Սեդրակ Քոչարյանի գործով երկու բողոք է ներկայացվել, որոնցից մեկը՝ դատարան. ցանկանում են, որ Վանեցյանը ճնշում չգործադրի

Ռոբերտ Քոչարյանի ավագ որդու՝ Սեդրակ Քոչարյանի գործով երկու բողոք է ներկայացվել մեկը՝ Երեւան քաղաքի ընդհանուր իրավասության դատարան, մյուսը՝ ՀՀ գլխավոր դատախազ Արթուր Դավթյանին:

Երկու բողոքներն էլ վերաբերում են ՀՀ ազգային անվտանգության ծառայության կողմից օրեր առաջ տարածած հաղորդագրությանը՝ Սեդրակ Քոչարյանի մեղադրանքի վերաբերյալ: Սեդրակ Քոչարյանին մեղադրանք է առաջադրվել ՀՀ քրեական օրենսգրքի 38-205-րդ հոդվածի 2-րդ մասով եւ 190-րդ հոդվածի 3-րդ մասի 1-ին կետով՝ առանձնապես խոշոր չափերով հարկ չվճարելը կազմակերպելու եւ առանձնապես խոշոր չափերով հանցավոր ճանապարհով ստացված եկամուտներն օրինականացնելու համար (փողերի լվացում):

Առաջադրված մեղադրանքում Քոչարյանն իրեն մեղավոր չի ճանաչել եւ հրաժարվել է ցուցմունք տալուց:

ԱԱԾ-ի տարածած հաղորդագրությունից հետո պաշտպանական կողմը հայտարարեց կառույցին դատի տալու մասին՝ նշելով, որ իր հաղորդագրությամբ ԱԱԾ-ն խախտել է Քոչարյանի անմեղության կանխավարկածը:

Նրա պաշտպան Հայկ Ալումյանի հետ զրույցը ստորեւ.

- Պարոն Ալումյան, առաջին ատյանի դատրանից բողոքով ի՞նչ եք պահանջում:

- Պահանջում ենք՝ ճանաչվի, որ այս գործողություններով (հաղորդագրությունով) խախտվում են Սեդրակ Քոչարյանի իրավունքներն ու ազատությունները, մասնավորապես անմեղության կանխավարկածը, պարտավորեցվի այդ մարմնին հերքել հաղորդագրության մեջ առկա  տեղեկատվությունը եւ ներողություն խնդրել Սեդրակ Քոչարյանից:

- Բողոքը վարույթ ընդուվե՞լ է, ձեզ նման տեղեկություն հայտնի՞ է:

- Դեռ ոչ մի պատասխան դատարանից չեմ ստացել, բայց բողոքը վարույթ չընդունելու որեւէ շանս ես չեմ տեսնում:

- Անմեղության կանխավարկածի խախտման վերաբերյալ ձեր հայտարարությունից հետո ԱԱԾ տնօրեն Արթուր Վանեցյանը լրագրողների հետ զրույցում ասաց, որ Սեդրակ Քոչարյանի հետ կապված անմեղության կանխավարկած չի խախտվել, ըստ նրա՝ ներկայացված հաղորդագրության մեջ նշված են այն հանգամանքները, որոնք հիմք են տվել հարուցել գործ եւ մեղադրանք առաջադրել: Սա ինչպե՞ս կմեկնաբանեք:

- Ոչ, ես պարոն Վանեցյանի գնահատականների հետ համամիտ չեմ, բայց երկու կողմեր ենք, թող դատարանը որոշի՝ մենք ենք ճիշտ, թե՝ պարոն Վանեցյանը: Մենք շատ կուզեինք, որ պարոն Վանեցյանը հերթական անգամ ճնշումներ չգործադրեր դատարանի նկատմամբ, թե չէ մնացած առումներով նորմալ ընթացակարգ է, ինքը մի կարծիքի է, մենք էլ՝ ուրիշ կարծիքի:

- Հերթական անգամ ճնշում գործադրել ասելով նկատի ունեք ԱԱԾ տնօրենի եւ ՀՔԾ պետի հեռախոսային խոսակցություննե՞րը:

- Այո: Դա, իհարկե, շատ վաղուց եկող պրակտիկա է, այնպես չի, որ պարոն Վանեցյանից է սկսվել, դա չէի ուզի, որ այդպես ընկալվեր. պարոն Վանեցյանի պարագայում բոլորս գիտենք խոսակցության բովանդակությունը: Երկու վիճող կողմեր կան, շատ նորմալ է, որ տարբեր կարծիքներ կան, մնում է, որ այն դատարանը, որը պետք է մեր վեճը քննի, պարոն Վանեցյանից շատ չվախենա, մնացածը ես համոզված եմ, որ մենք կշահենք:

- Ասացիք, որ երկրորդ բողոք էլ եք ներկայացրել, ավելի մանրամասն կներկայացնե՞ք: 

- Գլխավոր դատախազին ենք բողոք ներկայացրել: Ճիշտ նույն բողոքն է, ինչ ներկայացրել ենք դատարանում, որովհետեւ ե՛ւ դատարանը իրավունք ունի իրավունքի խախտումը ճանաչել ե՛ւ նաեւ դատախազը չէ՞, որ ինքն էլ հսկողություն է իրականացնում քննության նկատմամբ, իսկ հաղորդագրությունը տարածվել է քննություն իրականացնող մարմնի անունից, հետեւաբար մենք գտել ենք, որ իրավասություն ունի նաեւ գլխավոր դատախազը:

- Դատախազությունից բողոքի պատասխան ստացե՞լ եք:

- Ոչ, դեռ պատասխան չենք ստացել:

- Պարոն Ալումյան, իսկ Սեդրակ Քոչարյանի վերաբերյալ քննվող քրեական գործն ի՞նչ ընթացքի մեջ է, Արթուր Վանեցյանն ասաց՝ ծավալուն օպերատիվ- քննչական գործողություններ են կատարվում:

- Երբ այդ գործողություններից ինչ-որ մի մաս կներկայացվի մեզ եւ հանրությանը, մենք մեր գնահատականները ըստ այդմ կտանք, բայց հիմա մեզ ոչինչ հայտնի չէ, բացի այդ մշուշոտ ակնարկներից, որոնք հավանաբար նախատեսված են, որ էլ ավելի վախենանք այդ կառույցի հնարավոր հետագա գործողություններից:

- Պարոն Ալումյան, իսկ Սեդրակ Քոչարյանի մասնակցութամբ ի՞նչ քննչական գործողություն է կատարվել, մասնավորապես, առերեսում կատարվե՞լ է:

- Որոշ գործողություններ արվել են, որոնց չէի ցանկանա անդրադառնալ, որովհետեւ ինչ-որ ես կասեմ, դրանից անխուսափելիորեն հարցեր են առաջանալու եւ այդ ամեն ինչը կապված է նախաքննական գաղտնիքի հետ:

- Բայց կարո՞ղ եք ասել՝ առերեսում կատարվե՞լ է, թե՝ ոչ:

- Այո մեկ անգամ արվել է, բայց ում հետ, չեմ կարող ասել:

Հիշեցնենք, ԱԱԾ-ն օրեր առաջ հաղորդագրություն էր տարածել՝ տեղեկացնելով, որ ԱԱԾ-ն իր գործառույթների իրակա­նաց­ման շրջանակներում միջազգային իրավունքի եւ ներպետական օրենսդրության նորմերի հիման վրա հետևողական պայ­քար մղելով տնտեսական անվտանգության դեմ ուղղված հանցավորության հետ, Քննչական դեպարտամենտում քննվող քրեական գործի շրջանակներում իրականացված լայնածավալ քննչական գործողությունների եւ օպերատիվ-հետախուզական միջոցառումների արդյունքում բացահայտել է առանձնապես խոշոր չափերով հարկեր չվճարելու եւ հանցավոր ճանապարհով ձեռք բերված եկամուտներն օրինականացնելու հանցադեպեր, որոնց կազմակերպման հետ անմիջական առնչություն է ունեցել Ռոբերտ Քոչարյանի որդին՝ Սեդրակ Քոչարյանը։ Ըստ հաղորդագրության՝ երրորդ անձի կողմից տնտեսվարող սուբյեկտներից մեկում ներդրած, դեռեւս ծագման առումով առանձին իրավական գնահատականի արժանի 5.300.000 ԱՄՆ դոլարն անհատույց ստանալու նպատակով, Սեդրակ Քոչարյանը ձեռնամուխ է եղել շինծու գործարքներով այդ գումարն իր հիմնադրած ընկերության անվամբ ձեւակերպելուն եւ դրա միջոցով ստանալուն։ Դրանից բխող հարկային պարտավորությունները կատարելուց, վերջինս վերոհիշյալ ՍՊԸ տնօրենին հանձնարարել է կնքել 2 հատ շինծու անհատույց փոխառության պայմանագրեր եւ դրանց տալ նաեւ հաշվապահական ձևակերպում, ինչի հետեւանքով ի վերջո 5.300.000 ԱՄՆ դոլարը փոխանցվել է Սեդրակ Քոչարյանի անձնական հաշվեհամարին՝ իբրեւ տված փոխառության վերադարձ:

Տպել
3455 դիտում

Ինչու են վաղը փակվելու դատարանների մուտքերը եւ ինչպիսին է լինելու ընթացքը. վարչապետը մանրամասնում է (տեսանյութ)

Արմավիրում Opel-ը բախվել է կայանված Nissan-ին, վերջինն էլ վրաերթի է ենթարկել 3 հոգու

Գիզայի պայթյունից նախնական տվյալով ՀՀ քաղաքացիներ չեն տուժել. ԱԳՆ

Վաղը 08.30-ից արգելափակում ենք հանրապետության բոլոր դատարանների ելքերն ու մուտքերը. վարչապետ

13-ամյա աղջկա հղիությանն առնչվող տեսանյութը հեռացվել է ամբողջությամբ. ՄԻՊ

Ժամը 12.00-ին կհայտարարեմ Հայկական հեղափոխության՝ երկրորդ, ամենակարեւոր փուլի մեկնարկը. վարչապետ

ՀՀ վարչապետը վաղը կարեւոր հայտարարություն է անելու դատաիրավական համակարգի վերաբերյալ

Ուկրաինայի նախագահի երդմնակալությանը կմասնակցի Տիգրան Ավինյանի գլխավորած պատվիրակությունը

Օպերայի եւ բալետի թատրոնում ռումբի մասին ահազանգը կեղծ է եղել. մարդկանց տարհանել են, տեղազննում իրականացրել

Ջերմաստիճանը 4-5 աստիճանով կնվազի, առաջիկա օրերին անձրեւներ են սպասվում

Նախարար Բաթոյանն անդրադարձել է 13-ամյա երեխայի հղիությանն ու կոչ արել այլեւս չտարածել տեսանյութը

Օպերայի և բալետի ազգային ակադեմիական թատրոնի շենքում ռումբի առկայության մասին ահազանգ է եղել

Արմեն Գրիգորյանը Լոս Անջելեսում մասնակցեց «Ինովեյթ Արմենիա» ամենամյա 4-րդ փառատոնին

Վարչապետն այցելել է ՊՆ կենտրոնական կլինիկական զինվորական հոսպիտալ (լուսանկարներ)

Հանգիստ եղեք, ոչինչ չի մոռացվել, ոչ մեկը չի խուսափի արդարադատությունից. Սիմոնյանը՝ Քոչարյանի դատավարության մասին

Կապանի 28-ամյա բնակչուհին որոնվում է որպես անհետ կորած

Գյումրու մարզադպրոցում ապօրինություններ են բացահայտվել․ յուրացվել է մոտ 17 մլն դրամ

Ինքնաթիռում 3 ժամ տեւած ոչ ֆորմալ հանդիպում են ունեցել ՀՀ եւ ՌԴ ներկայացուցիչները. Ալեն Սիմոնյան

Վթար Երևան-Սևան ավտոճանապարհին.մեկ մարդ զոհվել է, մյուսի վիճակը միջին ծանրության է

Շիրակի մարզում իրականացվել է հատուկ «Ջութակ» օպերացիան. կան բերման ենթարկվածներ