ԵՊՀ ՈւԽ ստորագրահավաքին միացել են նաեւ այլ բուհերից ուսանողներ․ նրանք պահանջում են ուսման վարձի մասնակի փոխհատուցում

Երեւանի պետական համալսարանի ուսանողական խորհուրդը հանդես է եկել նոր նախաձեռնությամբ՝ կազմակերպվել է առցանց ստորագրահավաք, որը շուտով ներկայացվելու է ՀՀ կառավարություն։

Ուսանողները, պայմանավորված նոր կորոնավիրուսի համավարակի պատճառով ստեղծված իրավիճակով, պահանջում են ուսման վարձավճարի մասնակի փոխհատուցում։ Ստորագրահավաքը ոչ թե միայն ԵՊՀ-ի, այլեւ ամբողջ ՀՀ ուսանողության համար է։ Այլ բուհերից արդեն իսկ միացել են նախաձեռնությանը։

ԵՊՀ ՈՒԽ նախագահ Դավիթ Ափոյանի խոսքով՝ փոխհատուցումը պետք է լինի իրատեսական, միեւնույն ժամանակ՝ օգտակար ուսանողների համար։ Մեզ հետ զրույցում նա նշեց, որ ակնկալում են ուսման վարձի մինչեւ 20-25 % փոխհատուցում։ Թեեւ այս տարվա ուսման վարձի թանկացումները վերաբերում են միայն առաջին կուրսեցիներին, ակնկալվող փոխհատուցման չափը բոլոր կուրսերի համար նույնն է։ Տարանջատում չեն արել, կարծում են՝ ճիշտ կլինի բոլորին հավասար չափով զեղչ տրամադրել, քանի որ օրինակ՝ 4-րդ կուրսեցին էլ ավելի քիչ է վճարում, քան 2-րդը, որովհետեւ այդ ընթացքում նույնպես թանկացում է եղել։

Ստորագրահավաքը մեկնարկել է երեկ, սակայն ակտիվություն արդեն կա։

«Թվով դեռեւս ԵՊՀ-ի ուսանողներն են շատ, տրամաբանական  է, քանի որ ԵՊՀ-ում ուսանողներն ավելի շատ են։ Ունենք շատ մասնակցություն Հայաստանի պետական տնտեսագիտական համալսարանից, Երեւանի պետական բժշկական համալսարանից, Հայաստանի ազգային պոլիտեխնիկական համալսարանից եւ այլն»,- ընդգծեց Ափոյանը։

Նոր նախաձեռնության փաստական հիմքերը մի քանիսն են, օրինակ՝ հեռավար եղանակով կազմակերպվող դասապրոցեսի անարդյունավետությունը։ Նախաձեռմության կազմակերպիչները կարծում են, որ մարտ ամսից անցկացվող հեռավար կրթությամբ պայմանավորված ուսանողները մի քանի անգամ ցածր որակի կրթություն են ստանում, քանի որ չի ապահովվում գործնական հմտությունների ձեռքբերումը, սակայն շարունակում են նույն չափով վարձ վճարել: 

Բերվող մյուս փաստարկներից են տեխնիկական խնդիրները, որոնց պատճառով կան դասախոսներ եւ ուսանողներ, որոնք չեն կարողանում պատշաճ մասնակցել դասապրոցեսին։

Ըստ նախաձեռնության կազմակերիչների՝ մարտ ամսից պետության տնտեսական ակտիվությունը անկում է ապրում, տասնյակ հազարավոր աշխատատեղեր են փակվել, սակայն ուսանողները շարունակելու են նույն չափով վարձ վճարել։ Բացի դա, քանի որ այս տարի հիբրիդային եղանակով են կազմակերպվելու դասընթացները, մարզաբնակ ուսանողները շաբաթական մեկ-երկու անգամ համալսարան հաճախելու համար ստիպված են լինելու Երեւանում բնակարաններ վարձել։

Նախաձեռնության անդամներն ընդգծում են, որ նախորդ կիսամյակում Կառավարության կողմից ուսման վարձավճարի մասնակի փոխհատուցում տրամադրվեց ուսանողներին, սակայն հիմքում դրվեց ոչ թե արտակարգ դրությամբ պայմանավորված սոցիալական դրության վատթարացումը, այն է՝ սոցիալական կոմպոնենտը, այլ ուսանողների առաջադիմության չափանիշը, ինչն էլ պատճառ հանդիսացավ, որ առ այսօր առկա են ուսանողներ, ովքեր չեն կարողացել վճարել նախորդ կիսամյակի վարձավճարը։

Այս ամենին է գումարվել ԵՊՀ-ում վարձավճարների բարձրացումը (փոփոխությունը վերաբերում է միայն այս տարի ընդունված դիմորդներին):

Նշենք, որ այս փաստարկներից որոշներին վերջին ասուլիսի ժամանկ անդրադարձել էր ԵՊՀ ռեկտորի պաշտոնակատար Գեղամ Գեւորգյանը՝ պատասխանելով հարցին՝ արդյո՞ք հեռավար կրթության ժամանակ ուսանողները ստացել են նույն որակի կրթություն, ինչ առկայի եւ եթե ոչ, արդյո՞ք արդարացված է, որ պետք է վճարեն նույնքան։

Գեւորգյանը պատասխանել էր, որ արդարացված է, քանի որ կրթական ծառայություն ուսանողը ստանում է եւ եթե կրթությունը ճիշտ կրթական հարթակում է կատարվում (ԵՊՀ-ում հեռավար ուսուցումն իրականացվելու է միայն www.e-learning.ysu.am հարթակում), ուսանողը լսում է կենդանի դասախոսություն, ստանում է բոլոր նյութերն ու ժամանակ չի կորցնում նյութերը գրելու վրա, ստանում է նաեւ սլայդեր, հարցեր հղում նույն հարթակում։

Նա նաեւ հավելել էր, որ կրթության արդյունավետությունը հարցականի տակ չի լինի կամաց-կամաց, քանի որ այն խնդիրները, որոնք եղել են անցած կիսամյակի ընթացքում, շտկվելու են։ Մասնավորապես՝ այն բոլոր առարկաները, որոնք պահանջում են առկա դասընթաց, լինելու են այդպես։

Նշենք, որ ԵՊՀ-ում առավել պակաս վարձերը գործում են ռադիոֆիզիկայի, կենսաբանության, պատմության, ժուռնալիստիկայի եւ մի շարք այլ ֆակուլտետներում։ Այստեղ ուսման վարձը 400,000 դրամ է (խոսքն առաջին կուսրեցիների մասին չէ)։ Այս ֆակուլտետների առաջին կուրսեցիները պետք է վճարեն 430,000 դրամ։

Բուհի առավել շատ վճարները գործում են միջազգային հարաբերությունների եւ իրավագիտության ֆակուլտետներում՝ 600․000-800․000 դրամ, առաջին կուրսնեցիների համար՝ 650.000-870.000 դրամ։