Կան մարդիկ, որոնց 15 անգամ պիտի ասես, որ մտնի, մեկ է, չի մտնում. Ռոբերտ Քոչարյան

Երեւան քաղաքի ընդհանուր իրավասության դատարանի դատավոր Դավիթ Գրիգորյանը նկատեց, որ Ռոբերտ Քոչարյանի պաշտպանները կրկնում են խափանման միջոցի վերաբերյալ իրենց դիրքորոշումները:

Դատարանի այս նկատառմանն անդրադարձավ Ռոբերտ Քոչարյանը. «Կան մարդիկ, որոնց 15 անգամ պիտի ասես, որ մտնի, մեկ է, չի մտնում»:

Օրբելյանը, ամփոփելով դիրքորոշումը, եւս մեկ անգամ ընդգծեց, որ Ռոբերտ Քոչարյանը, մնալով ազատության մեջ, չի խոչընդոտել գործի քննությանը. «Ցանկացած փուլում, երբ պարոն Քոչարյանը ոչ պատշաճ վարքագիծ դրսեւորի, փորձի խոչընդոտել գործի քննությանը, կարող են կալանքի հարցը դարձյալ բարձրացնել, որեւէ մեկը չի արգելում, որ դատաքննության ցանկացած փուլում Քոչարյանի կալանքի հարցը քննարկվի, եթե տեղի ունենա քննությունից խուսափելու կամ քննությանը խոչընդոտելու դեպք»,- նշեց պաշտպանը։

Օրբելյանը հայտարարեց, որ գործի նախաքննության ընթացքում գործով քննիչը դիրքորոշում է հայտնել, որ Ռոբերտ Քոչարյանը շփվում է լրագրողների հետ եւ պետք է կալանավորվի։ «Պարոն Քոչարյանի ստրատեգիան այն է, որ մինչեւ դատավարությունը չի խոչընդոտել քննությանը, մինչեւ դատավարության ավարտը եւ դրա ավարտից հետո էլ չի խոչընդոտելու գործի քննությանը։ Չի կարելի ոչ հստակ, եթերային արտահայտությունների հիման վրա անձին կալանավորել, հակառակ դեպքում կստացվի այնպես, որ անձի կալանավորումը պատժի նպատակ է հետապնդում։

Ըստ նրա՝ Վերաքննիչ դատարանի կողմից օգոստոսին ազատ արձակվելուց հետո, Ռոբերտ Քոչարյանը հանգիստ կարող էր նստել ինքնաթիռը ու հեռանալ. «Սակայն մենք դիմեցինք նախաքննական մարմնին, ասացինք՝ հարգենք պետական մարմնին, մարդիկ էլ հաջորդ օրը խափանման միջոց ընտրեցին չհեռանալու մասին ստորագրությունը, թույլ չտվեցին, որ Քոչարյանը բուժման նպատակով գնա եւ վերադառնա»,- հայտարարեց Օրբելյանը։

Օրբելյանը խնդրեց Ռոբերտ Քոչարյանին ազատ արձակել կալանքից։