Կառավարությունը հստակ քայլեր է մշակել մեր բիզնեսին աջակցելու համար. առաջին փաթեթները կընդունվեն հինգշաբթի

Արժույթի միջազգային հիմնադրամն արդեն արձանագրել է, որ 2020 թվականը անկումային է լինելու համաշխարհային տնտեսությունների համար: Այսօր ՀՀ քաղաքացիներին ուղղված ուղերձում այս մասին հայտարարեց ՀՀ վարչապետ Նիկոլ Փաշինյանը: Ըստ նրա՝ որոշ գնահատականների համաձայն այդ անկումն ավելի խորն է լինելու, քան 2008, 2009 թվականների տնտեսական ճգնաժամի ընթացքում է եղել:

«Հայաստանի պարագայում կանխատեսումներ այս պահի դրությամբ դրական են, բայց ակնհայտ է, որ մենք կորցնելու ենք աճի այն տեմպը, որը համատեղ աշխատանքի արդյունքում ձեւավորեցինք 2019 թվականին: Բայց ինչպես ասել եմ նախկինում՝ այս իրավիճակը մենք ընկալելու ենք ոչ թե որպես ողբերգություն, այլ որպես նոր հնարավորություն համաշխարհային տնտեսության մեջ Հայաստանի տեղադիրքը փոխելու, տնտեսական հեղափոխության մեր օրակարգը ավելի արդյունավետ եւ կրկնապատիկ տեմպերով կյանքի կոչելու համար: Աշխարհում ՀՆԱ-ի 3 տրիլիոն դոլարանոց անկում է լինելու, այսինք համաշխարհային շուկայում այդքան տեղ է ազատվելու, եւ մենք պետք է այսօրվանից մեզ տրամադրենք, որ այդ ազատված տեղից առնվազն 30 մլրդ դոլարանոց հատվածը հենց Հայաստանն է զբաղեցնելու ու այս խնդիրը պետք է լուծվի առաջիկա 5 տարվա ընթացքում»,- ընդգծեց վարչապետը եւ հավելեց, որ ինքը հավատում է՝ դա հնարավոր է անել:

Խոսելով հայ գործարարների մասին՝ Փաշինյանն ասաց, որ այսօր ամբողջ աշխարհն է հիացած հայ գործարարի տաղանդով, որոնց շնոհիվ կորոնավիրուսի ճգնաժամային պահին Հայաստանը պարենային եւ լայն սպառման ապրանքների որեւէ դեֆիցիտ չունեցավ եւ չունի:

«Այսպիսի արդյունքով չեն կարող պարծենալ աշխարհի շատ զարգացած երկրներ: Եվ սա մեր գործարարների, աշխատող հայ մարդու տաղանդի շնորհիվ: Ուզում եմ ասել, որ կառավարությունը հստակ քայլեր է մշակել մեր բիզնեսի մրցունակ եւ հեռանկարային հատվածին աջակցելու համար: Առաջին փաթեթները կընդունվեն հինգշաբթի կայանալիք կառավարության նիստում: Ընդհանուր առմամբ կառավարությունը շուրջ 150 մլրդ դրամ է տրամադրելու իրականում ոչ թե ճգնաժամային այս իրավիճակին դիմակայելու, այլ ետճգնաժամային վիճակում մեր հաղթանակները նախապատրաստելու համար: Կառավարության առաջիկա նիստում կընդունենք նաեւ գյուղատնտեսության խթանման լայնածավալ ծրագիր: Ինչպես եւ խոստացել էի՝ բոլոր տեսակի նոր տրամադրվող գյուղվարկերի տոկոսները կզրոյացվեն, ինչպես նաեւ առանձնահատուկ պայմաններ կստեղծվեն ռեալ աշխատող եւ նոր ձեւավորվող գյուղատնտեսական կոոպերատիվների համար»,- նկատեց Նիկոլ Փաշինյանը:

Այնուհետեւ վարչապետը նկատեց, որ գյուղատնտեսական գործունեությունն այս օրերին չպետք է արգելակվի: Նա կոչ արեց մեր բոլոր գյուղացիներին ակտիվորեն զբաղվել գարնան գյուղատնտեսական աշխատանքներով:

«Պարետատան որոշմամբ գործունեության այդ տեսակը համարվել է կենսական: Ասեմ նաեւ, որ կառավարության առաջիկա նիստում հատուկ փաթեթ կընդունվի գործող բիզնեսների լիկվիդայնության, հնարավոր խնդիրները չեզոքացնելու եւ անհրաժեշտ լիկվիդայնությամբ ապահովելու, այդ թվում, աշխատատեղերը պահպանելու եւ աշխատավարձերը վճարելու համար: Կառավարությունը շարունակում է աշխատել սոցիալական աջակցության փաթեթը, որի համար տրամադրելու ենք շուրջ 25 մլրդ դրամ, առավել հասցեական եւ արդյունավետ ծախսելու ուղղությամբ: Եվ այդ բոլոր ուղղություններով մեր աշխատանքները չեն դադարելու: Մենք նորանոր գաղափարներ, փաթեթներ, ծրագրր, հնարավորություններ ենք ներդնելու այս ճգնաժամային իրավիճակում աշխատանքը եւ աշխատող մարդկանց աջակցելու համար: Սա դուրս է եւ վեր է որեւէ կասկածից»,- վստահեցրեց վարչապետը: