Նիկոլ Փաշինյանը հանդիպել է ՀՖՖ նորընտիր նախագահ Արմեն Մելիքբեկյանի հետ (տեսանյութ, թարմացված)

ՀՀ վարչապետ Նիկոլ Փաշինյանը հանդիպել է Հայաստանի ֆուտբոլի ֆեդերացիայի նորընտիր նախագահ Արմեն Մելիքբեկյանի հետ: Հանդիպումը տեղի է ունեցել այսօր՝ դեկտեմբերի 24-ին: Փաշինյանը շնորհավորել է Մելիքբեկյանին՝ երեկ տեղի ունեցած ՀՖՖ 19-րդ արտահերթ ժողովում նախագահ ընտրվելու համար եւ խոսել ֆուտբոլի կարեւորությունից:

«Նախ, թույլ տվեք շնորհավորել Ձեզ ՀՖՖ նախագահ ընտրվելու առիթով: Ասեմ, որ Հայաստանում եւ կառավարությունում շատ են ֆուտբոլի եւ ՀՀ ֆուտբոլի ազգային հավաքականի երկրպագուները, եւ, բնականաբար, մենք անտարբեր չենք պրոցեսների նկատմամբ, որոնք տեղի են ունենում ֆուտբոլում եւ ֆուտբոլի ֆեդերացիայում: Ֆուտբոլը մեզ համար 3 պատճառով շատ կարեւոր է. առաջին, ֆուտբոլի զարգացումը մեզ համար ռազմավարական նշանակություն ունի, որովհետեւ կարծում եմ եւ հույս ունեմ, որ ՀՀ-ում արտահայտված բովանդակային փոփոխություններն արտահայտություն կգտնեն նաեւ ֆուտբոլում, եւ ինչ-որ առումով մեր երկրում ֆուտբոլը եւ ֆուտբոլի ազգային հավաքականն իր արդյունքներով կարտահայտի մեր ազգային եւ պետական հավակնությունները:

Երկրորդ, կարծում եմ՝ ՀՖՖ նախագահի երեկ կայացած ընտրությունը կարեւոր է, որովհետեւ կառավարության համար կոռուպցիայի դեմ պայքարի համատեքստում էական է սպորտի ապաքրեականացումը եւ սպորտի ախտազերծումը կոռուպցիայից: Ցավոք, շատ դեպքերում մենք տեսնում ենք, որ քրեական ենթամշակույթ ունեցող եւ կոռուպցիոն շրջանակները ներթափանցած են եւ ներթափանցում են սպորտի, ֆուտբոլի բնագավառ: Պետք է այստեղ էլ ապահովենք քրեական եւ կոռուպցիոն հարաբերությունների բացառումը: Ես, իմանալով նաեւ Ձեր անցած ճանապարհը, համոզված եմ, որ Դուք սկզբունքորեն այդ գծին հետեւողական կլինեք:

Երրորդ, հնարավորությունների զարգացման առումով... որովհետեւ մենք ասել ենք՝  ամենակարեւոր հարցը, որ ՀՀ քաղաքացիների համար պետք է լուծվի, հնարավորությունների զարգացումն է: Ֆուտբոլն այն ոլորտներից է, որտեղ բազմաթիվ պատանիներ, աղջիկներ կարող են իրենց հնարավորությունները զարգացնելու եւ օգտագործելու ներշնչանք գտնել: Շատ կարեւոր է, որ մենք ՀՀ-ում զարգացնենք ֆուտբոլային ենթակառուցվածքը նաեւ որպես հանրային կյանքի կազմակերպման կարեւոր ատրիբուտ»,- ասել է Փաշինյանը:

Վարչապետը նաեւ նշել է, որ ՀՖՖ-ն ՀՀ կառավարության եւ միջազգային կառույցների հետ աշխատելու մեծ պոտենցիալ ունի եւ պետք է օգտագործի դա: Մելիքբեկյանը շնորհակալություն է հայտնել շնորհավորանքի համար: Նա ընդգծել է, որ ՀՀ-ում երկար տարիներ չեն եղել մրցակցային ընտրություններ, եւ սա կարեւոր առաջընթաց է:

«Շնորհակալ եմ շնորհավորանքների համար՝ ոչ թե իմ, այլ ֆուտբոլային ընտանիքի անունից: Մենք երկար տարիներ չէինք ունեցել մրցակցային ընտրություններ ՀՖՖ-ում: Դա տեղի ունեցավ եւ դա կարեւորագույն նշան է, որ Հայաստանում ֆուտբոլը պետք է գնա առողջացման ուղղությամբ: Ինչ վերաբերում է կոռուպցիային հակազդելու մեխանիզմներին, Դուք գիտեք եւ հանրությունը հետեւում է վերջին շրջանում համաշխարհային ֆուտբոլում այդ դրական զարգացումներին: Ե՛վ ՈՒԵՖԱ-ում, ե՛ւ ՖԻՖԱ-ում եղան 2016-ին աղմկահարույց իրադարձություններ, երբ հրաժարական տվեց ՖԻՖԱ-ի նախագահը, ՈՒԵՖԱ-ի նախագահը, եւ այնտեղ էլ առողջացման գործընթացը շարունակվում է: Իհարկե, մենք համագործակցում ենք նաեւ միջազգային կառույցների՝ ՈՒԵՖԱ-ի եւ ՖԻՖԱ-ի հետ այդ ուղղությամբ, եւ մենք անելու ենք առավելագույնը, որպեսզի Հայաստանի ֆուտբոլը զերծ մնա նման երեւույթներից»,- ասել է նա՝ ավելացնելով, որ մարզական առումով էլ ՀՖՖ-ն հավակնոտ ծրագրեր ունի, մասնավորապես ամեն ինչ պետք է անի, որ մինչեւ 2025 թ. հավաքականը մասնակցի Եվրոպայի կամ աշխարհի առաջնությանը:

Նիկոլ Փաշինյանը նաեւ ընդգծել է ֆուտբոլի եւ ընդհանրապես սպորտի ապաքաղաքականացումը: Դա, ըստ նրա, շատ կարեւոր խնդիր է: Վարչապետը չի ընդունում այն, որ սպորտը եւ մարզիկները հաճախ օգտագործվում են տարբեր անձանց կամ ուժերի անձնական շահի համար:

«Պետք է ֆուտբոլը եւ սպորտը ապաքաղաքականացնելու խնդիր դնենք: Դա կարծում եմ՝ մեր հաջորդ մեծ խնդիրներից մեկն է, քանի որ շատ դեպքերում փորձ է արվում սպորտը ծառայեցնել ինչ-որ խմբերի, ուժերի, անհատների, կոնկրետ քաղաքական եւ ոչ քաղաքական ամբիցիաների: Չի կարելի թույլ տալ, որ պետության եւ երկրի առաջ մեծ ծառայություններ ունեցող մարզիկները դառնան ֆոն ինչ-որ խմբերի կամ անհատների ինքնագովազդի եւ քաղաքական ինչ-որ պրոցեսների համար»,- ասել է նա:

Փաշինյանը նաեւ ընդգծել է՝ շատ կարեւոր է, որ ֆուտբոլը զարգանա նաեւ որպես տնտեսության ճյուղ: Նրա կարծիքով՝ նախկինում այդպես չի եղել, քանի որ ինչպես մյուս բնագավառներում, այնպես էլ ֆուտբոլում եղել են մենաշնորհներ, չարաշահումներ, հնարավորությունների սահմանափակումներ: Նա նաեւ կարեւորել է ֆուտբոլի զարգացումը մարզերում՝ ընդգծելով, որ պետք է ոչ միայն ենթակառուցվածքները զարգացնել, այլեւ ֆուտբոլային կյանք ապահովել: Մելիքբեկյանն էլ նշել է, որ մի քանի օրից մարզերում անցնող տարում կառուցված փոքր խաղադաշտերի թիվը կհասցնեն 51-ի ու ունեն եւս 30 խաղադաշտի ծրագիր: