«Ներքին ինֆորմացիա է». ՀՅԴ ուսանողական միությունն արձագանքում է պարտիզանական գործողությունների մասին հայտարարությանը

ՀՅԴ «Նիկոլ Աղբալյան» ուսանողական միությունը պաշտոնապես արձագանքել է «ՀՅԴ ՆԱՈՒՄ ընկերներ»-ի անունից այսօր տարածված հայտարարությանը, ըստ որի՝ ՀՅԴ-ն պատրաստվում է պարտիզանական հարվածներ հասցնել ներկա իշխանություններին:

Քիչ առաջ տարածված հաղորդագրությունում նշվում է, թե «կոտրվել է միության պաշտոնական էջի գաղտնաբառը, եւ արդեն մի քանի օր է՝ սոցցանցերում ստեղծվում են միության անունը կրող կեղծ էջեր»: Նույն հաղորդագրությունում նշվում է նաեւ, որ լրատվամիջոցներում տարածված գրությունն առնչություն չունի միության պաշտոնական տեսակետի հետ:

Ընդգծենք, սակայն, որ վերը հիշատակվող գրությունը տարածվել է ոչ թե ուսանողական միության պաշտոնական էջով, այլ «Ուղղամիտ եւ անվախ Դաշնակցականներ» անունը կրող էջով: «Նիկոլ Աղբալյան ուսանողական միության» ֆեյսբուքյան էջում վերջին անգամ գրառում է արվել նոյեմբերի 17-ին, եւ այն վերաբերում է ուսանողության միջազգային օրվան: Այս պարագայում անհասկանալի է դառնում, թե ինչ էջ է կոտրվել:

Նկատենք նաեւ, որ մինչ այս պահը հնարավոր չի լինում տարածված հայտարարության վերաբերյալ մեկնաբանություն ստանալ ՀՅԴ ԳՄ անդամներից:

Մինչ «հերքող» հայտարարության տարածումը՝ մենք կարճ զրույց ունեցանք «Նիկոլ Աղբալյան» ուսանողական միության նախագահ Ռուբեն Սողոյանի հետ.

- Պարո՛ն Սողոյան, այսօր «Նիկոլ Աղբալյան» ուսանողական միության անունից հայտարարություն է տարածվել, որը վերաբերում է ՀՅԴ ԳՄ կոմիտեների նիստերին…

- Հայտարարությունը ուսանողական միության անունի՞ց է:

- Միության մի շարք ընկերների: Հայտարարությունում նշված է, որ դաշնակցության ԳՄ կոմիտեների ժողով է եղել, որի ընթացքում որոշում է կայացվել պարտիզանական գործողություններ իրականացնել ներկա իշխանությունների դեմ:

- Գիտեք՝ ինչ կա, դա ներքին ինֆորմացիա է, դա կուսակցական ներքին ինֆորմացիա է, ու չգիտեմ էլ՝ էդտեղ ինչ է գրված, բայց եթե խոսքը ժողովի մասին է, կուսակցական ժողովը ներքին ինֆորմացիա է: Ու, ամենայն հավանականությամբ, այդտեղ սխալ բաներ են գրված կամ չգիտեմ. ինձ ժողովի մասին հարցեր մի տվեք, լա՞վ:

- Բայց եղե՞լ է նման բան, որ ժողովում որեւէ որոշում կայացվի, ուսանողական միությունը դեմ լինի դրան:

- Տեսեք, դուք ժողովի մասին էլի հարց եք տալիս:

- ժողովի չէ…

- Ժողովի ժամանակ շատ մարդիկ կարող են դեմ լինել կամ կողմ:

- ժողովի ժամանակ չէ, ես հարցնում եմ՝ եղե՞լ է նման բան, որ որոշում է կայացվել, եւ դուք դեմ եք եղել:

- Կներեք, բայց էլի դուք փորձում եք կուսակցական ներքին ժողովի վերաբերյալ հարց տաք:

- Բայց ինչ-որ արձագանք պե՞տք է լինի այդ հայտարարությանը:

- Ես կկարդամ, եթե անհրաժեշտություն լինի, կարձագանքենք:

Հիշեցնենք՝ տեղեկացրել էինք, որ մի շարք դաշնակցականներ հանդես են եկել ուշագրավ հայտարարությամբ՝ մանրամասներ հայտնելով հոկտեմբերի 31-ին տեղի ունեցած գաղտնի ժողովից: Հայտարարությունում մասնավորապես նշվում էր, որ սույն թվականի հոկտեմբերի 31-ին Գերագույն մարմինը հրավիրել է հայաստանյան կոմիտեների ժողով, որին ներկայիս ԳՄ և Բյուրո անդամներից բացի՝ ներկա է եղել նաև ՀՅԴ Բյուրոյի նախկին ներկայացուցիչ ընկեր Հրանտ Մարգարյանը:

«Ժողովի հիմնական օրակարգն է եղել արտահերթ խորհրդարանական ընտրությունների պահանջ ներկայացնելու առաջարկի քննարկումը (տեղեկացումը), վերջինիս վերաբերյալ ընկերների միասնական դրական կարծիքի ձևավորումը: Ներկայացված առաջարկի մասով ելույթ է ունեցել նաև ընկեր Հրանտը, ով, ի թիվս այլ հարցերի, խոսել է նաև կուսակցության ներսում քաղբանտարկյալների հարցերով զբաղվող հանձնախումբ ստեղծելու մասին։ Նա իր ելույթում առաջ է քաշել վերոնշյալ օրակարգի իրականացման շրջանակներում քաղբանտարկյալների պաշտպանության հարցը՝ մասնավորապես նշելով ՀՀ երկրորդ նախագահ Ռոբերտ Քոչարյանի քաղբանտարկյալ լինելը: Ընկերոջ համոզմամբ՝ մենք՝ որպես դաշնակցություն, պետք է պարտիզանական հարվածներ հասցնենք ներկա իշխանություններին: Ընկերը կանխատեսումներ է արել նաև կուսակցականների, այդ թվում՝ երիտասարդների հնարավոր ձերբակալությունների մասին և հորդորել պատրաստ լինել նման երևույթների՝ չվախենալով դրանցից»,- ասված է հայտարարությունում:

Ըստ այդ հայտարարության՝ քանի որ ՀՅԴ շարքերում տիրում է վախի մթնոլորտ, շատ ընկերներ վախեցել են այս ամենի վերաբերյալ իրենց տեսակետն արտահայտել: