Էլոյանը մեղադրվում է, որ մեծ հնարավորություններ է ստացել, քաղաքապետարանը չի հերքում, որ 71 հարկանի շենք կկառուցվի

Փոխվարչապետի խորհրդական Ավետիք Էլոյանին «կոռումպացվածության հասնող թայֆայականության» մեխանիզմներով իր սեփական բիզնեսը զարգացնելում մեղադրել է Կադաստրի պետական կոմիտեի նախկին ղեկավար Սարհատ Պետրոսյանը:

Նրա խոսքով՝ Էլոյանի սեփական նախագծային ընկերությունն է իրականացնում բազմաթիվ շենքերի նախագծային աշխատանքները, այդ թվում եւ՝ Երեւանում կառուցվելիք 71 հարկանի շինության, մինչդեռ նախկինում, երբ դեռ Էլոյանը պաշտոն չուներ, ընկերությունը պատվերներ չէր ստանում: Էլոյանի՝ պաշտոնի չարաշահմամբ ծավալած գործունեության մասին, ըստ Սարհատ Պետրոսյանի, տեղյակ է եղել փոխվարչապետ Տիգրան Ավինյանը. ինքն անձամբ է մի քանի անգամ բանավոր եւ գրավոր տեղեկացրել նրան այդ մասին:

«Ավինյանի խորհրդական հանդիսացող նախկին Քաղաքաշինության կոմիտեի ղեկավարը, որը Հայաստանում երեւիցե գործունեություն չի ունեցել, այսօր հանդիսանում է Հայաստանի խոշորագույն նախագծային կազմակերպության սեփականատերը (խոսքը Ավետիք Էլոյանի մասին է), համակարգում է հսկայական ծավալի ներդրումային ծրագրեր, եւ իրեն պատկանող ընկերությունը անմիջապես ներգրավված է այս բոլոր գործընթացներում: Դրա մասին տեղյակ են բոլորը, տեղյակ է Ավինյանը, ես ինքս այդ մասին ասել եմ: Դրա մասին տեղյակ է ողջ ճարտարապետական հանրույթը, որ բերանը բաց նայում է: Ես մի փաստ եմ բերում. այդ շենքի հեղինակն Ավետիք Էլոյանին պատկանող կազմակերպությունն է: Ավետիք Էլոյանը մինչեւ Քաղաքաշինության կոմիտեի ղեկավար լինելը չի ունեցել Հայաստանում նախագծային գործունեության որեւէ առիթ: Այսինքն, ինքը ստացել է ե՛ւ այս պատվերը, ե՛ւ բազմաթիվ այլ պատվերներ պաշտոնի չարաշահման, օգտագործման շնորհիվ»,- նշել է Սարհատ Պետրոսյանը:

Թե՛ Սարհատ Պետրոսյանը եւ թե՛ Ավետիք Էլոյանը երեկ եւ այսօր չպատասխանեցին մեր հեռախոսազանգերին: Ավինյանի գրասենյակի ղեկավար Սերժ Վարագ Սիսեռյանը մեզ հետ զրույցում ասաց, որ այս հայտարարութուններին չի պատրաստվում անդրադառնալ. «Ամենայն հավանականությամբ պարոն Էլոյանը կմեկնաբանի. առայժմ ես այդ թեմայով որեւէ հարցի չեմ պատասխանում»,- նշեց Սիսեռյանը:

Այս առնչությամբ ԱԺ տնտեսական հարցերի հանձնաժողովի նախագահ Բաբկեն Թունյանը երեկ լրագրողների հետ զրույցում ասել է, որ հաճելի չէ, երբ կառավարող թիմի ներսում նախկին անդամը նման մեղադրանքներ է հնչեցնում ներկա անդամների հասցեին. «Ամեն դեպքում, սա մեզ համար ահազանգ է, որի հետքերով պետք է գնալ ու պետք է հասկանալ՝ ով է ճիշտ, ով սխալ: Եթե նման դրսեւորումներ կան, բնականաբար, այդ դրսեւորումները պետք է կանխվեն ու համարժեք պատասխան ստանան»:

Քաղաքապետարանից լրատվական ծառայությունից մեզ պատասխանեցին, որ ցանկացած շենքի, այդ թվում եւ՝ 71 հարկանի շենքի մասին տվյալներ տրամադրելու համար հարկ է, որ նշվեն այդ շենքի նախագծի տվյալները (նվազագույնը` հասցեն): Նկատենք, որ ավելի վաղ, երբ կրկին քննարկվում էր Երեւանում երկնաքեր կառուցելու ծրագրի մասին լուրը, քաղաքապետարանը հերքել էր դա՝ վստահեցնելով, որ նման նախագիծ չկա ու չի լինելու: Ընդ որում, այդ ժամանակ շենքի հասցե չէր պահանջվել: Նշենք նաեւ, որ Երեւանի գլխավոր ճարտարապետ Արթուր Մեսչյանը ավագանու՝ սեպտեմբերի 10-ի նիստում հայտարարել էր, որ նման նախագիծ քաղաքապետարան ընդհանրապես չի ներկայացվել: Մինչդեռ հիմա «երկնաքերի» նախագծի գոյությունն արդեն չի հերքվում: Մեր հավելյալ հարցին, թե ամեն օր չեն ստացվում 71 հարկանի շենքի հայտեր, նման հայտը չի՞ տպավորվել, քաղաքապետարանից պատասխանեցին, որ ոչինչ չեն կարող ասել:

Ունեցել է Հայաստանում պատվերներ, թե՝ ոչ Ավետիք Էլոյանի «Էլոյան արքիթեքթս» ընկերությունը նախքան Հայաստան գալը, դժվար է ասել, սակայն ընկերության պաշտոնական կայքում բազմաթիվ են կամուրջների, տների ու ինտերիերի հետաքրքիր ճարտարապետական լուծումները:

Սպասենք Էլոյանի պատասխաններին: Ըստ Սիսեռյանի՝ նախատեսվում է, որ նա կպատասխանի լուրջ մեղադրանքներն՝ առանց առկա հիմքերի ներկայացրած եւ «ընդհատակ անցած» Սարհատ Պետրոսյանի թե՛ իրեն եւ թե՛ իր ապօրինությունների վերաբերյալ Ավինյանի տեղյակ լինելու մասին հայտարարություններին:

Կարմեն Մարտիրոսյան