Դա ինձ համար կլինի բարոյական ավարտ. Փաշինյանը՝ նախկին իշխանություններին նմանվելու, նրանց թալանածը հետ բերելու մասին

Այսօր տեղի ունեցած ֆեյսբուքյան հարցուպատասխանի ընթացքում ՀՀ վարչապետը պատասխանեց նախկին իշխանության ներկայացուցիչներին պատժելու, թալանածը վերադարձնելու մասին մի քանի հարցերի:

«Ես չեմ ուզում, որեւէ մեկի անմեղության կանխավարկածը խախտել, բայց ուզում եմ ասել, որ այսօր կոռուպցիոներների պատասխանատվության կանչելու ամենակարեւոր խոչընդոտը էֆեկտիվ դատաիրավական համակարգի գոյությունն է». Փաշինյանը մասնավորապես այսպես արձագանքեց հարցին, թե ե՞րբ է Սերժ Սարգսյանը պատասխան տալու իր բոլոր արարաքների համար։

«Մենք պետք է այդ համակարգի արդյունավետությունը քայլ–քայլ բարձրացնելով լուծենք բոլոր այն մարդկանց պատասխանատվության հարցը, ովքեր օրենքով արդարության եւ արդարադատության համաձայն իրոք գործել են արարքներ, որոնց կապակցությամբ պետք է պատասխանատվության ենթարկվեն։ Իմ գնահատականները դուք գիտեք, ես տվել եմ այդ թվում ոչ հեռավոր անցյալում, բայց ես չեմ ուզում հիմա այնպիսի արտահայտություն անեմ, որը հետագայում կարող է մեկնաբանվել ընդդեմ արդարադատության շահերի»,– ասաց Փաշինյանը։

Անդրադառնալով ընդհանուր առմամբ կոռուպցիոն գործերի քննությանը՝ վարչապետն ասաց, որ գոհ չէ ընթացքից:

«Մենք փորձել ենք դուրս բերել պատճառները, հիմա էլ պրոցեսը ընթացքի մեջ է, թե որտեղ են, որ կան օբյեկտիվ պատճառներ, որտեղ կան սուբյեկտիվ պատճառներ, որ այդ գործերն արդյունավետ կերպով առաջ չեն ընթանում: Իմ գործընկերները գիտեն, որ եթե արդյունավետությունը չբարձրանա, մենք այլ կարգի որոշումներ պետք է կայացնենք»,- ասաց Փաշինյանը:

Հարցին, թե դեռ որքան հայ ժողովուրդը պետք է սպասի, որ նախկին կոռումպացված թալանչիների գույքն ու միլիարդավոր դոլարների թալանը վերադարձվի, Փաշինյանը պատասխանեց.

«Խնդիրը միայն այդ բռնագանձված եւ բռնագանձվելիք գումարները չեն: Խնդիրն այն է, որ 2018-ից ի վեր մինչեւ այս պահը Հայաստանի բյուջեի եկամուտներն ավելացել են 1 մլրդ 100 մլն դոլարով: Դա ի կատարումն իմ նախահեղափոխական խոստման, որ առաջին 1-2 տարում բյուջեի եկամուտները պետք է աճեն 30-35 տոկոսով: Հիմա մենք ունենք ցուցանիշ, որ դրանք աճել են 40-45 տոկսոով: Բա այդ փողը որտեղի՞ց, օդի՞ց ընկավ: Դա ստվերի դեմ պայքարն է, մենաշնորհների դեմ պայքարն է, կոռուպցիայի դեմ պայքարն է, որոնց արդյունքներով այդ գումարները վերադարձվել են պետական բյուջե: Կան նաեւ քրգործերով վերադարձված գումարներ, որոնցից ես գոհ չեմ, բայց 40 մլրդ դրամ այս պահին հետ է բերվել: Իսկ հարուցված քրգործերը վերաբերում են 190 մլրդ դրամի չարաշահումների: Բայց սա ամբողջը չի: ՀՀ-ում կոռուպցիայի դեմ պայքարը շարունակվելու է եւ ամեն ինչ անելու ենք դրա էֆեկտիվությունը բարձրացնելու համար»:

Հարց հնչեց նաեւ այն մասին, թե «թավիշը» երբ է պակասելու, որը շատերն ընդունում են որպես թուլություն: «Ես կարծում եմ, որ պետք է երկրում լինի լավ մթնոլորտ: Մենք ժողովրդավարական երկիր ենք եւ պետք է շարունակենք այդպիսին մնալ: Մենք չենք եղել եւ չենք լինելու դիկտատուրա, բայց կարծում եմ, որ իշխանությունը, այո, պետք է լինի կոշտ, ինչը հավասար է օրինականի: Օրենքից ավելի կոշտ կամ պակաս կոշտ պետք չի լինել»,- նկատեց վարչապետը:

Ե՞րբ են նախկին մարդասպաններն ու հանցագործները պատժվելու, արդյոք չի՞ կարծում, որ նմանվում է նախկին իշխանություններին: Ահա այս հարցին ի պատասխան էլ Փաշինյանն ասաց.

«Ոչ, չեմ կարծում, անկեղծ ասած, որ նախկիններին նմանվում եմ: Եթե ես նախկիններին նմանվեմ, զգամ, որ նմանվում եմ՝ նույն պահին կհեռանամ այս կաբինետից, որովհետեւ դա ինձ համար կլինի բարոյական ավարտ, որը ես թույլ չեմ տա»։

Խոսելով նախկին հանցագործներին պատժելու մասին՝ վարչապետը հավելեց. «Ինչո՞ւ միայն նախկին հանցագործներին եւ մարդասպաններին, իսկ ո՞վ է ասել, որ նախկին հանցագործներն ու մարդասպանները պետք է պատժվեն, իսկ ընթացիկ հանցագործներն ու մարդասպանները պետք է չպատժվեն»։