ՀՀԿ-ում ճամբարների են բաժանվել, կուսակցությունից դուրս գալու հարյուրավոր դիմումներ կան

Հայաստանի Հանրապետական կուսակցությունը թեւակոխել է փլուզման դանդաղ գործընթաց: Որքան էլ կուսակցության էլիտայի տարբեր ներկայացուցիչներ պաշտոնապես չեն խոստովանում, բայց մասնավոր զրույցներում ասում են, որ ներսում գաղջ մթնոլորտ է տիրում: Այս շրջանում ՀՀԿ-ականները թիմերի են բաժանվում, յուրաքանչյուրն իր ճամբարն է ստեղծում եւ փորձում համախոհներ ձեռք բերել: Մասնավորապես, ՀՀԿ-ական երկու պատգամավոր ՀԺ-ի հետ զրույցում նշեց, որ ձեւավորված ճամբարներից մեկում միմյանց գլուխ են հավաքվում հնաբնակները, իսկ մյուսում՝ երիտթեւը: Ստացվել է այնպես, որ երիտհանրապետականները քաղաքական իրավիճակին հարմարվելու նշաններ են ցույց տվել, ինչն ինչ-որ չափով գաղափարախոսության կողմնակից «ծերակույտի» սրտով չի եղել:

Բացի այս էլ՝ հայտնի է, որ կան հանրապետականներ, որոնք հեռացվել են, որոշներն էլ՝ սեփական նախաձեռնությամբ են հեռանում կուսակցությունից: Մասնավորապես, խորհրդարանի ՀՀԿ-ականներից խմբակցությունը արդեն իսկ լքել են Շիրակ Թորոսյանն ու ՀՀ նախկին ոստիկանապետ Վլադիմիր Գասպարյանի փեսան՝ Արթուր Գեւորգյանը: ԱԺ ՀՀԿ խմբակցության ղեկավար Վահրամ Բաղդասարյանը ՀԺ-ի հետ զրույցում, խոսելով թիմի մեջ ընկած «վարակի» մասին, ասում է, մասնավորապես, Թորոսյանին իրենք են հեռացրել.

«Խմբակցությունից դուրս չեն գալիս: Դեռ մայիսի 22-ին եղել է խմբակցության որոշում՝ Շիրակ Թորոսյանին հեռացնել կարգապահական խախտումների համար: Նա չէր ներկայացել այդ նիստին եւ կանոնակարգի համաձայն՝ 7 օր անց նա հեռացվեց: Նա ելքը գիտեր եւ տարածեց, որ դուրս է գալիս»:

Վովա Գասպարյանի պատգամավոր փեսայի դիմումի հարցը դեռ ՀՀԿ-ում չեն քննարկել: Վահրամ Բաղդասարյանն ասում է, որ հարցը խմբակցության առաջիկա նիստի օրակարգում է լինելու:

«Արթուր Գեւորգյանի հարցը դեռ չի քննարկվել, քանի որ նա երբ դիմել է, դիմումը ֆրակցիայի օրակարգում չկար: Խմբակցության մյուս նիստին կքննարկենք»,- նշեց նա:

Այս պահի դրությամբ կարող ենք արձանագրել, որ վտանգված է ՀՀԿ-ի խորհրդարանական իշխանությունը: Կուսակցությունն ԱԺ-ում մեծամասնություն է իր 58 պատգամավորով, բայց Թորոսյանի եւ Գեւորգյանի հեռանալուց հետո ՀՀԿ-ում մնում է 56 պատգամավոր: Սրան զուգահեռ էլ մի առվով չեն հոսում ՀՀԿ-ական Ֆելիքս Ցոլակյանի եւ կուսակցության էլիտայի ջրերը, արդյունքում ստացվում է 55 պատգամավոր: Խորհրդարանական մյուս երեք ուժերը միասին ունեն 47 պատգամավոր, եթե այս երեքը սկսեն համագործակցել նրանց հետ, ապա կստացվի 55-ն ընդդեմ 50-ի: Սակայն, տարբեր ՀՀԿ-ականներ էլ փորձում են ցույց տալ, որ իրենց տրամադրությունները փոփոխական են: Մասնավորապես, մյուս գեներալները եւ գործարար թեւն արդեն ապացուցել են, որ ցանկացած պահի կարող են լքել կուսակցության կամ խմբակցության շարքերը:

Մեր հարցին, թե մտավախություն չկա՞, որ ՀՀԿ խմբակցությունում եւս չորս «դավաճան» ի հայտ կգա եւ ՀՀԿ-ն մեծամասնություն չի լինի, Վահրամ Բաղդասարյանը պատասխանեց.

«Ո՞վ է ասում, որ հանրապետականը միշտ պետք է մեծամասնություն լինի: Ինչ-որ տեղ գրվա՞ծ է, որ այդպես պետք է լինի: Որեւէ մտավախություն չկա»:

Դիտարկմանն էլ, որ ՀՀԿ-ն կկորցնի վերջին՝ օրենսդիր իշխանությունը, Բաղդասարյանը նկատեց. «Մենք մեր առջեւ խնդիր չենք դրել, որ պետք է կառչենք իշխանությունից: Քաղաքական զարգացումներ են տեղի ունեցել եւ որեւէ ուժ իր համար որեւէ տեղ չի ամրագրել՝ որտեղ պետք է լինի միշտ»:

Հարցին էլ՝ իշխանության կորուստը ծանր չեն տանու՞մ, Վահրամ Բաղդասարյանը պատասխանեց. «Ես ծանր տանո՞ւմ եմ: Բնականաբար՝ ոչ, քաղաքական զարգացումներ են, եւ չես կարող ասել, թե առաջիկայում ինչ կլինի»:

ՀՀԿ-ի հնաբնակներից Գագիկ Մինասյանն էլ, անդրադառնալով մեր հարցին, որ կուսակցության շարքերը լքում են, պատասխանեց. «Շատերն էլ մնում են»:

Մինասյանը եւս նշեց, թե իր համար մտահոգիչ չէ, որ դուրս են գալիս, բայց միաժամանակ այնքան էլ իրատեսական չի համարում, որ մեծամասնությունից զրկվելու են:

«Ինձ դա չի մտահոգում, եթե նույնիսկ չորս պատգամավոր էլ դուրս գա, որի հավանականությունը ես չեմ տեսնում, բայց մտահոգիչ չէ»,- եզրափակեց նա:

ՀԺ-ին տեղեկություն փոխանցվեց նաեւ այն մասին, որ մարդիկ հարյուրներով դիմում են ներկայացնում եւ լքում կուսակցությունը: Մեր այս տեղեկությունը հաստատեց նաեւ ՀՀԿ կազմակերպչական հանձնաժողովի նախագահ Ռուբեն Թադեւոսյանը: Նա նշեց, որ արդեն 600 դիմում են ստացել, ովքեր ցանկանում են լքել ՀՀԿ-ն, թեեւ նշեց, որ 155 հազարից 600-ը մեծ թիվ չէ: Մեր հարցին՝ ՀՀԿ Գործադիր մարմինը կամ խորհուրդը լքողներ կա՞ն, Թադեւոսյանը բացասական պատասխան տվեց: Նա ասաց, որ տասնյակ մարդիկ էլ ցանկանում են անդամակցել ՀՀԿ-ին: