«Ռոբերտ Քոչարյանը չուներ այդ հրամանագրերը ստորագրելու լիազորություն». կայացավ Ջհանգիրյանն ընդդեմ Քոչարյանի գործով նիստը

ՀՀ վարչական դատարանում դատավոր Ալեքսանդրա Հարությունյանի նախագահությամբ այսօր կայացել է Գլխավոր դատախազի նախկին տեղակալ Գագիկ Ջհանգիրյանն ընդդեմ Ռոբերտ Քոչարյանի գործով առաջին դատական նիստը:

Հիշեցնենք՝ Գագիկ Ջհանգիրյանը վիճարկում է Ռոբերտ Քոչարյանի կողմից դեռեւս 2008 թվականին իրեն Գլխավոր դատախազի տեղակալի պաշտոնից ազատելու, ինչպես նաև՝ արդարադատության առաջին դասի պետական խորհրդականի դասային աստիճանից զրկելու մասին  հրամանագրերը: Նա հայցադիմումը դատարան է ներկայացրել 2019 թվականի նոյեմբերին, եւ այս ամիսների ընթացքում նշանակված դատական նիստը կորոնավիրուսով պայմանավորված հետաձգվել էր:

Հայ ազգային կոնգրեսի իրավական ներկայացուցիչ Արմեն Խաչատրյանը «Հայկական ժամանակ»-ի հետ զրույցում տեղեկացրեց, որ Ջհանգիրյանն այսօրվա նիստին չի մասնակցել, տեղի է ունեցել նախնական դատական նիստ, որի ընթացքում հայցվոր կողմը ներկայացրել է հայցադիմումի առարկան, հիմքերը: Հիմնավորումները, ըստ Խաչատրյանի, ծավալուն են, սակայն հիմնականն այն է, որ նախագահը, որպես այդպիսին, չի ունեցել լիազորություններ այդ երկու հրամանագրերը ստորագրելու. «2008 թվականին գործող Սահմանադրության 55-րդ հոդվածը սպառիչ թվարկում է նախագահի լիազորությունների սահմանը, որոնց մեջ մտնում է կոչումներ շնորհելը, բայց դրանցից զրկելու վերաբերյալ որեւէ բան գրված չէ, այսինքն՝ նախագահին տրված չէ լիազորություն՝ անձին կոչումից զրկելու, եւ որպես այդպիսին, նման անձ էլ չկա. դասային աստիճաններից, պարգեւներից, կոչումներից անձը կարող է զրկվել բացառապես դատարանի որոշմամբ»:

Ինչ վերաբերում է Գլխավոր դատախազի տեղակալի պաշտոնից ազատելուն, այս դեպքում, ըստ Խաչատրյանի, խաթարվել են իրավական գործընթացները. «Որպեսզի նախագահը լիազորված լիներ Գլխավոր դատախազի տեղակալին աշխատանքից ազատել, ապա այն ժամանակ գործող «Վարչական վարույթի եւ վարչարարության մասին» ՀՀ օրենքի 62-րդ հոդվածի 1-ին մասի 4-րդ կետով՝ պետք է ապահովված լինեին բոլոր վավերապայմանները տեղակալին աշխատանքից ազատելու համար, էթիկայի հանձնաժողովի իրավաչափ որոշում պետք է լիներ, որը այս դեպքում չի եղել, կամ որոշումը իրավաչափ չի եղել, որից հետո պետք է նորից որոշակի գործընթաց լիներ»: Արմեն Խաչատրյանը շեշտեց, որ «Դատախազության մասին» օրենքով՝ որպես տույժ կարող էր նաեւ կիրառվել դասային մեկ աստիճանի իջեցում, այլ ոչ թե ամբողջությամբ զրկում, բայց դա էլ պիտի արվեր դատարանի որոշմամբ:

Խաչատրյանի խոսքով՝ գործում կան նաեւ փաստեր, ըստ որոնց՝ ոչ միայն խախտված են եղել կարգապահական վարույթի ժամկետները, այլ առկա է եղել պաշտոնեական կեղծիք. «Ամսաթվեր են հետ ու առաջ արվել, որոնք արդեն դատաքննության փուլում կմանրամասնենք»: Հարցին՝ պաշտոնեական կեղծիքը հետագայում կարո՞ղ է քրեական գործի հարուցման հիմք հանդիսանալ, Խաչատրյանը պատասխանեց. «Ցավոք սրտի, վաղեմության ժամկետներն արդեն անցել են, բայց ամեն դեպքում, գործընթացը խաթարված է եղել, առանց փաստական հիմքերի նախագահը լիազորություն չուներ Դատախազի տեղակալին ուղղակի հրամանագրով աշխատանքից ազատելու»: Ինչ վերաբերում է առոչինչ պահանջով հայցերի համար վարչական վարույթի ժամկետներին, այն օրենքով սահմանափակված չէ. «Այսինքն՝ ցանկացած փուլում, եթե հայտնի են դառնում առոչինչ ճանաչելու հիմքեր, անձը կարող է դիմել դատարան»:

Նրա համոզմամբ՝ հայցադիմումը պետք է դիտարկել 2008 թվականին գործով իրավակարգավորումների շրջանակում, որովհետեւ փոխվել է թե Սահմանադրությունը, թե «Դատախազության մասին» օրենքը. «Բազմաթիվ դրույթներ փոխվել են նաեւ Աշխատանքային օրենսգրքում, Վարչական դատավարության օրենսգրքում, եւ եթե չեմ սխալվում, նաեւ «Վարչարարության հիմուքների եւ վարչական վարույթների մասին» օրենքում»,- նշեց նա: Արմեն Խաչատրյանը հիշեցրեց՝ նախկինում այս հրամանագրերը իրենց բողոքարկել էին անվավերության հիմքով, սակայն բողոքը մերժվել էր, ինչի դեմ ներկայացվել է Վճռաբեկ բողոք. այն վարույթ ընդունելու վերաբերյալ որոշում դեռեւս չկա:

Նշենք, որ պատասխանող կողմն այսօրվա դատական նիստին չի մասնակցել. «Պատշաճ ծանուցված է եղել, սակայն չի ներկայացել, որքանով հասկացանք, հայցին չեն պատասխանել կամ չեն առարկել, ամեն դեպքում, հաջորդ դատական նիստին կսկսվի բուն դատաքննությունը, մենք կներկայացնենք ապացույցները, փաստական հանգամանքները, գլխավորը դեռ առջեւում է».- նշեց Խաչատրյանը՝ հավելելով, որ հաջորդ նիստի օրվա վերաբերյալ դեռեւս չեն ծանուցվել:

Հիշեցնենք, որ Գագիկ Ջհանգիրյանին զբաղեցրած պաշտոնից ազատելու եւ դատախազության համակարգից հեռացնելու միջնորդությամբ հանդես էր եկել 2008 թվականին գլխավոր դատախազ Աղվան Հովսեփյանը: Դիմելով այդ ժամանակ գործող նախագահ Ռոբերտ Քոչարյանին՝ Հովսեփյանը նշել էր, որ Գագիկ Ջհանգիրյանը կոպտորեն խախտել է «Դատախազության մասին» օրենքի պահանջը, որով դատախազներին արգելվում է զբաղվել քաղաքականությամբ: Դրանից առաջ Ջհանգիրյանն արդեն հայտարարել էր Լեւոն Տեր-Պետրոսյանին սատարելու մասին եւ ելույթ էր ունեցել նրա կազմակերպած հանրահավաքում: Ջհանգիրյանը խոսել էր նախագահական ընտրությունների խախտումների և «Հոկտեմբերի 27-ի» գործի ապօրինությունների մասին: Ելույթի հաջորդ օրը՝ փետրվարի 23-ին,  Ջհանգիրյանը բերման էր ենթարկվել ապօրինի զենք կրելու համար, ապա ձերբակալվել եւ կալանավորվել: Մեկ տարի անց՝ 2009 թվականի մարտի 23-ին, Երեւանի Կենտրոն եւ Նորք-Մարաշ համայնքների առաջին ատյանի դատարանը դատավոր Ժորա Վարդանյանի նախագահությամբ Ջհանգիրյանը դատապարտվել էր 3 տարվա ազատազրկման: Գագիկ Ջհանգիրյանի պաշտպանները բողոքարկել էին նրա դատավճիռը, որը Վերաքննիչ քրեական դատարանը իր 2009 թվականի մայիսի 20-ի որոշմամբ թողել էր անփոփոխ: Հեղափոխությունից հետո՝ արդեն 2019 հուլիսի 31-ին, Ջհանգիրյանը Վճռաբեկ բողոք էր ներկայացրել: Վճռաբեկ դատարանը դատավոր Համլետ Ասատրյանի նախագահությամբ սեպտեմբերի 18-ին բեկանել էր Ջհանգիյանի մեղադրական դատավճիռը՝ արդարացնելով նրան:

Տպել
3023 դիտում

Թուրքական օդուժը Իրաքի հյուսիսում թիրախավորել է բնակավայրեր. կա 2 զոհ

Հրետանավորներն անցկացրել են մասնագիտական պարապմունքներ. ՊՆ

Թրամփն ու ընտանիքը տեղափոխվել է ստորգետնյա բունկեր. ԱՄՆ-ում ցույցերի հետեւանքով 20 զոհ, 4 000 բերման ենթարկված կա

Հաշմանդամություն ունեցող երեխային պետք է սովորեցնել ինքնուրույն կյանք վարելու հմտություններ. ՄԻՊ (լուսանկարներ)

13-ամյա Նազելիի խնամակալությունը կստանձնի Գյումրիում ապրող հորաքույրը. կապրեն այլ հասցեում

Սահմանամերձ Բարեկամավանի միակ շրջանավարտի ավարտական երեկոն․ մի կողմից հակառակորդի հետ սահման, մյուսից՝ անտեսանելի թշնամի

Ամենահաճախակի խախտումները՝ գեղեցկության սրահներում, դեղատներում եւ ստոմատոլոգիական կենտրոններում․ ԱԱՏՄ

Սահմանադրական փոփոխությունների մասին քվեարկությունը ՌԴ-ում կանցկացվի հուլիսի 1-ին

Ակնկալվում է մի քանի անգամ մեծացնել Հայաստան ներմուծվող գազի և Իրան ներմուծվող էլեկտրաէներգիայի ծավալները

Լացող փոքրիկներ, մարզերից եկած հուսախաբ երեխաներ. հունիսի մեկն առանց ատրակցիոնների առաջվանը չէր

ՄԻԵԴ-ի պատասխանից առնվազն պետք է մտահոգվեն այն մարդիկ, որոնք ուղղել են հարցերը․ Վլադիմիր Վարդանյան

Եվրոպայում ֆուտբոլասերներին աստիճանաբար վերադարձնում են խաղադաշտ

ՍԱՏՄ-ն Կենտրոն վարչական շրջանում կասեցրել է կրկնակի խախտում կատարած երկու հանրային սննդի օբյեկտների աշխատանքը 48 ժամով

Օդային հաղորդակցության վերաբացումը կթույլատրվի հուլիսի կեսից. քննարկումն ու ժամկետը նախնական է

22-ամյա երիտասարդը աղջկա մերկ լուսանկարները չտարածելու դիմաց 3 միլիոն դրամ էր պահանջել. երիտասարդը ձերբակալվել է

Վարչապետին ծննդյան օրվա առթիվ շնորհավորական ուղերձ է հղել Ղազախստանի նախագահը

Վաղը հայկական արտադրության թեստերի առաջին խմբաքանակը՝ 350 հատ, կհանձնվի ՀՎԿԱԿ-ին. Տիգրան Ավինյան

Սահմանին գազի ներկա գնի պահպանման պարագայում, կարծում եմ, ՀԾԿՀ-ի հաշվարկները ողջամիտ են․ փոխվարչապետ

Ռեանիմացիոն եւ ինտենսիվ թերապիայի մահճակալային ֆոնդը կհամալրվի մոտ 120 մահճակալով

Տեղից չի շարժվել «Հարսնաքար»-ի սպանության գործը, ինչը դրա հեղինակներին դրդել է նորանոր հանցագործությունների․Բաբաջանյան