Հարսանեկան, երեկոյան, առօրյա. դիմակները դարձել են հայկական նորաձեւության անբաժանելի աքսեսուարներ

Դիմակ դնելը կարող է լինել անհարմար, բայց, եթե, այնուամենայնիվ, անհրաժեշտ է անել դա, ապա այն պետք է համապատասխանի արտաքին տեսքին: Սա նորաձեւությանը հետեւողների ու իրենց արտաքին տեսքի նկատմամբ բծախնդիրների մոտեցումն է: Տարբեր ձեւավորումներ ունեցող դիմակները կորոնավիրուսի պանդեմիայի շրջանում Հայաստանում շատ տարածված են: Սա վստահեցնում է երեկոյան զգեստների դիզայներ Աննա Զարգարյանը, որը նաեւ ունի իր Zargaryan Fashion բրենդը: Նրա սրահում հաճախ են դիմակներ պատվիրում, ու «Հայկական ժամանակ»-ի հետ զրույցում նա ընդգծեց, որ դրանց դիզայնին այսօր շատերը մեծ ուշադրություն են դարձնում:

«Այս պահին դիմակները շատ մեծ տեղ ունեն նորաձեւության ասպարեզում, քանի որ յուրաքանչյուր առիթ դիմակներով է նշվում, թեկուզ զուտ այս ժամանակաշրջանը հիշելու նպատակով ֆոտոսեսիա են անում, ու դրա համար հաճախորդները շատ-շատ պահանջում են դիմակներ: Ե՛վ նշադրեքի արարողությունների, ե՛ւ հարսանյաց դիմակների սպառումը գերակշռում է: Նաեւ ինչ-որ դիզայներական մոտիվներով առօրյա կրելի դիմակներ են պատվիրում: Գունային գամման սպեցիֆիկ չէ՝ պաստելայինից սկսած՝ մինչեւ մուգ գույներ դիմակների համար կարող ենք օգտագործել»,- ասաց նա:

^{Հարսանեկան զգեստի դիմակ}

^{Երեկոյան զգեստի դիմակ}

Դիմակները, ըստ էության, դարձել են աքսեսուարներ, որոնք ինչպես, օրինակ, պայուսակը, ականջողերը, լրացնում են արտաքին տեսքը: Ըստ այդմ՝ դրանց ձեւը պայմանավորված է լինում պատվիրատուի հագուստից: Դիմակները համապատասխանեցվում են գույներով, նախշերով, այլ մանրուքներով, որոնք կարելի է նկատել նաեւ զգեստի գործվածքում:

«Հարսանեկան տարբերակներում ավելի շատ օգտագործում ենք տյուլային տարբերակները՝ իրենց համապատասխան զարդանախշերով, իսկ առօրյա կրելին արդեն կախված է հագուստից: Փորձում ենք գունային գամման համապատասխանեցնել…. լինում են ե՛ւ ասեղնագրծություն, ե՛ւ նկարչություն, ե՛ւ քարերով հավաքված տարբերակներ, ինչպես նաեւ գիփյուռ, այսինքն՝ ամեն ինչը կախված է լուքից, լուքի մեջ ինչ տարբերակներ լինում են, մենք փորձում ենք շեշտել նաեւ դիմակների մեջ»,- ասում է դիզայները:

^{Երեկոյան զգեստի դիմակ}

Աննան կարեւորում է այն, որ դիմակները լինեն ոչ միայն գեղեցիկ ու նորաձեւ, այլեւ չկորցնեն իրենց պաշտպանիչ հատկությունը: Հարմարավետությանը նույնպես մեծ ուշադրություն է դարձնում: Այդ պատճառով գնել է հայկական արտադրության տարբեր դիմակներ, որպեսզի փորձի հասկանալ՝ ինչ խնդիրներ ունեն դրանք, ինչ կարելի է անել, որ, օրինակ, դրանցով հեշտ լինի շնչել:

«Փորձել ենք տարբեր արտադրողներից գնել, որպեսզի հասկանանք՝ յուրաքանչյուրի խնդիրները որոնք են, ու ինչի վրա ավելի մեծ շեշտ դնենք: Հիմնականում խնդիրը դժվար շնչելու հետ է կապված, իրենք այնպիսի գործվածքներով են արել, որ շնչելը շատ դժվար է, ու մենք մեր արտադրանքը ստեղծելիս շատ կարեւորություն ենք տվել նրան, որ այնպիսի գործվածքներ օգտագործենք, որ ե՛ւ պաշտպանիչ լինեն, ե՛ւ շնչելը շատ հեշտ լինի, հավելյալ նեղություն հնարավորինս չտա»,- ասաց նա:

Որոշ դիմակներ, բացի շնչելու դժվարությունից, նաեւ այլ խնդիր են առաջացում: Դրանք փակում են տեսադաշտը: Սա իր արտադրանքում Աննան եւս հաշվի է առնում: Փորձում է լուծումներ գտնել, հարմարեցնել, որպեսզի դա եւս չխանգարի կրողին:

«Մենք ձեւվածքի հետ կապված որոշակի լուծումներ ենք գտել, ինչպես նաեւ առաջարկում ենք տյուլային տարբերակներ, որը ե՛ւ պաշտպանիչ է, ե՛ւ, օրինակ, դիմահարդարման առումով է հարմար (դիմահարդարումն առանցքային նշանակություն ունի արարողությունների համար), հնարավորինս փորձարկել ենք, դիմահարդարումը չի մաքրում»,- ասաց նա:

^{Առօրյա հագուստի դիմակ}

^{Առօրյա հագուստի դիմակ}

Աննայի համար շատ կարեւոր է, որ դիմակներ կարելու իր նախաձեռնությունը որպես բիզնես չընակլվի: Ընդգծում է, որ դա անելու հիմնական պատճառն այն է, որ եթե ինքը չկարի, ապա իր հաճախորդն ուրիշից կպատվիրի: Իր սրահում իրենցից զգեստ պատվիրած մարդկանց համար տվյալ հագուստին համապատասխան դիմակ կարում եւ նվիրում է, սակայն լինում են դեպքեր, որ միայն դիմակ են պատվիրում, կամ հաճախորդն իր զգեստի համար ոչ թե սրահի առաջարկած դիզայնով դիմակն է ուզում, որը նվիրում են, այլ հատուկ ձեւավորում, հատուկ կտոր, երբեմն կիսաթանկարժեք քարեր է ցանկանում: Այդ նյութերի ծախսն Աննան չի կարող իրեն թույլ տալ իր միջոցներով հոգալ, ու պատվիրատուն վճարում է դրանց, ինչպես նաեւ լրացուցիչ աշխատանքի համար:

«Օրինակ՝ հարսանյաց արարողությունների համար ասում են, որ մենք այս, այս հավելյալ բաներն ենք ուզում, որ ավելացվեն, այսինքն՝ եթե սովորական՝ մեր դիզայնով, դիմակներն են, նվիրում ենք, երբ մեզնից որեւէ հագուստ են առնում, բայց հիմնականում շատերը ցանկանում են, որ որոշակի ատրիբուտներ ավելացնենք»,- ասաց նա՝ հավելելով, որ կախված քարերից, վրայի կատարված աշխատանքից՝ դիմակի վրա հաճախորդը կարող է ծախսել 3-15 հազար դրամ:

^{Երեկոյան զգեստի դիմակ}

Դիմակներն աքսեսուար են դարձել ոչ միայն Հայաստանում: Ինչպես Աննան նշում է, կորոնավիրուսի պանդեմիայի դեռ սկզբնական շրջանում դրանք իրենց հավաքածուներում սկսել են օգտագործել ճանաչված տարբեր նորաձեւության տներ, բրենդներ, դիզայներներ: Դրանց թվում են Վալենտինոն, Գուչին, Ֆենտին, Էլի Սաաբը եւ այլն: