Հաջորդը քեզ ենք թրաշելու. Մայր Աթոռ ներխուժած ցուցարարները՝ Տեր Վահրամին (թարմացված)

17:50- Նոր Հայաստան Նոր Հայրապետ նախաձեռնության ֆեյսբուքյան էջը հայտարարություն է տարածել, որում ասվում է. «Նախաձեռնությունը հայտարարում է, որ ներկա պահին գտնվում է Մայր Աթոռ սուրբ Էջմիածնի դիվանատանը նստացույցով, եւ շարունակելու է այն այնքան ժամանակ, քանի դեռ Գարեգին Բ կաթողիկոսը չի տվել իր հրաժարականը»:

Հայտարարում ենք, որ Մայր Աթոռի տարածած լուրերը, որ նախաձեռնությունը ուժով է գրավել դիվանատունը հերյուրանք է: Դա ամբողջությամբ փաստում է ոստիկանների խաղաղ և հարգալից վերաբերմունքը շարժման մասնակիցներին:

15:27- Կապված ցուցարարների այն հայտարարության հետ, թե Գարեգին Բ-ն Մայր Աթոռում պահվող եզակի մասունք Սուրբ Գեղարդից մեկ կտոր նվիրել է ռուս քաղաքապետի, Մայր Աթոռ Սբ. Էջմիածնի տեղեկատվական համակարգի տնօրեն Տեր Վահրամ Մելիքյանը ֆեյսբուքյան իր էջում գրեց. «ՊԱՇՏՈՆԱՊԵՍ հայտարարում եմ, որ լուրերը, թե Մայր Աթոռ Սուրբ Էջմիածնում պահվող Սուրբ Գեղարդը վաճառվել է կամ վնասվել, կեղծ են:

Առաջիկային այն դուրս կբերվի հավատացելոց երկրպագության համար և մեր ժողովուրդը կտեսնի, թե համաքրիստոնեական սրբությունն անխաթար է և անվնաս»:

15:18- Հենց նոր Մայր Աթոռի դիվանապետ Արշակ Սրբազանը հայտարարություն արեց. «Արդեն տեսաք, թե ինչ կատարվեց այսօր Մայր Աթոռ Սուրբ Էջմիածնում: Մենք սա գնահատում ենք հարձակում եկեղեցու վրա: Մենք ստիպված ենք դադարեցնել մեր աշխատանքները, բոլոր սպասավորներին, աշխատողներին խնդրել եմ դադարեցնել աշխատանքը, հուսամ իրավապահ մարմինները համապատասխան գործողությունները կանեն, որպեսզի զերծ պահեն եկեղեցուն հալածանքից»: Ի պատասխան ցուցարարները դարձյալ բացականչեցին «ամոթ»:

14:52- Քիչ առաջ Մայր Աթոռ Սբ. Էջմիածնի տեղեկատվական համակարգի տնօրեն Տեր Վահրամ Մելիքյանը ֆեյսբուքյան իր էջում գրեց, որ ցուցարար Կարեն Պետրոսյանը իրեն ասել է՝ «հաջորդը քեզ ենք թրաշելու»:

«Հայտնի նախաձեռնության դիմագիծը. Քիչ առաջ հայտնի նախաձեռնության պարագլուխ Կարեն Պետրոսյանը հրապարակավ հայտարարեց, որ «հաջորդը քեզ ենք թրաշելու»։ Նույն ճակատագրի արժանացան ևս մի քանի հոգևորականներ, որ համարձակվել են չհամաձայնել նախաձեռնության հետ»,- գրել է Տեր Վահրամ Մելիքյանը։

14:40- Այս պահին Էջմիածնի քաղաքապետի պաշտոնակատար Դիանա Գասպարյանը եկել է Մայր Աթոռ: Նա խոսում է ցուցարարների հետ եւ փորձում է իրավիճակը հասկանալ: Գասպարյանը ասաց, որ հարգում է մարդկանց ազատ կամարտահայտությունը:

14:10- Նոր Հայաստան Նոր Հայրապետ նախաձեռնության անդամ Կարեն Պետրոսյանը լրագրողների հետ զրույցում ասաց, որ ինչքան էլ եկեղեցին տարանջատված լինի պետությունից, միեւնույն է ՀՀ վարչապետ Նիկոլ Փաշինյանը կարող է հորդորել, որպեսզի կաթողիկոսը հրաժարական տա: Պետրոսյանը հույս ունի, որ իրենց կողմից ընտրված վարչապետը նման հորդոր կհնչեցնի:

13:35- Քիչ առաջ Մայր Աթոռ Սբ Էջմիածնի Դիվանատան շենքի իր սենյակից դուրս եկավ Ամենայն Հայոց Կաթողիկոս Գարեգին Բ-ն եւ մի շարք հոգեւորականների ուղեկցությամբ հեռացավ Մայր աթոռից: Այդ ընթացքում ցուցարարները բացականչում էին «Գարեգին հեռացիր» «Ամոթ»: Հնչեցին նաեւ բացականչություններ «Հանրապետական-հոգեւորականներ»: Ցուցարարները պնդում էին, որ Գարեգին Բ-ն Մայր Աթոռում պահվող եզակի մասունք Սուրբ Գեղարդից մեկ կտոր նվիրել է ռուս քաղաքապետի:

12:07- Քիչ առաջ Կաթողիկոսի հրաժարականը պահանջող նախաձեռնության անդամները ներխուժել են Մայր Աթոռ Սբ Էջմիածնի Դիվանատան շենք՝ «անվայելուչ պահվածքով, իրենց հատուկ վերջնագրային պահանջներով ու սադրիչ գործողություններով»,- տեղեկացնում է Վեհափառի մամուլի խոսնակը:

Նրա խոսքով՝ «նրանք որեւէ կերպ տրամադիր չեն ունկնդիր լինելու եկեղեցականների հորդորներին՝ դադարեցնելու նման անընդունելի եւ դատապարտելի վարվելակերպը»:

Մանրամասները՝ քիչ հետո: