Երկրում ստեղծված իրավիճակը շատերին հուշում էր, որ կարող էր մեկ այլ որոշում լինել. Արմեն Գեւորգյան

Ես կարծում եմ, որ երկրում ստեղծված իրավիճակը շատերին հուշում էր, որ կարող էր պոտենցիալ մեկ այլ որոշում լիներ:

Այս մասին քիչ առաջ լրագրողների հետ զրույցում ասաց ՀՀ ՔՕ մի շարք ծանր հոդվածներով մեղադրվող նախկին փոխվարչապետ Արմեն Գեւորգյանը՝ անդրադառնալով րոպեներ առաջ հրապարակված դատարանի որոշմանը:

Հիշեցնենք, որ ըստ այդ որոշման՝ Գեւորգյանը չկալանավորվեց՝ այդպիսով մերժելով նախաքննական մարմնի միջնորդությունը՝ նրան երկու ամսով կալանավորելու վերաբերյալ:

Գեւորգյանն ասաց, որ սա չի նշանակում, որ գործն ավարտվել է. «Մենք շարունակելու ենք աշխատել, մենք շարունակելու ենք ներկայացնել նաեւ մեր փաստարկներն ու մոտեցումները՝ հիմնավորելով մեր անմեղությունը եւ ներկայացված մեղադրանքների անհիմն լինելը:

Ես երկու օր է, ըստ էության, աշխատանքի վայրից բացակայում եմ, իմ գործատուն շատ վրդովված է այդ հանգամանքով, եթե դեմ չեք,  այնուամենայնիվ, ես գնամ աշխատանքի»,- ժպտալով ասաց Գեւորգյանը՝ հրաժարվելով պատասխանել լրագրողների հարցերին:

Վերջինս դատարանում երեկ հանդես է եկել հայտարարությամբ: Հարցին, թե մասնավորապես, ինչ հայտարարություն է նա արել, Գեւորգյանը պատասխանեց. «Ես փորձել եմ ներկայացնել իմ անցած ճանապարհը՝ ինչով եմ զբաղված եղել Հայաստանում վերջին 20 տարիներին՝ վերադառնալով Ռուսաստանից, ինչ սկզբունքներով եմ կազմակերպել իմ աշխատանքը պետական համակարգում, իմ կարծիքով՝ ինչ օգուտ բերած եմ եղել մեր պետությանը եւ խնդրել եմ դատարանին հաշվի առնել մի քանի հանգամանքներ, որոնք, ըստ ինձ, կալանավորման համար հիմք չպետք է հանդիսանան»:

Հարցին, թե Մարտի 1-ի արյունալի իրադարձությունների հետ ինչ առնչություն ունեք, ՀՀ նախկին փոխվարչապետը պատասխանեց, որ քննությունը բոլոր հանգամանքները կպարզի, ապա հիշեցրեց, որ Մարտի 1-ի գործով արդեն օրինական ուժի մեջ մտած դատավճիռներ կան: «Այդ դատավճիռներով արձանագրված է՝ ով ինչ մեղք է ունեցել Մարտի 1-ի հանգամանքներում»,- հավելեց Գեւորգյանը: Նա ասաց, որ իր համար նույնպես անակնկալ է եղել, երբ 4 ամիս հետո մեղադրանքը փոխվել է:«Հաշվի առնելով այն, որ օգոստոսի 3-ին, երբ այդ մեղադրանքը ներկայացվում էր արդեն մեկ շաբաթ առաջ սահմանադրական կարգի տապալման մասին, ըստ էության, մեղադրանքը ուրիշներին ներկայացված է եղել, ի՞նչ փոխվեց 4 ամսվա ընթացքում, ես չգիտեմ»,- նշեց նա:

Դիտարկմանը՝ դա նշանակում է, որ չկա՞ ճնշում դատարանների նկատմամբ, ինչպես Ռոբերտ Քոչարյանի պաշտպաններն են պնդում, Գեւորգյանն ասաց. «Իմ համար սպասելի էր հետեւյալը, որ երեկ դատական քննության ժամանակ բոլոր կողմերը հնարավորություն են ունեցել իրենց բոլոր փաստարկները ներկայացնելու, այդ իմաստով ես որեւէ կողմնակալություն չեմ տեսել: Քանի որ նիստը անցել է բավական անկաշկանդ, իրավական փաստարկները ներկայացնելու տեսակետից բոլոր հնարավորությունները կար, որ դատարանը պաշտպանական կողմի արգումենտները ընդուներ հիմք: Հիմա ինչով է կոնկրետ առաջնորդվել դատարանը՝ այս պահին չեմ կարող ասել: Մյուս կողմից՝ ես կարծում եմ, որ երկրում ստեղծված իրավիճակը շատերին հուշում էր, որ կարող էր պոտենցիալ մեկ այլ որոշում լիներ, հավատացեք, որ այս երկու-երեք օրվա ընթացքում բավական լարված քննարկումներ ու օրեր են անցել»,- եզրափակեց Գեւորգյանը: 

Հիշեցնենք, որ ՀՀ նախկին փոխվարչապետ Արմեն Գեւորգյանին մեղադրանք է առաջադրվել ՀՀ ՔՕ մի քանի հոդվածներով: Մասնավորապես՝ նա մեղադրվում է ՀՀ Քրեական օրենսգրքի 311 հոդվածի 4-րդ մասի 2-րդ կետով (պաշտոնատար անձի կողմից առանձնապես խոշոր չափերի կաշառք ստանալը), ՀՀ ՔՕ 190 հոդվածի 3-րդ մասի 1-ին կետով (փողերի լվացում, որը կատարվել է առանձնապես խոշոր չափերով) ՀՀ ՔՕ 38-300.1 հոդվածի 1-ին մասով (սահմանադրական կարգի տապալմանը օժանդակելը) եւ արդարադատության կայացմանը խոչընդոտելու համար: Նախաքննական մարմինը նրան կալանավորելու միջնորդություն է ներկայացրել դատարան, որն այսօր քննվում էր: