Ըմբիշ Միհրան Հարությունյանը կարծում է, որ իրեն չեն ցանկանում տեսնել ՀՀ հավաքականում

Օլիմպիական փոխչեմպիոն, հունահռոմեական ոճի ըմբիշ Միհրան Հարությունյանը չգիտի՝ ինչպես է դասավորվելու իր ապագան ՀՀ հավաքականում: Այն, որ հանդես է գալիս խառը մենամարտերում չի նշանակում, որ ըմբշամարտը մոռացել է: Ցանկանում է ընտրանու հետ լինել, ՀՀ-ն ներկայացնել միջազգային ասպարեզում, սակայն չգիտի՝ որքանով են իրեն սպասում հավաքականում: «Հայկական ժամանակ»-ի հետ զրույցում մարզիկը խոսեց թեմայի մասին: Հարցին՝ արդյոք մտածում է, որ իրեն այնտեղ չեն ցանկանում տեսնել, դրական պատասխան տվեց:

«Կարծում եմ, այո՛: Միշտ այդպես է եղել, այդպես է եղել նաեւ օլիմպիական խաղերից առաջ եւ հետո: Ինձ համար դա այդքան էլ կարեւոր չէ, ուրիշ բան չեմ էլ սպասել: Ամենավատն այն է, որ մարդիկ, որոնք, այսպես ասեմ, դիմակներ են հագել, ցանկանում են հարազատ, մտերին երեւալ, քո առաջ մի բան են ասում, մեջքիդ հետեւում՝ այլ բան: Դա էլ նորմալ է: Ինձ ոչինչ չի զարմացնում: Այնպես չէ, որ հիացած եմ եղել, որ հետո էլ հիասթափվեի: Ամեն ինչ նորմալ է»,- ասաց նա:

Մարզիկը կոնկրետ մարդկանց անուններ չի տալիս, որոնք կարող էին դեմ լինել իրեն: Նշում է, որ չգիտի: Տարիների ընթացքում նրա հետ կապված միակ հայտնի տարաձայնությունը, որը քիչ թե շատ քննարկվել է տարբեր շրջանակներում, կապվում է հավաքականի գլխավոր մարզիչ Լեւոն Ջուլֆալակյանի անվան հետ: Տարիներ առաջ, երբ Հարությունյանը նոր էր ՀՀ հավաքական տեղափոխվել, խոսակցություններ էին պտտվում, թե նրանց միջեւ խնդիրներ կան: Սա, սակայն, մարզիկն իրական խնդիր չի համարում: Նշում է, որ ավելի շատ գուցե ուրիշներն են փորձել լարվածություն ստեղծել իր ու մարզչի միջեւ:

«Փաստացի նրա հետ երբեք խնդիր չեմ ունեցել: Այլ հարց է, որ գուցե ինչ-որ մեկը փորձել է իմ ու նրա միջեւ ինչ-որ անհասկանալի իրավիճակներ ստեղծել: Ես էլ, նա էլ դա շատ լավ գիտենք, ուղղակի... հասկանալի է՝ գուցե ես խանգարել եմ, այդ քաշային կարգում Արամ Ջուլֆալակյանն էր հանդես գալիս (խմբ. Լեւոն Ջուլֆալակյանի որդին), բայց սա սպորտ է: Ես այն ժամանակ էլ եմ ասել, հիմա էլ եմ ասում՝ եթե նա ավելի ուժեղ լիներ.... Լեւոն Ջուլֆալակյանն ինձ հետ որպես մարզիկի սոլիդար է եղել: Եթե ես լավագույնն եմ այդ քաշային կարգում, ուրեմն բոլոր հարցերը հանված են: Եթե հավասար լինեի ինչ-որ մեկի հետ, գիտեմ՝ ուրիշն իմ տեղը կգնար մրցումների: Թող ինչ-որ մեկն ինձ հաղթի, ինքս կգնամ, մեջ չեմ ընկնի: Հիմա էլ մեջ չեմ ընկնում: Չեմ ուզում ինքնվստահ երեւալ, ուղղակի դրանից չես փախչի. առաջիկա մի քանի տարիների համար ոչ մի մրցակցի կողմից սպառնալիք չեմ տեսնում: Այլ հարց է, եթե դա ստեղծում կամ ներկայացնում են այդպես»,- ասաց նա:

Հարությունյանը հավաքականում չէ Ռիո 2016-ից հետո: Տեւական ժամանակ ապաքինվում էր վնասվածքից: Ապա 2018-ի մայիսին նորամուտը նշեց խառը մենամարտերում: Լեւոն Ջուլֆալակյանն ասել է՝ ինչ պայմաններով նա կարող է լինել հավաքականում: ՀԺ-ի հետ զրույցում մարզիչը նշել է, որ նա պետք է մասնակցի ընտրանու նախատեսված բոլոր մրցումներին՝ սկսած ՀՀ առաջնությունից: ՀՀ առաջնությանը մասնակցելու վերաբերյալ Հարությունյանին նույնպես տարբեր մարդիկ տարբեր զրույցների ժամանակ ասել են:

«Հիմա ինձ ասում են՝ մասնակցիր ՀՀ առաջնությանը: Եթե այն ընդհանրապես անցկացվի, լավ: Ամեն ինչ հասկանում եմ: Բոլորն ասում են՝ պետք է արդար լինի: Արդար չի՞ լինի, եթե մենք ՀՀ չեմպիոնի հետ մեկնենք միջազգային մրցաշարի եւ պարզենք՝ ով է ավելի լավը: Եթե սկզբունքն այն է, որ մասնակցեմ ՀՀ առաջնությանն ու ավելորդ անգամ քաշ գցեմ, կանեմ դա, կհաղթեմ ՀՀ առաջնությունում, բայց որքա՞ն է դրա օգտակար գործողության գործակիցը: Որ ինձ ասե՞ն՝ դու ՀՀ չեմպիոն ես, կարող ես գնալ մրցումների: Նրանք առանց այդ էլ գիտեն: Ուրեմն թույլ տվեք ինձ անել դա միջազգային մրցաշարում: Մեր առաջատարներից եղել են, որ տարիներ շարունակ չեն մասնակցել ՀՀ առաջնությանը, թեեւ բոլորն իմացել են, որ մասնակցելու դեպքում նրանք ամենայն հավանականությամբ կպարտվեին: Նրանք մեկնել են մրցաշարերի: Ստացվո՞ւմ է՝ դա միայն ինձ է վերաբերում»,- ասաց նա:

Հարությունյանը նշում է, որ մի քանի անգամ ինքն է փորձել հասկանալ՝ ինչ կարելի է անել: Եկել խոսել է: Հանդիպումներ է ունեցել: Դրանցից մեկը եղել է Հայաստանի ազգային օլիմպիական կոմիտեի նախագահ Գագիկ Ծառուկյանի հետ: Այդ մասին նաեւ սոցցանցերում էր հայտնել: Նրա հետ զրուցել է վերադառնալու մասին:

«Շփվել եմ Գագիկ Ծառուկյանի հետ անցած անգամ, երբ եկել էի: Շփվել եմ ֆեդերացիայի նախագահի հետ: Ինձ ասում են, որ ուզում են, բայց մյուսներից դա չեմ տեսնում, անկեղծ ասած: Ֆեդերացիայի նախագահի հետ խոսել եմ աշխարհի առաջնությունից առաջ (խմբ. 2018 թ. ԱԱ-ն կայացել է հոկտեմբերին): Երբ ցանկանում էի մասնակցել, ինձ ասացին, որ 66 կգ քաշային կարգում (խմբ. հիմա այս քաշային կարգը փոխվել է 67 կգ-ի) ՀՀ առաջնություն է եղել, չեմպիոն կա, ճիշտ չի լինի: Ասացի՝ 72 կգ-ում կարող եմ, ասացին՝ այնտեղ էլ չեմպիոն կա, թեեւ հետո ԱԱ-ում այդ քաշային կարգում ոչ մեկ հանդես չեկավ»,- ասաց նա:

Հիմա Հարությունյանը կրկին Հայաստանում է: Այս այցի ընթացքում, սակայն, որեւէ մեկի հետ շփվելու մեծ ցանկություն չունի: Ընդգծում է, որ ավելորդ հպարտություն չունի, սակայն որքան կարելի է: Ծառուկյանի միջամտությանն էլ չի սպասում: Նշում է, որ նա զբաղված մարդ է, որին հաճախ սխալ տեղեկատություն են տալիս, իրականությունը մատուցում են այնպես, ինչիպես իրենց է հարմար, ինչից էլ նրա մոտ սխալ տպավորություն է ստեղծվում իրավիճակի վերաբեյալ:

«Նրան ուղղակի իրականությունը ներկայացնում են այլ կերպ, ոչ այնպես, ինչպես կա: Նրան ասել են, որ ես չեմ մարզվում, ասել են, որ չեմ ցանկանում մասնակցել: Դա ես հասկանցել եմ մեր անձնական խոսակցության ժամանակ: Չգիտեմ՝ ով է այդպես ասել: Մի հարցազրույց գտեք, որ ասել եմ, որ չեմ ցանկանում մասնակցել: Միայն օլիմպիական խաղերի եզրափակչից հետո, բայց այն ամենից հետո, ինչ տեսա, երբ վերադարձա այստեղ, ասացի, որ պատրաստ չեմ հիասթափեցնել մարդկանց: Դրանից հետո թող որեւէ մեկը գտնի մի տեղ, որտեղ ասել եմ, որ չեմ ցանկանում մասնակցել»,- ասաց նա:

Այն պահից, երբ հայտնի դարձավ, որ Հարությունյանը պատրաստվում է իրեն փորձել խառը մենամարտերում, ինչպես նաեւ նոր մարզաձեւում նորամուտը նշելուց հետո նա մշտապես ասել է, որ ըմբշամարտը չի ուզում թողնել: Միշտ բարձրաձայնել է համատեղելու նպատակի մասին: Նա դա ցանկանում է անել հանուն ընտանիքի ու հայրենակիցների:

«Ուղղակի ցանկանում եմ ելույթ ունենալ: Օլիմպիական խաղերից հետո ինձ գումարներ չեն վճարել մինչեւ հիմա: Ոչ մեկից ոչինչ չեմ ստացել, հիմա էլ չունեմ, չի էլ լինելու, գիտեմ, միայն խոսակցություններ են, բայց դա ցանկանում եմ անել իմ ժողովրդի, ազգի, իմ ընտանիքի համար: Ինձ ոչինչ չի զարմացնում, ոչ այդ մեդալները, ոչ էլ այլ բան, արդեն այդքան էլ կարեւոր չեն ինձ համար, բայց դա կարեւոր է ժողովրդի համար, որովհետեւ մինչեւ հիմա հիշում են: Եթե ինձ մարդկային ձեւով հնարավորություն տան, գիտեմ, որ ողջ ուժերս կներդնեմ.... կամ էլ նրանք հերթական անգամ ամեն ինչ կփչացնեն»,- ասաց նա՝ ավելացնելով, որ հնչող կասկածները, թե ինչպես է կարողանալու համատեղել մարզաձեւերը, պարզապես թուլամորթների խոսակցություններ են:

Հարությունյանն օլիմպիական արծաթեմեդալակիր է դարձել 66 կգ քաշային կարգում: Դրանից հետո քաշային կարգերում փոփոխություններ են եղել: Վերադառնալու դեպքում էլ ցանկանում է անպայման այնպիսի քաշային կարգում հանդես գալ, որն օլիմպիական կլինի: Այժմ խառը մենամարտերում ելույթ է ունենում մոտավորապես 65-66 կգ քաշով:

«Ոչ օլիմպիականում հանդես գալն իմաստ չունի: Օլիմպիական են 67 եւ 77 կգ քաշային կարգերը, որքան գիտեմ: 77 կգ-ն ինձ համար շատ է: 67-ը նորմալ է»,- ասաց նա:

Ըմբշամարտի հետ կապված Միհրան Հարությունյանի մոտ անորոշություն է, սակայն MMA-ի հարցում առաջ է շարժվում: Հաջորդ մենամարտը նախատեսում է անցկացնել ոչ ավելի ուշ, քան 3 ամսից: Մրցակիցը դեռ հայտնի չէ: Ավելի վաղ «Битва на Волге» կազմակերպությունից նրան տիտղոսային մրցաշար են առաջարկել, բայց ինչ-ինչ պատճառներով չի կարողացել պատրաստվել մարտ ամսի մենամարտին ու բայց է թողել առաջարկը: