Պաշտոնյաները պարգեւատրվել են առանց չափորոշիչների. պատգամավորները լուծումներ են մտածում

Պարգեւավճարների շուրջ կրքերը չեն հանդարտվում: Թեման հունվարի 29-ին թեժացրեց ՊԵԿ նախագահ Դավիթ Անանյանը, երբ հայտարարեց, որ 8 ամսվա համար 14 մլն դրամ պարգեւավճար է ստացել: Ազգային ժողովի ԲՀԿ խմբակցության պատգամավոր Նաիրա Զոհրաբյանը ՀԺ-ի հետ զրույցում անդրադառնալով ստեղծված իրավիճակին՝ նշեց, թե ակնկալում է, որ «Իմ քայլը» խմբակցությունը եւ «Քաղաքացիական պայմանագիր» կուսակցությունը կփորձեն պատասխանել՝ հիմնավո՞ր են եղել այդ պարգեւավճարները, ինչ են արել այդ պարգեւավճարներին արժանանալու համար:

«Պարգեւավճարն ընդունված է, եթե մարդիկ 12 ամիս աշխատում են եւ ստանում են 13-րդ աշխատավարձ, բայց եթե աշխատում են օպերատիվ եւ քրտնաջան: Դրա դեմ սրեր ճոճել պետք չէ, բայց նման թվերը իսկապես մտահոգիչ են: Ես այս պահին գնահատական չեմ տա, քանի որ «Իմ քայլը» հանդիպումներ է կազմակերպում աստղաբաշխական պարգեւավճարներ ստացած կառույցների ղեկավարների հետ»:

Նաիրա Զոհրաբյանն ասաց, որ նման թվերով տրված եւ ստացված պարգեւավճարները կապ չունեն հեղափոխության գաղափարների հետ, քանի որ նրանք հեղափոխական շրջանում այլ թեզեր էին առաջ քաշում: «Նման թվերի ինքնապարգեւատրումները հասկանալի չեն: Մենք տեսնում ենք, որ խորհրդարանում գնում են խստագույն կրճատման, կրճատում են այն, ինչ հնարավոր է: Նույնիսկ մեր անհրաժեշտ գործիքները կրճատում են, բայց դա լուռ ընդունում ենք՝ հասկանալով, որ եթե պետք է կրճատել, ուրեմն պետք է կրճատել»:

Նաիրա Զոհրաբյանը մեր զրույցում ասաց, որ «Բարգավաճ Հայաստան» խմբակցությունն անհրաժեշտություն չի տեսնում լսել «յոթանիշ» թվերով պարգեատրված պաշտոնյաներին: Իրենց կբավարարեն նաեւ «Իմ քայլը» խմբակցության պարզաբանումները: «Դատելով իրենց մի քանի պատգամավորների արձագանքից, իրենք եւս այդտեղ մտահոգություններ տեսնում են, թե՛ ՊԵԿ ղեկավարի, թե՛ Երեւանի քաղաքապետի կատարած պարգեւատրումների մասով»:

Նաիրա Զոհրաբյանը չի կարծում, որ վարչապետը տեղյակ է եղել ՊԵԿ ղեկավարի եւ Երեւանի քաղաքապետարանի նման պարգեւատրումներից: Մեր զրույցում նա կարծիք հայտնեց, որ հեղափոխական իշխանությունը գործել է նախկինների ավանդույթներով: «Նախկինում ավելի այլանդակ ավանդույթներ են եղել: Նախկինում եղել է, որ քարտուղարուհին կամ օգնականը ստացել են 8-9 մլն դրամ պարգեւավճարներ: Նորերը մտածել են, որ իրենք նախկինների համեմատ շատ ավելի համեստ պարգեւավճարային օպերացիա են իրականացնում»,- ասաց Նաիրա Զոհրաբյանը եւ շեշտեց, որ պարգեւավճարների ընդհանուր եւ անհատական գումարների հրապարակումը չի կարող համարվել գաղտնի տեղեկատվություն:

6-րդ գումարման Ազգային ժողովի 105 պատգամավորների եւ աշխատակազմի ղեկավարի ու տեղակալների 2018 թվականի դեկտեմբեր ամսվա պարգեւավճարը կազմել է 154 հազար ԱՄՆ դոլար: ՀԺ-ն Նաիրա Զոհրաբյանից հետաքրքրվեց՝ արդյո՞ք սա էլ մեծ գումար չէ՝ հաշվի առնելով երկրում առկա աղքատության ցուցանիշը: «Ես չեմ հիշում, որ մենք ամեն տարի դեկտեմբերին ստանանք 13-րդ աշխատավարձ: Այս տարի ստացել ենք միայն մեկ անգամ՝ մեկ աշխատավարձի չափով, եթե չեմ սխալվում 400 հազար դրամի չափով, սա չի եղել 3 մլն, 10 մլն կամ 14 մլն դրամ: Պատգամավորները մեկ անգամ են ստացել, իսկ աշխատակազմը՝ մի քանի անգամ, բայց համեստ գումարներ, նման անտրամաբանական թվեր չեն եղել»:

«Լուսավոր Հայաստան» խմբակցության պատգամավոր Գեւորգ Գորգիսյանն էլ մեր զրույցում հայտարարեց, որ պարգեւավճարների հետ կապված իշխանություններին քննադատելու առիթ հասարկությունն ունի, քանի որ անհամաչափ մեծ գումար են ստացել՝ կատարելով անհամաչափ փոքր աշխատանք: «Դավիթ Անանյանի դեպքը վառ օրինակ է: Սա վատ սկիզբ է, որովհետեւ, եթե նախկինները դա արել են, չի նշանակում, որ դա պետք է ընդունելի լինի: Չի կարելի հիմա նույնը կրկնել, քանի որ քաղաքացիները փողոց դուրս չեն եկել, որ կրկնեն հների դերը»:

Գորգիսյանը նշեց, որ այդ գումարները պետբյուջե վերադարձնելու մեխանիզմներ չկան, բայց, քանի որ այդ անձինք զբաղեցնում են քաղաքական պաշտոններ՝ պետք է քաղաքական պատասխանատվության ենթարկվեն: «Դա կարող է լինել անգամ պաշտոնից հեռացում, կամ գոնե վարչապետի կողմից նկատողություն: Դա տեղին կլինի, մի քիչ էլ ուշանում է»:

«Հայկական ժամանակ»-ը Գեւորգ Գորգիսյանից հետաքրքրվեց, թե ինչո՞ւ է խորհրդարանական ընդդիմությունն անտարբեր ինքնապարգեւատրվածներին լսելու հարցում: Մասնվորապես, հունվարի 29-ին ՊԵԿ նախագահից պարզաբանումներ պահանջել է միայն «Իմ քայլը» իշխող խմբակցությունը: Սակայն հանդիպումից լրագրողներին մանրամասն պարզաբանում չի տրվել: «Մենք սպասում ենք նրանց պատասխանին, որովհետեւ բացահայտումը կա եւ հիմա գնդակը մեծամասնության դաշտում է, նրանք պետք է որոշեն, թե ինչ անեն նման պաշտոնյաների հետ: Իրենք պետք է ցույց տան՝ ինչն է իրենց համար ընդունելի, ինչը՝ ոչ, հասարակությունն էլ է սրան սպասում»,- ասաց Գորգիսյանը:

Իշխանական «Իմ քայլը» խմբակցության պատգամավոր Սիսակ Գաբրիելյանը եւս կարծում է, որ պետք է հստակ հիմնավորվի պարգեւավճարների ինստիտուտը: Պատգամավորը միաժամանակ ուշադրություն է հրավիրում այն հանգամանքի վրա, որ առաջին անգամ խորհրդարանական մակարդակով կառավարությանն առընթեր կառույցի ղեկավարը հրավիրվում է բացատրություններ տալու: «Եթե կա հասարակության դժգոհությունը, ուրեմն այդ ոլորտում մի բան այն չէ: Ես շարունակում եմ մնալ նույն կարծիքին: Այդ քննարկումները շարունակական են լինելու, առաջիկայում այլ պաշտոնյաների հետ հանդիպումներ են նախատեսվում, որպեսզի խնդիրը մանրամասն հասկանանք»:

Սիսակ Գաբրիելյանը միաժամանակ նշեց, որ պետական համակարգի աշխատակիցներին պարգեւավճարներ տալն անհրաժեշտ է: «Եթե այդ պարգեւավճարները տրվում են նրա համար, որ պաշտոնյաներն ունեն հսկայական վարչարարություն եւ կարող են դրա արդյունքում ներգրավվել կոռուպցիոն սխեմաների մեջ, պարգեւատրումները կարող են զսպող մեխանիզմ լինել: Ես չեմ փոխել իմ տեսակետը, որ հասարակությունը ճիշտ էր՝ կարելի էր ձեր նշած ոչ թե 14 միլիոն դրամով, այլ 5 միլիոն դրամով զերծ մնալ կոռուպցիայից»:

Սիսակ Գաբրիելյանը նշեց, որ այս քննարկումների արդյունքներն առաջիկայում տեսանելի կլինեն եւ որեւէ անհիմն պարգեւատրում ծածկադմբոց չի լինելու: «Ամբողջացնելով այդ պատկերը՝ միգուցե լինեն քննադատական հայտարարություններ, միգուցե լինեն գործնական քայլեր՝ օրենսդրական մակարդակով: Միգուցե գանք այն եզրահանգմանը, որ պետք է պարգեւավճարների չափն օրենքով նվազեցվի:

«Իմ քայլ»-ից մեկ այլ պատգամավորի՝ Հայկ Գեւորգյանին էլ անհանգստացնում է այն հարցը, թե արդյո՞ք այդ գումարները, որ ստացել է ՊԵԿ ղեկավարը, շատ է, թե՝ քիչ: «Չկան չափորոշիչներ, թե ինչպես են գնահատվում պաշտոնյայի աշխատանքը, արժանի՞ էր այդ պարգեւավճարին, արժանի՞ չէ: Այդ պաշտոնատար անձն ասում է, որ արժանի է, քանի որ արդյունքներ է ապահովել՝ պետական բյուջեի մուտքերի մասով: Ամբողջ խնդիրը ծագել է չափորոշիչների բացակայության պատճառով: Կարող եմ հավաստիացնել, որ նախկինում շատ ավելի բարձր է եղել, ինչպես նաեւ փակ, գաղտնի ու ծրարներով: Այն ժամանակ, սակայն, այդպիսի աղմուկ չի եղել»:

Հայկ Գեւորգյանն ընդգծում է, որ առաջիկայում պարգեւավճարների մասին տեղեկատվությունը փակ չի լինելու: Ավելին՝ տեղեկատվությունն ավելի մանրամասնվելու է, որպեսզի բոլորն իմանա, թե պաշտոնյան ո՛ր եռամսյակում որքան պարգեւավճար ստացավ: Գեւորգյանը միաժամանակ կարծում է, որ պարգեւավճարների շուրջ բարձրացված աղմուկն ավելի շատ արհեստական է, քան՝ բնական: «Բնականն այն է, որ մարդիկ իմացան, որ այսպիսի պարգեւավճարներ կան, որոնք շատ ավելի մեծ են եղել, ավելի անհամարժեք են եղել, բայց այն ժամանակ աղմուկ չկար ու հիմա այսպիսի աղմուկ կա: Շատ բնական է, որ հասարակությանը սա հետաքրքրում է: Ակնհայտորեն կա նաեւ աղմուկի արհեստական մասը: Ինչ-որ մարդկանց մի խումբ՝ հայտնի աղբյուրներից սնվող, առավոտից արթնանում են ու սկսում են դրա մասին գրել: Տեսնում են, որ քննարկում ենք, լուծումներ ենք փնտրում, բայց դրա մասին օրը 20 անգամ գրելու իմաստը չկա»:

Անդրադառնալով այն հանգամանքին, որ այս պահին պարգեւատրման չափորոշիչներ չկան, սակայն Դավիթ Անանյանը իրեն պարգեւատրել է 14 մլն դրամով, Հայկ Գեւորգյանից հետաքրքրվեցինք՝ արդյո՞ք նա այս ամիսներին այդքան գումարի համապատասխան աշխատանք կատարել է: «Ես չեմ ուզի անձերի մասին խոսել, բայց ցանկացած պարագայում ամեն ինչ հանրության համար պետք է լինի ընկալելի, չափերի ու ծավալների մեջ: Իմ կարծիքով պաշտոնյաներից ամենաբարձր աշխատավարձը պետք է ստանա վարչապետը: Ամենաշատ որոշումներ կայացնելու պատասխանատվությունը նրա վրա է եւ պետք է չափորոշիչ սահմանվի, որ վարչապետից ավել ոչ մեկ բարձր աշխատավարձ չստանա, սա օրինակ է»:

Դիտարկումը, որ վարչապետը, Երեւանի քաղաքապետը հրաժարվել են ինքնապարգեւատրվելուց՝ այսպիսով ընդգծելով, որ իրենք հեղափոխության արժեքների կրող են, իսկ Դավիթ Անանյանը, որ հեղափոխությունից հետո պարզապես պաշտոն է ստանձնել, իր քայլով ընդգծում է, որ հեղափոխության արժեքների հետ աղերս չունի, Հայկ Գեւորգյանը հրաժարվեց մեկնաբանել: «Թույլ տվեք այս հարցը թողնել առանց պատասխանի»,- ասաց նա:

«Հայկական Ժամանակ»-ը Telegram-ում
Տպել
3251 դիտում

Սա դասական քաղաքական կացինություն է. Չախոյանը՝ 80-ականների զենքերի հուսալիության շուրջ Քոչարյանի պնդման մասին

Երկրաշարժ Հայաստան-Վրաստան սահմանին. ցնցումները զգացվել են ՀՀ տարածքում

Գիտե՞ն հեղինակները, որ իմպիչմենտը ձախողելու է, միանշանակ՝ այո. Հակոբյանը նշել է՝ ինչի համար է այն կազմակերպվել

Մեզ չի վիճակվել նորմալ ընդդիմություն ունենալ, նրանց գործողությունները նվեր են իշխանություններին. Մինասյան

Մոսկվան վրեժ է լուծում. Շահրամանյանն է ԼՂ նախկին ղեկավարությանը հանձնել Բաքվին ու եկել ՀՀ. Շիրինյան. տեսանյութ

Երևանում կառուցվող էլիտար շենքի 6-րդ հարկից շինարարն ընկել ու մահացել է

Փաշինյանը և Միխալն ամփոփել են քննարկումների արդյունքները և պատասխանել ԶԼՄ-ների հարցերին. ամբողջական

Հունվարից մինչ օրս քանի քաղաքացի է ստացել սոցիալական կրեդիտ և որքան է գումարը. վարչապետը թվեր է հրապարակել

Դավիթ Դանիելյանն այցելել է Կոռնիձոր, Խնածախ և Տեղ գյուղերի մանկապարտեզներ և դպրոց. տեսանյութ

Ինչու է աղաղակում Արա Աբրահամյանը. ինչ պատվեր է կատարում ռուսական խոսափողը. տեսանյութ

Հայ լուսանկարչի նկարները 1 շաբաթ ներկայացվելու են ՄԱԿ-ի կենսաբազմազանության կոնվենցիայի պաշտոնական էջում

Քաոս Եվրոպայի մի մասում. էլեկտրաէներգիայի զանգվածային անջատումներ են եվրոպական 4 երկրում

Համատեղ ջանքերի միջոցով կարող ենք ավելի խորացնել առկա փոխգործակցությունը. Փաշինյանը՝ Էստոնիայի վարչապետին

Դուք ընտրել եք ճանապարհ, որ նշանակում է ավելի սերտ հարաբերություններ ԵՄ-ի հետ. Էստոնիայի վարչապետը՝ Փաշինյանին

Ռուսաստանի հետ մեր հարաբերությունները լարելու կամ խզելու մտադրություն չունենք. ՀՀ վարչապետ

ԵՄ-ի հետ վիզաների ազատականացումից մինչև տարածաշրջանի խաղաղության գործընթաց. ինչ են քննարկել Փաշինյանը և Միխալը

Վրաստանի նախագահ Միխայիլ Կավելաշվիլին ժամանել է Հայաստան

Հարբած վարորդը, իմանալով, որ զրկվում է վարորդական վկայականից, հարվածել է պարեկի դեմքին, քաշքշել մյուսներին

Քիմ Քարդաշյանին «կողոպտիչ պապիկներ»-ի գործով Փարիզի դատարան են կանչել

Դանակով զինված քաղաքացին հարձակվել է կանչի մեկնած բուժաշխատողների վրա. տուժել է վարորդը

Դոհայից, Մինսկից և Դուբայից Երևան են ժամանել օտարերկրացիներ, որոնք այլ երկրներում հետախուզվում են

Երևանում 36-ամյա վարորդը մեքենայով բախվել է բազալտե եզրաքարին, ապա՝ ծառին

Տեղի է ունենում Հայաստանի և Էստոնիայի վարչապետների առանձնազրույցը

Վաշինգտոնում շարունակվում են ՀՀ ֆինանսների նախարարության և ԿԲ պատվիրակությունների հանդիպումները

Վարչապետը ծանոթացել է Էստոնիայի թվայնացման և էլեկտրոնային կառավարման կառուցվածքին. լուսանկարներ, տեսանյութ

Մեր ընտանիք քնքշություն եկավ. ծնվել է Շուշաննա Թովմասյանի երրորդ բալիկը

Պապոյանն ու Խուդաթյանն աշխատանքային այց են կատարել «Զանգեզուրի պղնձամոլիբդենային կոմբինատ». լուսանկարներ

Չհայտարարագրված և մաքսային հսկողությունից թաքցված դեղորայք, դիզվառելիք, ծխախոտ. ի՞նչ է հայտնաբերվել 1 շաբաթում

Հայտնաբերվել է 395 ոչ սթափ վարորդ․ պարեկների մեկշաբաթյա ծառայության արդյունքները

ՀՀ վարչապետն ու Էստոնիայի ԱԳ նախարարն անդրադարձել են Հարավային Կովկասում տեղի ունեցող զարգացումներին

Մշակման փուլում է գտնվում խտրականությունից պաշտպանության ոլորտում համապարփակ ռազմավարական փաստաթուղթը. Գալյան

Հայտնի է՝ ինչ փաստաթղթեր են ստորագրել Իրանն ու Ադրբեջանը

Այս շաբաթը ծայրաստիճան կարևոր է ուկրաինական ճգնաժամի կարգավորման համար. Ռուբիո

Ucom-ը ներկայացավ Երևանում կայացած Career City Fest-ին՝ կիսվելով արժեքներով և կարիերայի հնարավորություններով

Ես այս կյանքը քեզ կտամ. Անդրեի նախկին կինը սկանդալային դեպքերից հետո նոր լուսանկար է հրապարակել

Լավրովը թվարկել է ուկրաինական հակամարտության կարգավորման ռուսական պայմանները

Արթուր Դավթյանը՝ մարմնամարզության աշխարհի գավաթի 6-րդ փուլի ոսկե մեդալակիր

Սյունիքում ԱԱԾ սահմանապահ զորքերի զինծառայողի մահվան դեպքի առթիվ քրեական վարույթ է նախաձեռնվել

Վատիկանը փակել է Սիքստինյան կապելլան՝ պատրաստվելով կոնկլավին. հայտնի է Հռոմի նոր պապի ընտրության օրը

Երևանում տղամարդը լվացք փռելիս 5-րդ հարկից անզգուշաբար վայր է ընկել