Առաջարկում ենք ևս 3 տարով երկարացնել սահմանամերձ բնակավայրերի բնակիչներին տրվող մի շարք արտոնություններ. Գաբրիելյան

«Իմ քայլը» խմբակցության պատգամավորներ Սիսակ Գաբրիելյանը եւ Սիփան Փաշինյանը երեկ շրջանառության մեջ են դրել սահմանամերձ բնակավայրերին սոցիալական աջակցություն տրամադրելու օրինագիծ, որով առաջարկում է ևս 3 տարով երկարացնել մի շարք արտոնություններ:

Տարիներ առաջ ընդունված այդ օրենքով հնարավորություն էր տրվում սահմանապահ տարածքների բնակիչներին պետությունից ստանալ որոշակի աջակցություն՝ հաշվի առնելով նաեւ այն հանգամանքը, որ այդ բնակավայրերում ապրող քաղաքացիները, ցավոք սրտի, ամեն օր վտանգում են իրենց գույքը, կյանքը, առողջությունը՝ կապված հակառակորդի դրսեւորած վայրագությունների հետեւանքով:

«Մենք ցանկանում ենք, որ պետությունը շուրջ 36 բնակավայրի համար մոտ 50 տոկոսով փոխհատուցի էլեկտրաէներգիայի, բնական գազի, ոռոգման ջրի վճարները: Այստեղ, իհարկե, կան սահմանափակումներ մինչև 1450 կՎտ հոսանքի, մինչև 360 խ/մ բնական գազի համար: Ոռոգման ջրի մասով սահմանափակում չունենք. անկախ օգտագործման քանակից, պետությունը մինչև 2024 թվականի հունվարի 1-ը կվճարի այս կոմունալ ծախսերի 50 տոկոսը»,- այսօր ասուլիսի ժամանակ ասաց Սիսակ Գաբրիելյանը:

Նախատեսվում է նաեւ սահմանապահ բնակավայրերում ապրող աշակերտների համար դպրոցական դասագրքերը դարձնել անվճար կամ 50 տոկոսով՝ կախված որոշ չափանիշներից։

Աշխատանքները, պատգամավորի փոխանցմամբ, արդեն սկսվել են, որոշ դեպքերում՝ նույնիսկ ավարտվել․ խոսքը վնասված տների մասին է։ Նախագծով նախատեսվում է նաեւ, որ Ադրբեջանի կողմից հրետակոծության պատճառով վնասված տները, որոնք չեն հանգեցրել օթեւանի կորստի, պետությունն ամբողջությամբ կվերականգնի։ Օթեւանի կորստի դեպքում պետությունը 1 ամսվա ընթացքում պարտավոր է այլ համարժեք բնակարանով ապահովել բնակիչներին։

Հաջորդ փոփոխությունը, որ նախատեսվել է, վերաբերում է գյուղացիների մթերատու կենդանիներին, որոնք կարող են սատկել հակառակորդի կրակոցից։ Գաբրիելյանը շեշտեց, որ սա գյուղացիների խնդրանքն է եղել, եւ հիմա օրենքով ամրագրվում է, որ եթե ռազմական գործողությունների հետեւանքով վնասվեն կենդանիները, ապա պետությունը կտրամադրի փոխհատուցում։ Նախագծով առաջարկվում է նաեւ այս բնակիչներին ամբողջությամբ ազատել հողի հարկից եւ գույքահարկից։

Նաեւ կա մեկ այլ փոփոխություն. եթե հակառակորդի ձեռնարկած ռազմական գործողությունների ընթացքում սահմանապահ բնակիչներից մեկը վիրավորվի եւ ձեռք բերի հաշմանդամության կարգ, ապա նրա բուժօգնությունը կլինի ոչ միայն անվճար, այլեւ, կախված հաշմանդամության կարգից, պետությունից կստանա 1-ից մինչեւ 3 միլիոն դրամ։ Եթե կլինի զոհ, ապա ընտանիքին կտրամադրվի միանվագ 5 մլն դրամ, պետությունն էլ վճարելու է թաղման բոլոր ծախսերը։ Գաբրիելյանը հույս հայտնեց, որ այս վերջին 2 դրույթները երբեւէ չեն օգտագործվի։

Պատգամավորը նշեց նաեւ, որ հիմա մշակվում է մեկ այլ օրենքի նախագիծ՝ սահմանապահ համայնքներում բնակվող ուսանողների ուսման վարձերը որոշակի փոխհատուցելու, մանկապարտեզների դեպքում՝ մինչեւ անվճար դարձնելու համար։

Գաբրիելյանը փոխանցեց, որ այս նախագծի շուրջ Կառավարության հետ շուրջ 4 ամիս քննարկումներ են ունեցել, ուստի եւ շեշտեց, որ այս նախագիծը պայմանավորված չէ Տավուշում տեղի ունեցող վերջին գործողությունների հետ։ Օրենքը առաջին եւ երկրորդ ընթերցմամբ ԱԺ-ում ընդունվելու է մինչեւ տարեվերջ, սակայն, ինչպես շեշտեց պատգամավորը, դասագրքերի մասով բանակցություններ են ընթանում ԿԳՄՍՆ-ի հետ, որ արդեն այս ուսումնական տարվա ընթացքում դասագրքերը լինեն անվճար կամ մասնակի։ Իսկ տները, որոնք վնասվել են, արդեն վերանորոգվում են, որոշ մասի նորոգումն արդեն ավարտվել է։

Հարցին, թե մոտավորապես ի՞նչ գումարի մասին է խոսքը տարեկան կտրվածքով, Գաբրիելյանը պատասխանեց՝ 1-2 միլիոն դոլար։