Նույնիսկ իմ մեքսիկ կինն է ուզում ապրել ՀՀ-ում. Գլենդելի քաղաքապետը՝ Նիկոլ Փաշինյանի ԱՄՆ այցի մասին

Ավելի քան 20 հազար մարդ է մասնակցել Լոս Անջելեսի Գրանդ Փարքում ՀՀ վարչապետ Նիկոլ Փաշինյանի հրավիրած հանրահավաքին: Այս մասին ՀԺ-ի հետ զրույցում հայտնել է Գլենդելի քաղաքապետ Արա Նաջարյանը: Նա ընդգծել է, որ, իր հիշելով, վերջին շրջանում ՀՀ որեւէ ղեկավարի ԱՄՆ-ում այդքան մարդ չի դիմավորել:

Ներկայացնենք քաղաքապետի հետ մեր զրույցը.

- Պարո՛ն Նաջարյան, ՀՀ վարչապետ Նիկոլ Փաշինյանի Լոս Անջելեսում հրավիրած հանրահավաքը բավական մարդաշատ էր: Մարդիկ ի՞նչ տպավորություն ստացան:

- Այո՛, հանրահավաքը հրավիրվել էր Լոս Անջելեսի քաղաքապետարանի առջեւ: Այդ զբոսայգին շատ հարմար տեղ չէր, մարդիկ ոտքով չէին կարող գալ, մեքենայով պիտի գային: Բավական լեցուն էր հրապարակը: Ճիշտ թվերը չգիտեմ, բայց 20 հազարից ավելի մարդ, վստահ եմ, կար: Ես վստահ եմ, որ եթե ավելի հարմար տեղ լիներ, շատ մարդիկ կհավաքվեին, բայց դժբախտաբար մենք չունենք այդպիսի տարածք, ինչպես Երեւանում կա, որ բոլոր ցանկացողները հավաքվեն: Գիտեմ, որ շատերը ուզում էին գալ, շատերը ինտերնետով, «Յութուբ»-ով, հեռուստացույցով նայում էին: Բոլորն էլ Նիկոլ Փաշինյանին ընդունեցին շատ լավ: Շատ ուրախ էին, մի քանի անգամ խոսքն ընդհատեցին, որպեսզի ծափահարեն:

- Եղե՞լ էր նման դեպք, որ այդքան շատ մարդ ուզենար հանդիպել Հայաստանի ղեկավարին:

- Ես չեմ հիշում նման դեպք, սա առաջին անգամն էր: 2-3 տարի առաջ, երբ Սերժ Սարգսյանը եկավ, այսպես ելույթ չունեցավ: Նրա ելույթները ավելի փակ տարածքներում էին. ես չեմ տեսել, որ Լոսում այսքան մարդ հավաքվի: Այսքան բազմություն մեկ էլ հավաքվում է՝ Մեքսիկայի անկախության տոնը նշելու: Լոս Անջելեսում միլիոնավոր մեքսիկացիներ կան:

- Իսկ ի՞նչ տպավորություն ստացան մարդիկ. խոսե՞լ եք նրանց հետ:

- Մենք՝ որպես հայ, շատ ուրախ էինք, որ ինքը եկավ Ամերիկայի Միացյալ Նահանգներ: Շատ ուրախ ենք, որ Հայաստանում պիտի շարունակի իշխել ժողովրդի ուժը, ժողովրդի կամքը: Փաշինյանն իր ելույթում ասաց, որ կոռուպցիան պիտի վերացնի, պիտի փողոցներն ավելացնի եւ լայնացնի: 1,5 տարի առաջ մենք էլ փողոցում էինք, ուզեցինք այս շարժումը, իրականացավ: Այնպես որ սա մեր իրավունքն է՝ իրեն գովել: Սա առիթ էր, որ իրեն ասենք՝ այո՛, մենք ձեր կողքին կանգնած ենք, ձեր ճանապարհը ճիշտ է, շարունակեք այդ ճանապարհը:

- Պարո՛ն Նաջարյան, իսկ Նիկոլ Փաշինյանի դեմ բողոքի ակցիաներ չեղա՞ն: Չկայի՞ն մարդիկ, որ դեմ էին նրան:

- Ես մեկ մարդու չտեսա, հնարավոր է՝ կային, բայց ես չտեսա:

- Իսկ ո՞րն էր Փաշինյանի ամենակարեւոր ուղերձը, որ բոլորին դուր եկավ:

- Ինքն ասաց, որ չպիտի փոխի իր ճանապարհը, պիտի շարունակի իր ծրագիրը, Հայաստանն ավելի լավը պիտի լինի: Բոլոր սփյուռքահայերին հրավիրեց հայրենիք, որ գնան, գործ սկսեն, վայելեն Հայաստանը: Այսօր բիզնեսմենների հետ է հանդիպելու, վստահաբար ավելի մանրամասն պիտի խոսի, թե հիմա ինչքան ավելի հեշտ է Հայաստանում բիզնես սկսելը, քան առաջ, եւ ինչ բիզնեսներ են պետք, ինչ փոփոխություններ կան հիմա, քան Սերժ Սարգսյանի ժամանակ: Գիտես, լսած ենք, որ շատ կոռուպցիա կար, ուրիշ խնդիրներ կային, եթե նոր բիզնես էիր ուզում բացել այն ժամանակ: Վստահ եմ, որ ինքը պիտի բացատրի մեզ՝ ինչպես պետք է գումարները բերենք Հայաստան, գործ սկսենք: Կարծում եմ, որ իր խոսքի ամենակարեւոր մասն այն էր, որ Հայաստանը շատ հաջողակ երկիր պիտի դառնա շատ շուտով:

- Իսկ ինչ եք կարծում՝ մարդիկ կլսե՞ն հայրենիք վերադառնալու Փաշինյանի կոչը:

- Շատերը մտածում են: Ես բարեկամներ ունեմ, որոնց երկար ժամանակ չեմ տեսել: Հարցնում եմ՝ ո՞ւր եք, ասում են՝ Հայաստանում ենք ապրում արդեն կես տարի: Նույնիսկ իմ կինը, որ հայ չէ, մեքսիկ է, ինքը նույնպես ուզում է ապրել Հայաստանում: Զարմանալի է, բայց այդպես է: Մենք տեսնում ենք, որ հիմա շատերն են՝ որպես զբոսաշրջիկ, գնում Հայաստան, գնում, տեսնում են, որ Հայաստանն ապահով, անկախ երկիր է, այնտեղ ազատություն կա, շատ ջերմ է ժողովուրդը, եւ ինչո՞ւ չես ապրի այստեղ. կյանքի որակը լավ է, գները, ծախսերը Լոս Անջելեսի, Կալիֆորնիայի պես բարձր չեն, շատերը միտք ունեն վերադառնալ:

Հիշեցնենք, որ սեպտեմբերի 22-ին մեկնարկել է Նիկոլ Փաշինյանի այցն Ամերիկայի Միացյալ Նահանգներ: Երեկ նա հանրահավաք էր հրավիրել Լոս Անջելեսի հայտնի այգիներից մեկում, որին մասնակցել են բազմահազար քաղաքացիներ: