Հեղափոխությունից հետո լրատվական դաշտում մեծ առուծախի պրոցես է տեղի ունեցել․ տեղյակ չե՞ք․ վարչապետը՝ լրագրողին

Մենք գիտենք, որ մամուլի ազատությանը չի կարելի կպնել, մամուլի դեմ հետապնդումներ չի կարելի անել։ Այս մասին այսօրվա ասուլիսի ժամանակ ասաց ՀՀ վարչապետ Նիկոլ Փաշինյանը՝ անդրադառնալով մամուլի ազատության սահմանափակման վերաբերյալ քննարկումներին․

«Մենք հիմա աշխատում ենք տարբեր կազմակերպությունների հետ, որպեսզի Հայաստանում մամուլի աջակցության հիմնադրամ ձեւավորվի՝ կառավարությունից անկախ: Բյուջեի միջոցներով չենք անում, որովհետեւ կստացվի, որ ուզում ենք վերահսկողության տակ վերցնել լրատվամիջոցներին: Ուզում ենք չեզոք գործընկերների ներգրավելով՝ Հայաստանում լրատվության աջակցության հիմնադրամ ստեղծել, որ այդ հիմնադրամը որոշակի ֆինանսական աջակցություն ցուցաբերի լրատվամիջոցներին»,-ասաց Փաշինյանը։

Ասուլիսի ժամանակ «Հրապարակ» օրաթերթի լրագրողն ասաց, թե իշխող ուժը ներկայացնող խմբակցության անդամներից որոշ պատգամավորներ հանդես են գալիս մամուլի դեմ հայտարարություններով, բաժանումներ են անում՝ իշխանական, հակահեղափոխական լրատվամիջոցներ, եւ այլն, մասնավորապես մեջբերելով «Իմ քայլը» խմբակցության պատգամավոր Լուսինե Բադալյանի ֆեյսբուքյան գրառումը, որտեղ վերջինս լրատվամիջոցների ցանկ էր առանձնացրել եւ կոչ արել հետեւել միայն այդ լրատվականներին: «Հրապարակ»-ի լրագրողը, մասնավորապես, հարցրեց․ «Ինչպե՞ս եք սա գնահատում, երբ դուք էլ երբեմն ձեր ուղիղ եթերներում առանձին լրատվամիջոցների եւ հրապարակումների քննադատաբար անդրադառնում ենք»։

«Հեղափոխությունից հետո լրատվական դաշտում մեծ առուծախի պրոցես է տեղի ունեցել։ Տեղյակ չե՞ք»,-արձագանքեց Փաշինյանը։ Նա նշեց, որ նշված գրառումն ինքը անձամբ չի տեսել, բայց ասաց, որ մտահոգությունն, ըստ էության, լեգիտիմ է, բայց այն պետք է լուծվի երկխոսության միջոցով, գործունեության կոնսենսուային դաշտ ձեւավորելու միջոցով․

«Ինչ ուզում է լինի՝ Հայաստանում մենք հակամամուլային որեւէ գործողություն չեն անելու, ուզում է՝ բոլոր լրատվամիջոցները մեկ սեփականատեր ունենան։ Մենք հակամամուլային գործողություն չենք անելու, բացառությամբ այն դեպքերի, երբ ուրիշ հարցեր կծագեն: Օրինակ, կարող է օրենքի կոպիտ խախտում լինի, որին չենք կարող չարձագանքել: Օրինակ, տեսանք, որ քրգործ է հարուցվել նախաքննական նյութեր հրապարակելու կապակցությամբ: Էդ էլ «լավ է», որ գործը հարուցված է մի լրատվամիջոցի նկատմամբ, որի նախկին գլխավոր խմբագիրը «Իմ քայլը» խմբակցության պատգամավոր է: Հակառակ դեպքում պատկերացնում եք, թե ինչ աղմուկ կլիներ»,-ասաց վարչապետը:

Նա անդրադարձավ ամբողջ աշխարհում առկա «ֆեյք նյուզի» հարցին՝ նշելով, որ դա գլոբալ խնդիր է․

«Դա վերաբերում է ամբողջ աշխարհին, հատկապես քաղաքակիրթ աշխարհին, որտեղ չկա ինտերնետի ցենզուրա: Շատ դեպքերում, երբ կան քաղաքական սահմանափակումներ, մենք չենք կարող մամուլի ազատության դեմ որեւէ բան անել, բայց նաեւ մարդիկ չեն կարող լրիվ անպաշտպան մնալ: Իրենք իրենց պաշտպանելու ինչ-որ ձեւեր են գտնում: Դա ոչ թե արշավ է մամուլի դեմ, այլ գործընկերության հրավեր է, որ եկեք փոխադարձ հարգանքի մթնոլորտ ձեւավորենք, նորմալ իրար հետ աշխատենք: Մենք ուզում ենք այդ խնդիրը իրար հե՞տ լուծենք, թե չենք ուզում: Թե՞ պետք է շարունակենք այդ ռեժիմը, որ մեկ լրատվամիջոցներն են քաղաքական գործիչներին բոյկոտում, մեկ՝ հակառակը: Առանձին վերցրած պատգամավորը, վարչապետը, լրատվամիջոցը այդ հարցի լուծումը չունի: Հերիք է, ինչքան հակամարտության կանխավարկածով ենք գնում, որովհետեւ իրականում հակամարտության հարց չկա»,- ընդգծեց Փաշինյանը: