Քանդակները վերականգնման կարիք ունեն, բայց դրա համար հայտարարված երեք մրցույթին էլ ոչ ոք չի մասնակցել

Կրթության, գիտության, մշակույթի եւ սպորտի նախարարության հայտարարած «Ճանապարհաշինարարաներ» եւ «Արձագանք» արձանների վերականգնման մրցույթն արդեն երրորդ անգամ է՝ չի կայանում: Սեւան-Երեւան մայրուղու վրա գտնվող «Ճանապարհաշինարարների» վերականգնման եւ հարակից տարածքների բարեկարգման համար կառավարությունը դեռ գարնանը հատկացրել է 176 միլիոն դրամ, իսկ Բյուրեղավանում գտնվող «Արձագանքի» համար եւ 76 միլիոն դրամ:

Արձանների վերականգնման ու տարածքի բարեկարգման աշխատանքների համար առաջին մրցույթը հայտարարվել էր հունիսին, ապա հուլիսին: Երկու դեպքում էլ մրցույթը չէր կայացել մասնակից չլինելու պատճառով: Օգոստոսի 24-ին երրորդ անգամ էր հայտարարվել: ՀՀ ԿԳՄՍ փոխնախարար Նարինե Խաչատուրյանը «Հայկական ժամանակին» հայտնեց, որ այս անգամ էլ մրցույթը չի կայացել: Ընդամենը մեկ հայտատու են ունեցել «Արձագանքի» համար, նրա էլ փաստաթղթերը ամբողջական չեն եղել: «Մասնակիցը չուներ ամենակարեւոր փաստաթուղթը՝ բանկային երաշխիքը: Ինչպես օրենքն է պարտադրում՝ նրան մեկ օր ժամանակ տրվեց, բայց չներկայացրեց»,- ասաց նախարարի տեղակալը:

Խոսելով արդեն երրորդ անգամ տապալված մրցույթի մասին, փոխնախարարը նկատեց, որ պատճառներից մեկը կարող  լինել նախ, ժամկետների սղությունը, քանի որ մինչեւ տարեվերջ պետք է մասնակից կազմակերպությունը հանձներ աշխատանքը, այլապես տույժերի տուգանքների տակ են ընկնում: Երկրորդը՝ շատերի համար դժվարություն է բանկային երաշխիքը. «Ենթադրենք որեւէ գործի վերկանգնման համար նախատեսված է 176 միլիոն դրամ, ապա մասնակիցը հաշվի վրա պետք է ունենա այդքան գումար, գումարած 110 տոկոս: Մեծ գումար է, որը փաստորեն բանկում սառեցվում է, չի պտտվում՝ տոկոսներ չեն գալիս: Բայց սա իհարկե՝ մեր նախարարության քմահաճույքը չէ, «Գնումների մասին օրենքն» է այդպիսին»:

Մեր դիտարկմանը, թե հնարավո՞ր է առաջիկայում ԿԳՄՍ նախարարի հետ քննարկվի, ապա նաեւ ԱԺ ներկայացվի «Գնումների մասին օրենքի» վերոնշյալ խնդրին վերաբերող կետում որոշակի փոփոխությունների նախագիծ, Նարինե Խաչատուրյանը նկատեց՝ սա երկսայր խնդիր է.«Եթե հուշարձանների տեսանկյունից ենք նայում, այո, խանգարում է այս կարգը, բայց մյուս կողմից էլ պետութունը մեծ գումարներ է տալիս, պետք է նաեւ երաշխիք ունենա»:

Նախարարությունում այժմ ապակողմնորոշված են, 4-րդ անգամ հայտարարե՞լ մրցույթ, թե՞ ոչ: Ըստ Թուխիկյանի՝ ժամանակային առումով էլ է արդեն խնդիր, տարին մոտենում է ավարտին՝ հասցնելու տեսանկյունից, եղանակային պայմաններն էլ գնալով անբարենապաստ կդառնան:

«Ճանապարհաշինարարների» եւ «Արձագանքի» մրցույթներին մասնակից չլինելու խնդրին օգոստոսին անդրադարձել էր նաեւ ՀՀ վարչապետ Նիկոլ Փաշինյանը: Վարչապետը ֆեյսբուքյան իր էջում տեղադրել էր երկու քանդակների նկարներն ու կից գրառում կատարել: «Երեւի հիշում եք, որ կառավարության նիստում հանձնարարական էի տվել վերականգնել Հայաստանի մայրուղիներին հարակից մի շարք քանդակագործական ստեղծագործություններ»,- մասնավորապես գրել էր վարչապետն ու հայտնել, թե յուրաքանչյուր արձանի համար ինչքան գումար է հատկացվել:

Ավելի վաղ «Հայկական ժաամանակը» ԿԳՄՍՆ-ից նույն խնդրի վերաբերյալ հետարքրքվել էր, թե որոնք ենք հնարավոր այն պատճառները, որ քանդակները վերականգնելու համար հայտարարված մրցույթը մասնագետների շրջանում հետաքրքրություն չի առաջացնում եւ արդյոք ոլորտի պատասխանատուները վերլուծել են այդ պատճառները: ԿԳՄՍ նախարարությունից «Հայկական ժամանակը» հարցմանը պատասխանելով կարծիք էին հայտնել, որ մրցույթի չկայանալու հնարավոր պատճառներից կարող է լինել վերականգնման ոլորտի առանձնահատկությունը եւ մասնակցել ցանկացող կազմակերպությունում համապատասխան քանդակագործ չլինելը:

Հավելենք նաեւ, որ ԿԳՄՍ նախարարության 2020 թվականի բյուջեով նախատեսված է պատմության եւ մշակույթի 12 անշարժ հուշարձանների ամրակայման, նորոգման եւ վերականգման աշխատանքների իրականացում: Ընդհանուր գումարը կազմում է 429. 4 մլն ՀՀ դրամ: