Հանրային հեռուստառադիոընկերության խորհուրդն ապակողմնորշվա՞ծ է. «Շիրակ» ՀՌԸ-ի աշխատակիցները շարունակում են չվճարվել

Լուծարված «Շիրակ» հանրային հեռուստառադիոընկերության աշխատակիցները շարունակում են չվճարվել, նրանց աշխատավարձերի 4 եւ ավելի ամիսների վճարման գործընթացը ձգձգվում է: Ֆինանսների նախարարությունից «Հայկական ժամանակ»-ին հայտնել էին, որ կառավարության որոշումը մարտի 29-ից կա, գումարի չափն էլ հաստատված է:

Կառավարության 320N որոշմամբ, կառավարության պահուստային ֆոնդից 37 մլն 500 դրամ է հատկացվել «Շիրակ» հանրային հեռուստառադիոընկերությանը: Եվ քանի որ «Շիրակի հանրային հեռուստառադիո» ՓԲԸ բաժնետոմսերի կառավարման լիազորությունը վերապահված է Հանրային հեռուստառադիոընկերության խորհրդին, խորհուրդը պետք է ֆինանսավորման հայտ ներկայացնի եւ գործընթացը կազմակերպի:

Սակայն, չգիտես ինչու, ՀՌՀ -ն մեծ դժվարությամբ է ինքնակազմակերպվում: Նախ, պատճառաբանեցին, թե դեռ հրապարակված որոշում չկա, մինչդեռ այդ որոշումը վաղուց կար: Հիմա էլ հայտնում են, թե քանի որ «Շիրակ» հանրային հեռուստառադիոընկերությունը լուծարվում է, նախ, պետք է գույքը հանձնի պետգույքի կառավարման վարչություն, ինչ-որ փաստաթղթային ձգձգվող գործընթացներով անցնի, ապա նոր գումարը փոխանցեն:

Մինչ այդ, «Շիրակ» ՀՌԸ-ի 44 եւ ավելի աշխատակիցներ սպասում են իրենց ամիսներով չվճարված աշխատավարձերին:

«Շիրակ» ՀՌԸ-ի գործադիր տնօրեն Արթուր Ղանդիլյանը «Հայակական ժամանակ»-ի հետ զրույցում նկատեց, որ գումարների փոխանցումը պետգույքի հետ որեւէ կապ չունի: Մեր հարցին, թե ինչու են Հանրային հեռուստառադիոընկերության խորհրդից այդպես մեկնաբանում, Ղանդիլյանը դժվարացավ պատասխանել: «Ես չգիտեմ, թե ինչու են այդպես ասում: Հիմա արդեն այդ ամենը տնօրինում է լուծարային հանձնաժողովը, բայց մինչեւ այս պահը մեր հաշվի վրա գումար չկա», -ասաց Ղանդիլյանը՝ հույս հայտնելով, որ այդ գործընթացները հնարավորինս արագ կլինեն եւ երկուշաբթի օրվանից կկարողանա աշխատողներին գումար վճարել: