Շուրջ 38 տարեկան դասագիրք՝ Բժշկականում. ուսանողներն ահազանգում են, բուհը՝ պարզաբանում

Երեւանի Մխիթար Հերացու անվան պետական բժշկական համալսարանի՝ ԵՊԲՀ ցիկլային առարկաների դասավանդման ռեստարտ նախաձեռնությունը ահազանգում է բուհում գործածվող հին դասագրքի մասին, որը հրատարակվել է հեռավոր 1980-ականների սկզբին:

«38 տարվա գրականություն, պատկերացնում ե՞ք, 38 տարվա՜։ ՍՍՀՄ-ում տպագրված գիրք՝ ԻնԸստուտների համար Կա՛ռլ, այլ ոչ թե, իբր ժամանակակից համալսարանի համար. եւ այս զուգարանի թղթից դաս սովորելու համար վճարում ենք 1.000.000 (դրամ) վարձ»,- հայտարարում է նախաձեռնությունը՝ մասնավորապես դիմելով կրթության եւ գիտության նախարար Արայիկ Հարությունյանին ու Առողջապահության նախարար Արսեն Թորոսյանին:

Խոսքը վերաբերում է «Մաշկային եւ վեներական հիվանդություններ» դասագրքին, որի տիտղոսաթերթի վրա նշված է՝ «Թույլատրվում է ՍՍՀՄ առողջապահության մինիստրության ուսումնական հաստատությունների գլխավոր վարչության կողմից որպես դասագիրք բժշկական ինստիտուտների ուսանողների համար»: Խնդրի արձանագրումն ու հրապարակայնացումը որոշակի լարվածություն է առաջացրել բուհի ուսանողների եւ դասախոսների շրջանում եւ առիթ տվել փոխադարձ մեղադրանքների ու վիրավորանքների:

Բժշկական համալսարանը, ի պատասխան առաջ քաշված խնդրին, հակադարձում է, որ թեպետ 1981 թվականին հրատարակված այդ դասագիրքը չի հանվել գործածությունից եւ պահպանվում է բուհի գրապահոցում, դա չի նշանակում, թե այն միակն է եւ չկան համարժեք այլ դասագրքեր: Պարզապես շատ ուսանողներ, ըստ Հերացու անվան պետական բժշկական համալսարանի աշխատակազմի ղեկավար Շուշան Դանիելյանի, ցանկանում են օգտվել այդ դասագրքից, որովհետեւ նրանց դուր է գալիս առարկայի մատուցման տվյալ ձեւը: Ու մանավանդ հաշվի առնելով, որ մաշկաբանության ոլորտում հիվանդությունների նկարագրությունը տարիների ընթացքում չի փոխվում, թեկուզ շուրջ 40-տարվա վաղեմություն ունեցող այդ դասագիրքը շարունակում է պահանջված մնալ:

«Տեղեկացնենք, որ ԵՊԲՀ մաշկաբանության եւ սեռավարակաբանության ամբիոնում դասավանդման համար օգտագործում են տարբեր ուսումնական նյութեր, վերջին ուսումնական նյութը տպագրվել է 2017 թվականին: Նշենք նաեւ, որ հենց նույն ամբիոնում վերջերս տպագրվել է եւ ուսումնական գործընթացում կիրառվում է «Մաշկային հիվանդություններ» ատլասը, որը իր մեջ ներառում է հիմնական եւ առավել հաճախ հանդիպող մաշկային հիվանդությունների նկարագրութուններ եւ գունավոր, բարձր որակով տպագրված նկարներ` իրենց նկարագրություններով: 2018 թվականին Մաշկաբանության եւ սեռավարակաբանության ամբիոնի աշխատակիցների կողմից թարգմանվել է եւ ներդրվել է Սեռավարակների վարման ուղեցույցների ժողովածուն, որը նույնպես ներկայացվում է որպես ուսումնական ձեռնարկ: Ինչ վերաբերվում է ձեր կողմից մատնանշված դասագրքին, ապա նշենք, որ ուսումնական գործընթացում, ի թիվս համարժեք այլ դասագրքերի, կիրառվում է նաեւ այդ դասագիրքը, ինչը ոչ մի կերպ չի նվազեցնում այդ կլինիկական դեպքերի արժեքը: Ավելացնենք նաեւ, որ մաշկաբանությունը համարվում է վիզուալ մասնագիտություն, (այդպիսի) մասնագիտություններում տարիների ընթացքում հիվանդությունների նկարագրությունը չի փոխվում»,- համալսարանի պարզաբանումը փոխանցեց Շուշան Դանիելյանը: Ավելացրեց նաեւ, որ Երեւանի պետական բժշկական համալսարանը միակ բուհն է, որ 2017 թվականին ստեղծել է անվճար էլետրոնային բժշկական գրադարան, որտեղ ժամանակակից մոտեցումներով տեղադրված են ե՛ւ դասագրքեր ու էլեկտրոնային նյութեր, ե՛ւ թեստեր:

Բուհի աշխատակազմի ղեկավարը տեղեկացնում է, որ հաստատության 2019 թվականի բյուջեի նախագծով նախատեսվում է ուսումնական նյութերով ու դասագրքերով հագեցնել 103 ամբիոնից 80-ը: Վերջին 3 տարիների ընթացքում, ըստ նրա, տպագրվել է 38 միլիոն դրամի թվով 99 դասագիրք: 2018 թվականին ձեռք է բերվել 21 անուն արտասահմանյան գրականություն՝ 120 օրինակով: 2017-2018 թվականներին 39 վիդեո դասախոսություններ են պատրաստվել, 2019 թվականին նախատեսվում է 85 վիդեո դասախոսություն:
2019 թվականին միայն 20 միլիոն դրամ նախատեսվել է դասագրքի տպագրության եւ 18 միլիոն դրամ՝ ուսումնական նյութերի ձեռքբերման համար: «ԵՊԲՀ-ում ուսումնական նյութերի թարմացումը բուհի ռազմավարության կարեւորագույն նպատակներից է եւ 103 ամբիոններին էլ հստակ հանձնարական է տրված այդ ուղղությամբ: Մինչեւ 2020 թվականը նախատեսվում է ամբողջովին թարմացնել գրադարանային ֆոնդը, ինչպես նաեւ նյութերի գերակշիռ տոկոսը դարձնել էլեկտրոնային եւ վիդեո դասախոսությունների ֆորմատով»,- վստահեցրեց Շուշան Դանիելյանը:

Լուսանկարում սեպտեմբերին ձեռք բերված դասագրքերն են: Դրանք, ըստ Շուշան Դանիելյանի, ամենավերջին սերնդի դասագրքեր են