Նախագիծ, որով զինծառայողն իրավունք կունենա իրեն տրված կարգապահական տույժը բողոքարկել. արդյո՞ք սա կգործի

ՀՀ կառավարությունը շրջանառության մեջ է դրել «Հայաստանի Հանրապետության զինված ուժերի կարգապահական կանոնագիրք» Հայաստանի Հանրապետության օրենքում փոփոխություններ եւ լրացումներ կատարելու մասին նախագիծը:

Նախագծով նախատեսվում է, որ զինծառայողն իրավունք կունենա իրեն տրված կարգապահական տույժը բողոքարկել կարգապահական տույժը կիրառած հրամանատարի նկատմամբ։ Ըստ այդմ՝ քննարկելով բերված բողոքը` իրավասու հրամանատարը իրավունք կունենա բավարարելու բողոքն ամբողջությամբ, կա՛մ մասնակիորեն փոփոխել կարգապահական տույժի տեսակը, կա՛մ կարգապահական տույժ կիրառելու մասին հրամանը ճանաչել անվավեր։ Կառավարության կարծիքով՝ օրենքի ընդունումը կապահովի ՀՀ ԶՈՒ-ում կարգապահական իրավահարաբերությունների ամբողջականությունը, զինծառայողների իրավունքների եւ շահերի պաշտպանության գործընթացի պատշաճ կազմակերպումը:

Նախագծով նախատեսվում է նաեւ, որ այսուհետ կարգապահական պատասխանատվությունը ծանրացնող հանգամանք կհամարվի նաեւ դատվածություն ունեցող անձի կողմից իրավախախտում կատարելը:

Ռազմական փորձագետ Հրաչյա Պետրոսյանցի կարծիքով՝ միշտ էլ եղել է հնարավորություն կարգապահականը տույժը բողոքարկելու: «2012 թվականից օրենք հանդիսացող ԶՈՒ կարգապահական կանոնագիրքը երբ ընդունվեց, հիմնովին փոփոխվեց: Այդ փոփոխված օրենքով էլ այդ հնարավորությունը կար, որ զինծառայողը տույժը կարող է բողոքարկել: Զինծառայողը պետք է տույժի մասին բողոքարկի իրեն տույժ տված հրամանատարից մեկ աստիճան բարձր հրամանատարի: Ինչքան գիտեմ՝ նախագծով ընթացակարգային փոփոխություններ են նախատեսվում»,- ՀԺ-ի հետ զրույցում նախագծի վերաբերյալ այսպիսի կարծիք հայտնեց Պետրոսյանցը:

Հարցին՝ զինծառայողը խնդիր չի՞ ունենա, եթե իր վերադաս սպայի նշանակած տույժի հարցով դիմի ավելի վերադաս սպայի, Պետրոսյանցը պատասխանեց. «Օրենքով, իհարկե, պետք է խնդիր չունենա: Նորից եմ կրկնում՝ այդ հնարավորությունը նախկինում էլ է եղել, բայց 99.9 տոկոս դեպքերում չի կատարվել: Ինչո՞ւ. որովհետեւ զինծառայողը շատ լավ գիտի, որ շարունակելու է ծառայել այդ սպայի ենթակայության տակ ու եթե բողոքարկի՝ հետքերը մնալու են: Իսկ գիտե՞ք, թե որն է այստեղ խնդիրը. տույժերը հիմնականում տրվում են Ներքին ծառայության կանոնագրքի խախտումների համար: Իսկ այդ կանոնագիրքը Խորհրդային Միությունից մնացած կանոնագիրք է, ԽՍՀՄ ստանդարտներով եւ նորմատիվներով գրված: Ներկա պայմաններում չկա այնպիսի զինծառայող, որ այդ ներքին ծառայության կանոնները երբեւիցե չխախտի: Եթե դու ծառայում ես, անհնար է, որ չխախտես, քանի որ այնպիսի պարտականություններ է դրված անձնակազմի վրա, որ ուղղակի անիրականանալի է: Անհնար է, որ մեկ անձը ֆիզիկապես այդքան պարտականություններից գոնե մեկը չխախտի»:

Փորձագետի կարծիքով՝ այս օրենքը չի գործի. «Մենք ունենք բազմաթիվ գեղեցիկ օրենքներ՝ գրված թղթի վրա, որոնք իրականում ոչինչ էլ չեն տալիս: Բազմաթիվ այդպիսի գեղեցիկ օրենքներ ունենք՝ շատ լավն են, բայց չեն գործում: Չեն գործում, որովհետեւ մարդը հասկանում է, որ ինքը շարունակելու  է ծառայել: Նույնիսկ, եթե նա տեղափոխվի այլ տեղ՝ ծառայությունը շարունակելու, հեռախոսով անմիջապես հասնելու է այդտեղ, որ գիտեք՝ այսպիսի բան է եղել: Ասենք այսօր բանակում գործող սպաների, ենթասպաների, պայմանագրայինների մեծ մասը խնդիրներ ունեն, քանի որ բանակում մարդու իրավունքները շատ են ոտնահարվում: Բայց որեւէ մեկը չի դիմում: Իսկ դատական պրոցեսների հիմնականում գնում են նրանք, ովքեր զորացրվում են»:

ՀՀ պաշտպանության նախարարի տեղակալ Գաբրիել Բալայանը կարծում է, որ կարգապահական տույժը հանելը նաեւ խրախուսման միջոց է. «Երբ որ զինծառայողը տույժը ստանում է, որպես խրախուսում նախատեսված է տույժի հանումը՝ ժամկետից շուտ: Տույժի կիրառման բողոքարկումը  իրավունք է, որը, ես կարծում եմ՝ ճիշտ որոշում է: Եթե մենք խոսում ենք սպաների մասին, ապա նրանց դեպքում ծառայողական քննության արդյունքում է տույժը տրվում: Օրինակ՝ ծառայողական քննությունն անցկացվում է, եւ որոշակի ժամանակ հնարավոր չի լինում օբյեկտիվ հանգամանքները պարզել՝ ինչ-ինչ պատճառներից ելնելով, հետո այլ հանգամանքներ են երեւան գալիս, ինչը հնարավորություն է տալիս զինծառայողին դիմելու եւ տույժը հանելու համար: Ես սրա մեջ բացասական բան չեմ տեսնում»:

Հարցին՝ տույժի դեմ բողոքարկելը աշխատո՞ղ գործիք կլինի, փոխնախարարը պատասխանեց. «Միանշանակ, մենք շատ դեպքեր ենք ունեցել: Բողոքարկման արդյունքում տույժը կարող է հանվել, տույժը կարող է ավելի ցածր լինել»:

Դիտարկմանը՝ թե կարծիք է հնչում, որ ԶՈՒ ներքին կանոնակարգը խորհրդային տարիների է, եւ եթե զինծառայողը բողոքի ինչ-որ հարցով, հետո սխալ թույլ տալու դեպքում՝ հնարավոր է խնդիրներ ունենա, Բալայանն արձագանքեց. «Անսխալ մարդ չկա, բայց մենք սուբյեկտիվ ենք գնահատում: Ծառայողական քննությունը նշանակվում է նրա համար, որպեսզի օբյեկտիվ պատճառները գտնեն: Կարգապահական կանոնագրքից բացի մենք ունենք նախարարի հրամանը, որով այդ քննության անցկացման կարգն է նշվում: Ի՞նչ կապ ունի, որ ներքին ծառայության կանոնագիրքը հին է: Ներքին ծառայության կանոնագիրքը իհարկե պարտադիր է կատարման համար, բայց կարգապահական տույժի ենթարկելու համար մենք շարժվում ենք կարգապահական կանոնագրքով եւ համապատասխան նորմատիվ հրամանով»:

Անդրադառնալով հարցին՝ թե արդյո՞ք ներքին ծառայության կանոնակարգը փոխելու կամ թարմացնելու անհրաժեշտություն կա, Բալայանը պատասխանեց. «Գիտեք ինչ, օրենսդրությունում, որպես այդպիսին նոր մարտահրավերներ ի հայտ են գալիս: Եթե տեսնեք, թե այն ընդունվելուց հետո քանի անգամ է փոփոխության ենթարկվել, ապա կտեսնեք, որ այն կոնստանտ (կայուն) փոփոխության մեջ է: Բայց այն ծավալի փոփոխություններ դեռ նախատեսված չեն, որը թույլ տա ենթադրել, որ անհրաժեշտություն է առաջացել այն ամբողջովին փոփոխել»:

Տպել
494 դիտում

Փոխվարչապետ Տիգրան Ավինյանը մասնակցել է հայ-վրացական իրավական համագործակցության երրորդ ֆորումին

Հրազդանի բժշկական կենտրոնում հրդեհային անվտանգության կանոնների մի շարք թերություններ և խախտումներ են հայտնաբերվել

Վերահաստատում եմ իմ ակտիվ մասնակցությունն ընտրապայքարին, Արցախում ֆեյքային գզվռտոց չի լինելու. Արցախի ԱԳ նախարար

Գողացված բանկային քարտով կանխիկացման փորձ է արվել (տեսանյութ)

Թուրքիայում ստեղծվել է «1915.gov.tr» կայքը՝ Հայոց ցեղասպանության պնդումների դեմ պայքարելու համար

Սարհատ Պետրոսյանի հայտարարություններից հետո նախապատրաստված նյութերով քրգործի հարուցումը մերժվել է

Ճիշտն ասած՝ ինձ խաբեցին. Թլիկում պարտված միակ թեկնածու

Սահմանապահ գյուղերում 2020-ից ամեն ծնվող երեխայի համար 1000 դոլար կտրվի, ևս 100 հազ. դրամ՝ ամսական

Եթե հանկարծ նկատեք, որ բարեւների առումով ժուժկալ եմ դարձել, չմտածեք, թե մեծամտացել եմ․ Փաշինյան

ՀՀ վարչապետն ու բարձրաստիճան պաշտոնյաները ծաղիկ են խոնարհել Ծիծեռնակաբերդում (լուսանկարներ)

Գյումրի քաղաքում մասնակի փլուզվել է տան պատը. տուժածներ չկան

Արտակարգ դեպք Երևանում. Շենգավիթում որդին կասկածվում է մոր նկատմամբ բենզինով սպանության փորձ կատարելու մեջ

Դեկտեմբերի 10-ին հեռարձակման թվային ցանցում կկատարվեն պրոֆիլակտիկ աշխատանքներ

Ոմանք կոռուպցիայի դեմ պայքարը պատկերացնում են՝ համերգ հեռուստադիտողի հայտով․ վարչապետը՝ Սերժ Սարգսյանի մեղադրանքի մասին

Ռոբերտ Քոչարյանի պաշտպանները բողոքարկել են Աննա Դանիբեկյանի՝ ինքնաբացարկի միջնորդությունը մերժելու որոշումը

ԱԺ-ն ամբողջությամբ ընդունեց վարորդների համար բալային համակարգի ներդրման մասին օրինագիծը

ԱԺ-ն ամբողջությամբ ընդունեց նոր ուղղություններով չվերթով մեկնող անձանց օդի տուրքից ազատելու նախագիծը

Վաղը Երևանի և Արարատի մարզի որոշ հասցեներում ջրամատակարարումը 24 ժամով կդադարեցվի

Ալաշկերտի համայնքապետ է վերընտրվել ՊԵԿ փոխնախագահի հայրը

ԱԺ-ն առաջին ընթերցմամբ ընդունեց զինծառայությունից նաեւ 5 տարի անց հաշմանդամության կարգ տալու մասին օրինագիծը