Կարեւոր մրցաշար Գերմանիայում. հայ մարմնամարզիկներին օլիմպիական ուղեգրերի շատ փոքր հույս է մնացել

ՀՀ մարմնամարզության հավաքականը պատրաստվում է կարեւոր ու ինչ-որ առումով որոշիչ մրցաշարի: Նոյեմբերի 21-25-ը մասնակցելու են Գերմանիայի Կոտբուս քաղաքում կայանալիք աշխարհի գավաթի խաղարկությանը: Ներկայացված է լինելու 4 մարզիկով: Նրանք են աշխարհի բրոնզեմեդալակիր, Եվրոպայի չեմպիոն Հարություն Մերդինյանը (նժույգթափեր), Եվրոպայի փոխչեմպիոն Վահագն Դավթյանը, Եվրոպայի երիտասարդների առաջնության արծաթեմեդալակիր Արթուր Ավետիսյանը (երկուսն էլ օղակներ), Եվրոպայի փոխչեմպիոն Արթուր Դավթյանը (բազմամարտ):

Սա Տոկիո 2020-ի ուղեգրեր նվաճելու փոքրիկ շանս է հայ մարմնամարզիկների համար: Աշխարհի գավաթի խաղարկություններում յուրաքանչյուր վարժությունում խաղարկվում է 1 ուղեգիր, որը բաժին է հասնում տվյալ գործիքի վրա գավաթի բոլոր խաղարկություններում ամենաշատ միավորները հավաքած մարզիկին: Խաղարկություններից 2-ը ՀՀ-ն բաց է թողնում, քանի որ մրցավայրը Բաքուն է: Ավստրալիայի խաղարկություններից մեկին չի մասնակցել, քանի որ մարզական տեսանկյունից այնքան էլ նպատակահարմար չէ այդքան հեռու գնալ: Եվրոպայի 2020 թ. առաջնությանն էլ չի կարող մասնակցել, քանի որ կրկին Բաքվում է: Մնում է փորձել միավորներ հավաքել Քոթբուսում: Հավաքականի գլխավոր մարզիչ Հակոբ Սերոբյանն ավելի վաղ «Հայկական ժամանակ»-ին ասել էր, որ, եթե Քոթբուս 2019-ում հաջող մասնակցություն ունենան, Ավստրալիա էլ կգնան՝ չնայած ժամային գոտիների ու ժամանակացույցի բարդությանը:  

Մինչեւ հիմա այս մարզաձեւում Հայաստանը միայն 1 օլիմպիական ունի: Այն նվաճել  է Արթուր Դավթյանը աշխարհի 2019 թ. առաջնությունում: Ռիո 2016-ում Հայաստանը 3 մարմնամարզիկ ուներ՝ Արթուր Դավթյանը, Հարություն Մերդինյանը եւ Հուրի Գեբեշյանը՝ առաջին կին մարմնամարզիկը, որը երբեւէ ՀՀ-ն ներկայացրել է օլիմպիական խաղերում: