Դատական իշխանությունն ուզուրպացնելու նկրտումներ կան․ Լիլիթ Մակունցը՝ Հրայր Թովմասյանի հայտարարության մասին

Իշխանություններն այս ընթացքում արել են առավելագույնը, որպեսզի ՍԴ շուրջ ստեղծված ճգնաժամը չխորանա։ Ազգային ժողովում լրագրողների հետ զրույցում ասաց «Իմ քայլը» խմբակցության ղեկավար Լիլիթ Մակունցը՝ հավելելով, որ դա արել են Սահմանադրության տառին հետեւելով, ինչը, նրա խոսքով, արտացոլված է նաեւ ԵԽԽՎ համազեկուցողների մեկնաբանություններում։

Մակունցի խոսքով՝ Սահմանադրական դատարանն ունի լեգիտիմության խոր դեֆիցիտ․

«ՀՀ քաղաքացին մեր առաջ լեգիտիմության այդ դեֆիցիտը վերականգնելու պահանջ է դնում, եւ մենք՝ որպես առաջնային մանդատ կրող ինստիտուտ, պարտավոր ենք այս հարցին հանգուցալուծում տալ»,- ասաց խմբակցության ղեկավարը։

Շարունակելով իր պնդումը, որ իշխանությունները ՍԴ ճգնաժամը չխորացնելու համար արել են առավելագույնը՝ Մակունցը նկատեց, որ հակառակն են արել ՍԴ անդամները։ Պատգամավորը պարզաբանեց, որ այս ասելով՝ նկատի ունի այն, որ ՍԴ նախագահի պարտականությունները կատարող Հրայր Թովմասյանը հնչեցնում է քաղաքական տեքստեր՝ լինելով ՍԴ նախագահի պաշտոնում․

«Հրայր Թովմասյանը խոսում է խրամատներից, ինչն արդեն իսկ քաղաքական տեքստ է, եւ դրանից ենթադրվում է, որ խրամատի հակառակ կողմում որպես թշնամի մենք ենք։ Հ1-ի ռեպորտաժում էլ տեսանք, որ ԱԱԾ-ն ի պատասխան հարցման՝ տեղեկատվություն էր տրամադրել, որ Մարտի 1-ի գործով ամբաստանյալ Ռոբերտ Քոչարյանի պաշտպանը մի քանի անգամ այցելել է ՍԴ։ Կամ, այլ օրինակ, որ Հրայր Թովմասյանը ներկայանում է՝ որպես դատական իշխանության ղեկավար, իսկ դա այդպես չէ։ Դա նշանակում է, որ դատական իշխանությունն ուզուրպացնելու նկրտումներ կան։ (Հրայր Թովմասյանն իր հարցազրույցներից մեկում հայտարարել էր, թե ինքը դատական իշխանության ղեկավարն է): Չնայած իշխանությունների ջանքերի՝ չթողնել՝ ճգնաժամը խորանա, հակառակն է տեղի ունեցել ՍԴ-ի կողմից»,- ասաց «Իմ քայլը» խմբակցության ղեկավարը։ 

Մակունցը, խոսելով ՍԴ ճգնաժամը լուծելու հանրային պահանջի մասին, հիշեցրեց, որ հոկտեմբերից սկսած՝ միջազգային երկու կարեւորագույն կառույցների հարցումների համաձայն՝ ՀՀ բնակչության 90,5 տոկոսը կառավարող ուժից երկու ուղղությամբ կտրուկ եւ հետեւողական գործողություններ է սպասում․ մեկը՝ կոռուպցիայի դեմ պայքարում, մյուսը՝ դատական համակարգում բարեփոխումներ անելու հարցում․

«Սա հիմք է հանդիսանում՝ կարծելու, որ քաղաքացիներն սպասում են ճգնաժամի լուծմանը»։

Հենց այս կապակցությամբ էլ, ինչպես հայտնեց Մակունցը, «Իմ քայլը» խմբակցությունը փետրվարի 6-ին արտահերթ նիստ է նախաձեռնել․

«Մենք անհրաժեշտ ենք համարում հրավիրել արտահերթ նիստ, եւ դրա ամբողջ իմաստը նշածս խնդիրներին լուծում տալն է»։

Արտահերթ նիստին քննարկվելու են «Իմ քայլը» խմբակցության պատգամավոր Վահագն Հովակիմյանի հեղինակած նախագծերը, որոնցով նա առաջարկում է ոչ պարտադիր դարձնել ԱԺ կողմից սահմանադրական փոփոխությունների նախագիծը մինչեւ ընդունելը Սահմանադրական դատարան ուղարկելու նորմը։

Մակունցն ասաց, որ ԱԺ խորհուրդը դեռ պետք է քննարկի հարցը, ինչից հետո կնշանակվի արտահերթ նիստ, որի ընթացքում նախագծի հեղինակը կներկայացնի առաջարկվող փոփոխությունների առանցքում դրված խնդիրները․

Մակունցն այս պահին բովանդակային մեկնաբանություններից զերծ մնաց։ Ասաց՝ նիստը հաստատելուց հետո «Իմ քայլը» հանդես կգա մեկնաբանություններով․

«Բոլոր քննարկումները կանենք արտահերթ նիստի ընթացքում, նպատակը մեկն է՝ շուտափույթ լուծել ՍԴ ճգնաժամը։ Նպատակահարմար չեմ գտնում ասել՝ ինչպես, կարծում եմ՝ կարեւոր է քննարկումը, լիագումարին մեկնաբանություններ կանենք, մյուս խմբակցություններն էլ հնարավորություն կունենան իրենց դիրքորոշումը հայտնել։ Արտահերթ նիստն անհրաժեշտ է՝ ՍԴ-ի շուրջ ճգնաժամին հանգուցալուծում տալու համար, եւ պատգամավոր Վահագն Հովակիմյանն ունի դրա լուծման իր տարբերակը»,- ասաց «Իմ քայլը» խմբակցության ղեկավար Լիլիթ Մակունցը։