Երբ վերադառնամ ՀՀ, նոր կհասկանամ, որ մեծահասակների ԵԱ չեմպիոն եմ. Արսեն Հարությունյան

ՀՀ ազատ ոճի ըմբշամարտի հավաքականի անդամ Արսեն Հարությունյանը (61 կգ) խառը զգացողություններ ունի Եվրոպայի 2019 թ. առաջնությունից հետո: Խոստովանում է, որ դեռ չի գիտակցում՝ ինչ հաջողության է հասել: Երեկ՝ ապրիլի 10-ին, Ռումինիայում ընթացող մրցաշարի եզրափակչում հիանալի հաղթանակ տարավ Եվրոպայի բրոնզեմեդալակիր վրացի Բեկա Լոմթաձեի նկատմամբ:: «Հայկական ժամանակ»-ի հետ զրույցում 19-ամյա մարզիկը կիսվեց տպավորություններում:

«Հիմա չեմ հասկանում՝ ինչ զգացողություններ ունեմ, բայց վստահ եմ, որ, երբ վերադառնամ Հայաստան, նոր կհասկանամ, որ Եվրոպայի մեծահասակների չեմպիոն եմ դարձել»,- ասաց նա՝ ավելացնելով, որ երբեք ոչ մի մրցաշարից առաջ չի մտածում, որ օրինակ 3-րդ տեղը կզբաղեցնի կամ պարզապես մասնակցելով կբավարվի, ու Ռումինիա էր գնացել հենց հաղթանակի հետեւից:

ԵԱ-ում Արսենը մի քանի անգամ՝ այդ թվում եզրափակչում, նախ զիջում էր մրցակցին, ապա հետ էր բերում կորցրածն ու կամային հաղթնակ տանում: Մարզիկը բացատրում է, որ ինքն այդպես նախապես է մտածած եղել: Նպատակն է եղել նախ հոգնեցնել մրցակիցներին, ապա օգտվել այդ հոգնածությունից ու առաջ անցնել:

«Բոլոր գոտեմարտերը պլանավորել էի, որ այդպես պետք է լինեին՝ բացի եզրափակչից: Դուրս էի գալիս գորգ, որ առաջին 3 րոպեների ընթացքում հակառակորդներիս հոգնեցնեմ, 2-րդ 3 րոպեների ընթացքում հարձակվեմ ու իմ միավորները վերցնեմ: Ուշադրություն չէի դարձնում, որ առաջին մրցափուլում պարտվում եմ, որովհետեւ պլանավորել էի, ու պլանավորածով էլ ընթացավ, բայց եզրափակիչ գոտեմարտի ժամանակ չէի նախատեսել, որ 8 միավոր կտամ: Մտածում է, որ, եթե առաջին մրցափուլում պարտվեմ, կարեւորը նրան կհոգնեցնեմ ու 2-րդ մրցափուլում կկարողանամ իմ հնարքները կիրառել: Բայց, որ 8 միավոր տվեցի, չշփոթվեցի, հավաքվեցի, գնացի, որ հետ բերեմ»,- ասաց նա:

Թեեւ երզփակչում Արսենն իր համար ինչ-որ առումով անսպասելի առավելություն է տվել մցրակցին, սակայն ընդգծում է, որ դա չի եղել իր ամենաբարդ գոտեմարտը: Նշում է, որ հատկապես դժվար է եղել կիսաեզրափակիչը: Մրցակիցը ռումինացի Նիկոլայ Օխլոպկովն էր, եւ քանի որ առաջնությունը հենց Ռումինիայում է, Արսենը մտավախություն է ունեցել, որ մրցավարները գուցե կփորձեն աջակցել նրան:

«Ամենաբարդ գոտեմարտն անցկացրել եմ ռումինացի ըմբիշի հետ: Լարվածությունը շատ էր: Մտածում էի՝ կարող է՝ ռումինացուն օգնեն, բայց այդպես չեղավ: Գոտեմարտն արդար անցավ: Ինչպես պլանավորել էի, այդպես էլ անցավ: 3 րոպե հոգնեցրեցի, 2-րդ մրցափուլում արդեն կարողացա առաջ անցնել»,- ասաց նա:

Վերջին անգամ ՀՀ ազատ ոճի ըմբշամարտի հավաքականը Եվրոպայի չեմպիոն էր ունեցել 6 տարի առաջ: 2013 թ. նման նվաճման էր հասել Դավիթ Սաֆարյանը: Արսենը պատմեց, որ հիմա հավաքականում բոլոր բարձր տրամադրություն ունեն, թեեւ ուրախությունը լիարժեք չէ, քանի որ իր մյուս ընկերները պարտություն են կրել: Առաջին շնորհավորանքն Արսենը ստացել է օլիմպիական բրոնզեմեդալակիր, Եվրոպայի կրկնակի չեմպիոն հունահռոմեական ոճի ըմբիշ Ռոման Ամոյանից, որի հետ մտերիմ է եւ որը հաճախ է իրեն խորհուրդներ տալիս: Կապերի պատճառով ընտանիքի հետ մի փոքր ուշ է շփվել:

«Շատ ուրախ տրամադրություն է ընտանիքիս մոտ: Միայն ընտանիքիս մոտ չէ, նաեւ ընկերներիս, հարազատներիս, բոլորի մոտ շատ լավ տրամադրություն է: Շնորհակալ եմ Աստծուն, որ կարողացա, բոլորին այսպիսի տրամադրություն պարգեւել»,- ասաց մա:

Մարզիկը ցանկացավ հատուկ շնորհակալություն հայտնել մարզիչներին: Ընդգծեց, որ նրանց պրոֆեսիոնալ ու նվիրված աշխատանքի, ճիշտ մոտեցման շնորհիվ է, որ հասել է այնտեղ, որտեղ հիմա է: Նշեց, որ շարունակելու է միշտ վստահել նրանց ու շարժվել նրանց ցուցումներով:

«Շնորհակալություն եմ հայտնում հավաքականի մարզիչներին՝ Հաբեթնակ Կուրղինյանին, Էդգար Ենոքյանին եւ առանձնահատուկ շնորհակալություն եմ հայտնում անձնական մարզիչներին, որ իմ կողքին են եղել այսքան տարիներ, ճիշտ ուղի են ցույց տվել, ճիշտ պահին ճիշտ որոշումներ են կայացրել ինձ համար ու ամեն պահի կողքիս են եղել»,- ասաց նա:

Արսեն Հարությունյանը դեռ չգիտի՝ որն է լինելու իր հաջորդ մրցումը: Սպասում է մարզիչների որոշումներին: Նշում է, որ ուր էլ ուղարկեն, գնալու է՝ հաղթելու:

Եվրոպայի 2019 թ. առաջնությունը մեկնարկել է ապրիլի 8-ին: Կավարտվի 14-ին: Ազատոճայիններն ավարտել են ելույթները: ՀՀ հավաքականի մյուս անդամները մեդալների համար չեն պայքարել: Բրոնզին մոտ են եղել Վազգեն Թեւանյանը (65 կգ) Դավիթ Սաֆարյանը (70 կգ) եւ Անդրանիկ Գալստյանը (125 կգ): Թեւանյանը սփոփիչ գոտեմարտը չի անցկացրել վնասվածքի պատճառով, մյուս 2-ը սփոփիչում պարտվել են: Հավաքականը Երեւան է վերադառնում այս գիշեր: «Զվարթնոց» օդանավակայանում կլինեն 00:30-ին: