Իրեն խոշտանգելու մասին սկանդալային տեսանյութը դիտելուց հետո տուժողի հիվանդությունն ակտիվացել է

Շաբաթներ առաջ համացանցում հայտնված սկանդալային տեսանյութը, որ ներկայացնում էր՝ ինչպես են ոստիկանները հակագազով ու մահակով ցուցմունք կորզում, տուժողի առողջության կտրուկ վատթարացման պատճառ է դարձել: Այս մասին ՀԺ-ի հետ զրույցում նշեց տուժող Արմեն Մարտիրոսյանի փաստաբան Արա Ղարագյոզյանը:

«Խոշտանգումը տեղի է ունեցել 2008 թ.: Մենք բժշկական փաստաթուղթ ունենք, որ Արմեն Մարտիրոսյանը մինչեւ 2008 թ.-ի այդ դեպքերը ճնշման հետ կապված խնդիր չի ունեցել... Վերջին 3-4 տարում ինչ-որ չափով վիճակը կայունացել էր, բայց այս տեսանյութը դիտելուց հետո պարբերաբար վիճակը վատանում է: Թեպետ պիտի նշեմ, որ ՔԿ հիմնարկը միջոցներ ձեռք առնում է, տանում է քաղաքացիական հիվանդանոց ստուգումների, բայց նրա ճնշումը շատ է բարձրանում եւ իջնում է շատ դժվարությամբ: Այդ ամենը կա փաստաթղթերով: Իրականում շատ ծանր է նայել, թե քեզ ինչպես էին խոշտանգում: Պետք է իր հետ աշխատեին հոգեբաններ, բայց դա չկա»,- ասաց փաստաբանը:

Խոսվե՞լ էր այս խոշտանգման մասին նախքան տեսանյութի հրապարակումը՝ հարցին ի պատասխան՝ Արա Ղարագյոզյանը հիշեցնում է. «2008 թ. մարտիմեկյան դեպքերից հետո բոլորը վախեցած էին, իսկ բաժիններում ակնհայտ խոշտանգումներ են եղել, որ չեն բացահայտվել: Նույնիսկ երբ մարդը հայտարարում էր խոշտանգման մասին, ինքն էր սուտ մատնության հոդվածով հայտնվում մեղադրյալի աթոռին: Միայն վերջին տարիներին է, որ իրավապաշտպաններս խոսում ենք խոշտանգումների մասին».:

Նախքան այս տեսանյութի հրապարակումն արյունոտ հակագազի մասին խոսել էր միայն Խոշտանգումների կանխարգելման կոմիտեն, երբ Արաբկիրի ոստիկանական բաժնի սենյակներից մեկի բազմոցի հետեւից գտել էին այն: «Իրենց 2015 թ. զեկույցում էլ նշել էին, որ կառավարությանն այդ մասին հարցեր էին ուղղել, բայց այդպես էլ այս տարիների ընթացքում ոչ մի բան չպարզվեց, եւ նախկին կառավարությունն այդպես էլ չպատասխանեց, թե այդ ինչ արյան հետքեր էին հակագազի վրա»,- նշեց նա: Հիմքեր կա՞ն պնդելու, որ այդ հակագազը կիրառվել է նաեւ այլ անձանցից ցուցմունք կորզելու նպատակով, փաստաբանը նշեց, որ բավարար հիմքեր նման բան պնդելու կամ հերքելու համար չկան:

Արմեն Մարտիրոսյանն առաջին անգամ դատապարտվել է գողության մեղադրանքով: Փաստաբանը նշում է, որ նույնիսկ եթե խոշտանգմամբ ցուցմունք կորզելու փաստը նկատի չառնենք, միայն խոստովանական ցուցմունքի հիման վրա մարդը չպիտի դատապարտվի: «Նույնիսկ մեր Քր. դատ. օրենսգիրքն է արգելում, որ մեկ անձի խոստովանական ցուցմունքը դրվի մեղադրանքի հիմքում: Իսկ այս պարագայում հիմք է ընդունվել միայն խոստովանական ցուցմունքը, եւ կայացվել է մեղադրական դատավճիռ»,- ասաց նա:

Տուժողի կնոջ քրոջ՝ Մերի Գրիգորյանի խոսքով՝ ակնհայտ է, որ գողությանը նա անմասն է եղել. «Տեսանյութում պարզ լսվում է՝ երբ խփում են, նա բղավում է՝ ինչ թուղթ ստորագրեմ, բերեք՝ ստորագրեմ, այսինքն՝ ինքը նույնիսկ տեղյակ չէ՝ ինչ մեղադրանքի մասին է խոսքը»:

Խոշտանգմամբ ձեռք բերված ցուցմունքի հիման վրա Արմեն Մարտիրոսյանին դատապարտել են 2.5 տարվա ազատազրկման: «Պատիժը կիրառվել է պայմանական, քանի որ առկա է եղել խոստովանությունը»,- ասաց փաստաբանը:

Արմեն Մարտիրոսյանն այժմ մեղավոր է ճանաչվել թմրանյութերին առնչվող գործով եւ դատապարտվել ազատազրկման: Մերի Գրիգորյանը նշում է, որ իր անձնական փոքրիկ հնարավորությունների շրջանակում կազմակերպած հետաքննությունից արդեն իսկ ապացույցներ է ձեռք բերել, որ կասկածի տակ են դնում նաեւ այս դատապարտության իրավաչափությունը: Հավելեց, որ Մարտիրոսյանի կինն ու անչափահաս երեխան եւս ունեն առողջական խնդիրներ:

Ո՞րն է պահանջը՝ այս հարցին փաստաբանը պատասխանում է միանշանակ. «Պահանջում ենք՝ արդյունավետ քննություն անցկացվի... երկար չենք սպասելու, եթե մենք տեսնենք, որ Հայաստանում արդյունավետ քննություն չի իրականացվում, դիմելու ենք ՄԻԵԴ»:

Իրավական գործընթացներում դատարանների ներկայիս ծանրաբեռնվածությամբ ձգձգումները չե՞ն կարող տրամաբանորեն հիմնավոր լինել՝ Արա Ղարագյոզյանը վստահ է՝ ոչ: «ՄԻԵԴ-ի որոշումներով հստակ նախատեսված է, որ խոշտանգումների գործերի քննությունը պետք է արագ իրականացվի: Իսկ եթե դեպքից անցել է արդեն երկու ամիս, դեռ մեղադրյալ չկա, արդեն հիմնավոր կասկած է առաջանում այդ առումով: Մամուլով անուններ են շոշափվում, որ այս կամ այն մարդն է տեսանյութում, իսկ մեղադրյալ չկա»,- ասաց փաստաբանը:

Արմեն Մարտիրոսյանին խոշտանգելու դեպքով ՀՔԾ-ում հարուցվել է քրգործ: ՀՀ ոստիկանությունն ավելի վաղ հայտնել էր, որ տեսանյութում երեւացող 3 անձանց ինքնությունը հայտնի է. նրանցից մեկի լիազորությունները կասեցվել են (Ճամբարակի ոստիկանապետ Նարեկ Սիմոնյանի,-հեղ.), իսկ երկուսը ոստիկանության նախկին ծառայողներ են:

Կարմեն Մարտիրոսյան