Մարմնամարզիկ Վահագն Դավթյանն իր համար բարդ տարում շարունակում է մեդալներ նվաճել. արծաթ Մինսկում

Մարմնամարզիկ Վահագն Դավթյանը (օղակներ) տարին սկսել է ուսի լուրջ վնասվածքով, սակայն խոշոր մրցաշարերից կարողանում է վերադառնալ մեդալներով: Օրերս Մինսկում կայացած Եվրոպական 2-րդ խաղերում նվաճել է արծաթե մեդալ: Ապրիլին էլ բրոնեմեդալակիր էր դարձել Եվրոպայի 2019 թ. առաջնությունում: Այսօր՝ հուլիսի 1-ին, Երեւանի «Զվարթնոց» օդանավակայայում լրագրողների հետ զրույցում նշեց, որ համեմատած մյուս մրցումների հետ՝ Մինսկում վնասվածքն իրեն ամենաքիչն է զգացնել տվել:

«Եթե անկեղծ, երեւի սա այն մրցշարն էր, որտեղ վնասվածքը քիչ զգացնել տվեց: Էլի օրեր կային՝ զգում էի, որ ցավ ունեմ, խանգարում է, բայց համեմատած իմ անցյալ մրցումների… երեւի ինքն ինչ-որ վերականգնողական փուլ պետք է անցներ, երեւի այս մրցումների ընթացքում այդ ժամանակահատվածն էր մոտեցել: Ամեն դեպքում խնայելով, բժիշկներիս ցուցումներին հետեւելով, ինչ միջոց կար ձեռքիս տակ, այդ ամենն օգտագործելով՝ փորձում եմ այնպես անել, որ ինձ շատ չխանգարի»,- ասաց նա:

Մինսկ 2019-ում Դավթյանը 2-րդ տեղը զբաղեցրեց 14.766 միավորով: Բավական քիչ զիջեց չեմպիոն դարձած իտալացի Մարկո Լոդադիոյին (14.800): Մարզիկը նշում է, որ մի կողմից ցավալի է, որ այդքան քիչ տարբերությամբ է, որ չի կարողացել առաջինը լինել, սակայն մյուս կողմից ուրախ է, որ մեդալ է նվաճել:

«Ցավալի էր այդ տեսանկյունից, քանի որ գրեթե ոչինչ չբաժանեց առաջին տեղը 2-րդ տեղից: Միեւնույն ժամանակ ուզում եմ իմ մեջ եղած ուրախությունից խոսել, որովհետեւ ամեն դեպքում թեկուզ բրոնզե մեդալ, բայց մրցանակային տեղ գրավելը նման մրցումներում ե՛ւ պատվաբեր է, ե՛ւ վերջին հաշվով դու քո աշխատանքի արդյունքն ես տեսնում մրցուների ժամանակ: Եզրափակիչ փուլ անցել էի ոչ եռյակում լինելով: Դա նույնպես սփոփում է, քանի որ 5-րդ արդյունքով էի եզրափակիչ անցել»,- ասաց նա՝ ավելացնելով, որ մեդալը պարտավորեցնում է:

Մինսկ 2019-ում սա մարմնամարզիկների միակ նվաճումը չէր: Հավաքականի եւս մեկ առաջատար մեդալով է վերադարձել: Արթուր Դավթյանը չեմպիոն է դարձել հենացատկում:

Եվրոպական խաղերից հետո մարմնամարզիկներն ունեն հավաքներ ու մրցումներ: Դրանցիցի հետո տեղի է ունենալու նրանց համար տարվա կարեւորագույն մրցաշարերից մեկը՝ աշխարհի առաջնությունը, որն օլիմպիական վարկանիշային է: