Պատգամավորները վիճեցին, գրազ եկան եւ նոր միայն Ընտրական օրենսգրքին կողմ քվեարկեցին

ԱԺ պետաիրավական հարցերի մշտական հանձնաժողովի հոկտեմբերի 19-ի արտահերթ նիստը մեկնարկեց հանձնաժողովի նախագահ Գեւորգ Կոստանյանի, հանձնաժողովի անդամ Էդմոն Մարուքյանի եւ արդարադատության նախարար Արտակ Զեյնալյանի վիճաբանությամբ: Արտահերթ նիստում քննարկվում է «Ընտրական օրենսգրքի» նոր նախագիծը: Կոստանյանը նախարարից հետաքրքրվեց՝ նախագծով առաջարկում են, որ առնվազն 4 խմբակցություն լինի ԱԺ-ում, կայունության ապահովման համար, բայց նույն օրենքով այնպիսի համադրություն է սահմանված սահմանադրական օրենքների ընդունման, որ եթե 20 կուսակցություն ներկայացված լինի ԱԺ-ում, մի ուժ է որոշելու՝ Սահմանադրությունը փոփոխվի՞, թե՞ ոչ:

Արտակ Զեյնալյանը հակադարձեց, որ 2/3-ը բացարձակ սկզբունք չէ, եւ երաշխավորած է քաղաքական կայուն մեծամասնությունը՝ 54 տոկոսը. «2/3 կլինի ԱԺ-ում քաղաքական մեծամասնությունը, պայմանավորված է այդ քաղաքական ուժի վարկանիշով՝ ժողովրդավարական ընտրությունների արդյունքում, որտեղ ազատորեն է ձեւավորվել կամքը: Մենք մի մեխանիզմ ենք փորձում ստեղծել, որը պիտի հակակշռի ժողովրդավարությանը՝ ապահովելու բազմակարծությունը»:

Այնուհետեւ, երբ Արտակ Զեյնալյանը հանգամանալից բացատրում էր Կոստանյանի մտահոգությունները, Կոստանյանը նախագահողին տրված իրավունքով սկսեց ընդհատել նախարարին: Արտակ Զեյնալյանը սրտնեղեց, իսկ պատգամավոր Էդմոն Մարուքյանն ասաց, թե նախագահողն իրավունք չունի ընդհատելու, որին ի պատասխան Կոստանյանն առաջարկեց. «Եկեք գռազ գանք»:

«Ծառուկյան» խմբակցության պատգամավոր Գեւորգ Պետրոսյանը նշեց, որ այս գործընթացի նկատմամբ իրենց գնահատականն այն կանխավարկածի շուրջ է, որ կառավարությունը շահագրգռված է օրենսգիրքը բարելավել: «Այս նպատակի շրջանակներում մենք ընդամենը երեք օր առաջ առաջին փոխվարչապետի մասնակցությամբ ունեցանք քննարկում, որտեղ ամենակարեւոր նկատառումներից մեկն այն է, որ եթե պարտադիր է չորս խմբակցության առկայություն խորհրդարանում, ապա գոնե չորրորդ խմբակցությունը պետք է հավաքի առնվազն երկու տոկոս վստահության քվե, նոր իրավունք ունենա մտնել խորհրդարան»,- ասաց նա եւ նկատեց, որ այդ առաջարկությունն ի սկզբանե ընդունվել է, սակայն հիմա կարծես չի ներառվել:

Նա նաեւ հարց բարձրացրեց, թե եթե սահմանվում է պարտադիր չորս խմբակցության առկայություն, ապա եթե ենթադրենք՝ տեսականորեն չորրորդ քաղաքական ուժը չի մասնակցում, այդ դեպքում ԱԺ ընտրություններ կայանալու են, թե՝ ոչ: Արտակ Զեյնալյանը նախ ասաց, որ ընդունել են երկու տոկոս շեմը հաղթահարելու դեպքում չորրորդ խմբակցության անցնելը խորհրդարան, բայց տեխնիկապես չէին կարող ընդունել, քանի որ կառավարությունն այս տարբերակն է հաստատել: «Բայց հիմա ընդունում ենք, որ չորրորդ ուժի խորհրդարանում հայտնվելու նախապայման է երկու տոկոս շեմը հաղթահարելը»,-ասաց նա:

Ինչ վերաբերում է հարցին, թե ինչ է տեղի ունենում, եթե չորրորդ ուժը չի գրանցվում, ապա նախարարն ասաց, որ դրա լուծումը տրված չէ, բայց առկա է տարբերակ, որ նորից է հայտարարվում գրանցում եւ հիմա կարող են քննարկել, թե ինչ է տեղի ունենում, երբ երեք կուսակցություն է գրանցվում: «Այս պահին գործնական նշանակություն դա այս ընտրություններին չունի, քանի որ տեսանք ավագանու ընտրություններին ինչպեսի ակտիվություն եղավ՝ պայմանավորված իրավիճակով: Կարող ենք քննարկել, թե արդյոք այդ տեսական լուծումը տանք այս փոփոխություններում, եթե գտնենք, որ այն ոչ միայն տեսական, այլ գործնական նշանակություն ունի»,- ասաց նա:

Հանձնաժողովի նախագահ Գեւորգ Կոստանյանն արձագանքեց, որ հավանականության տեսության սահմաններում քաղաքական ուժերը բոյկոտում են ընտրությունների մասնակցությունը` չեզոքացնելով ընտրական գործընթացը: «Հիմա նույն կերպ կարող եք ասել, որ դա խելագարության կանխավարկածի տեսանկյունից կարող ենք դիտել, բայց եթե ղեկավարվում եք հավանականության տեսությամբ, դա էլ ղեկավարվեք հավանականության տեսանկյունից»,- ասաց նա:

Ի վերջո, քննարկումների արդյունքում հանձնաժողովը դրական եզրակացություն տվեց նախագծին, այն կքննարկվի հոկտեմբերի 22-ին գումարվելիք ԱԺ արտահերթ նիստում: