիստը: Քվորում կա, ներկա է 100 պատգամավոր: ԱԺ նախագահ Արա Բաբլոյանն առաջարկեց աշխատել առանց ընդմիջման, պատգամավորները կողմ քվեարկեցին այդ առաջարկին: Այնուհետեւ նշվեց, որ ԱԺ պատգամավորների 1/3-րդի կողմից վարչապետի թեկնածու է առաջադրվել Նիկոլ Փաշինյանը:

Լենա Նազարյանը հրավիրվեց՝ ներկայացնելու վարչապետի թեկնածուին: