Ձեր եղբայրը մտերիմ հարաբերությունների մեջ է Վահե Գրիգորյանի հետ. ինքնաբացարկի միջնորդություն՝ դատավորին

Վերաքննիչ քրեական դատարանում Ռոբերտ Քոչարյանի խափանման միջոցի գործով դատական նիստին պաշտպանական կողմն ինքնաբացարկի միջնորդություն ներկայացրեց նախագահող դատավոր Լուսինե Աբգարյանին:

Ավելի վաղ հայտնել ենք, որ ինքնաբացարկի հետ կապված դիրքորոշում հայտնելու համար պաշտպանները միջնորդել էին նիստն անցկացնել դռնփակ՝ պատճառաբանելով, որ իրենք որոշ շահագրգիռ անձանց հետ կապված հարցեր ունեն դատավորին, եւ միջնորդությունը բավարարվել էր: Դրանից հետո՝ արդեն միջնորդության քննությունը, ընթանում է դռնբաց դատական նիստում:

Պաշտպաններից Արամ Վարդեւանյանը նախ հիշեցրեց Քրեական դատավարության օրենսգրքի այն պահանջը, համաձայն որի՝ դատավորը պարտավոր է ինքնաբացարկ հայտնել, եթե նա տեղյակ է այնպիսի հանգամանքների մասին, որոնք կարող են անաչառ դիտորդի մոտ իր կողմնակալության հետ կապված կասկած հարուցել. «Սահմանադրական դատարանն էլ իր ՍԴՈ-918 որոշմամբ փաստել է, որ կողմնակալ դատավորն անկախ չէ եւ արդարադատություն իրականացնել չի կարող, իսկ նման դատարանների կողմից ընդունված դատական ակտերը գործադրվել չեն կարող»:

Որպես ինքնաբացարկի առաջին հիմք՝ Արամ Վարդեւանյանը մատնանշեց մամուլի այն հրապարակումը, ըստ որի՝ նախագահող դատավորի եղբայրը՝ Դավիթ Աբգարյանը, հավանել եւ կիսվել է Սերժ Թանկյանի այն հրապարակումով, որում վերջինս նշել է՝ ուրախ է տեղեկանալ, որ նախկին նախագահ Ռոբերտ Քոչարյանը նորից ՔԿՀ-ում է. «Ֆեյսբուքյան ուսումնասիրությունից պարզ է դառնում նաեւ, որ ձեր եղբայրը մտերիմ հարաբերությունների մեջ է սույն գործով տուժողների նախկին ներկայացուցիչ Վահե Գրիգորյանի հետ, նրանք նաեւ համատեղ ներկայացուցչություն են իրականացրել Եվրոպական դատարանում: Իսկ Վահե Գրիգորյանի անկողմնակալության հանգամանքը նույնիսկ որպես մասնակցության անհնարինություն է դիտարկվել ՍԴ-ում, եւ նա էլ դրա դեմ չի առարկել»:

Ինքնաբացարկի երրորդ հիմքը, ըստ պաշտպանի, այն է, որ դատավոր Լուսինե Աբգարյանն իր ֆեյսբուքյան էջով հավանել է Վահե Գրիգորյանի այն գրառումը, որով վերջինս իր գոհունակությունն է հայտնել դատավորի եղբոր աշխատանքային հաջողությանը Եվրոպական դատարանում. «Մյուս հանգամանքը, հարգելի՛ դատարան, վերաբերում է ձեր արձակուրդին. ըստ court.am-ի հենց այսօր էլ տպագրված տեղեկատվության՝ դեկտեմբերի 17-ից մինչեւ 30-ն ընկած ժամանակահատվածում դուք գտնվելու եք արձակուրդում, իսկ ընդհանուր կանոնի համաձայն՝ արձակուրդին նախորդող 10-օրյա փուլում դատավորի անունը հանվում է բաշխման ցուցակից: Տվյալ դեպքում հարց է ծագում, թե ինչպես է ամսի 10-ին այս բողոքը մակագրվում ձեզ»:

Նախագահող դատավոր Լուսինե Աբգարյանը հարց հղեց պաշտպաններին այն մասին, թե ունե՞ն նրանք որեւէ փաստ, որ ինքն իր որեւէ որոշում այս 5 տարիների ընթացքում կայացրել է իր եղբոր ազդեցությամբ: Սրան ի պատասխան՝ պաշտպան Արամ Վարդեւանյանն ասաց, որ նման փաստ ունենալու դեպքում իրենք կհրապարակեին, բայց տվյալ դեպքում ընդգծում են այն հանգամանքը, որ անկողմնակալ դիտորդի մոտ կարող է կասկած առաջանալ:

Դատավոր Լուսինե Աբգարյանը, անդրադառնալով ինքնաբացարկի հիմքերից մեկին՝ արձակուրդին, հայտնեց, որ այն փոփոխվել է, եւ իրեն հայտնի չէ, թե ինչու պաշտոնական կայքում այդ մասին նշում չկա: Լուսինե Աբգարյանի խոսքով՝ ինքն արձակուրդում է գտնվելու դեկտեմբերի 24-ից մինչեւ 30-ն ընկած ժամանակահատվածում:

Միջնորդության դեմ առարկեցին մեղադրող եւ տուժող կողմերը՝ այն որակելով անհիմն:

Լսելով կողմերին՝ դատավորը հեռացավ խորհրդակցական սենյակ՝ որոշում կայացնելու: Այն կհրապարակվի դեկտեմբերի 18-ին՝ ժամը 14:00-ին: