Հայհոյանքներ, ծեծի ենթարկված պաշտոնյաներ․ ՀՖՖ-ն մի շարք որոշումներ է կայացրել և դեռ քննելու է որոշ միջադեպեր

VBET Հայաստանի Պրեմիեր լիգայի 10-րդ տուրի 2 հանդիպումների ընթացքում տեղի են ունեցել անթույլատրելի և խիստ դատապարտելի միջադեպեր: Այդ մասին հաղորդում է ՀՖՖ մամուլի ծառայությունը։

Մասնավորապես՝ հոկտեմբերի 30-ին Գյումրիում կայացած «Նոա» - «Շիրակ» հանդիպման ընթացքում իր անմիջական պարտականությունները կատարելիս «Շիրակ» ակումբի հյուրերի կողմից ծեծվել է ՀՖՖ պատվիրակը: Հաջորդ օրը՝ հոկտեմբերի 31-ին, «Գանձասար-Կապան» - «Վան» հանդիպումից հետո «Գանձասար-Կապան» ակումբի ներկայացուցիչները ծեծել են հանդիպման մրցավարին և ՀՖՖ տեսուչներից մեկին:

ՀՖՖ-ն իր հայտարարության մեջ նշում է․ «ՀՖՖ հովանու ներքո անցկացվող մրցաշարերի մասնակից ակումբների ներկայացուցիչների կողմից նման ցինիկ պահվածքն անթույլատրելի է նույնիսկ սովորական պայմաններում, իսկ պատերազմական դրության ժամանակ, երբ առավել կարևոր է ներքին համերաշխության պահպանումը, սա պարզապես խայտառակություն է: ՀՖՖ-ն արդեն իսկ սկսել է ներքին քննություն՝ պարզելու միջադեպերի մանրամասները և երկու դեպքում էլ կիրառելու է իր իրավասությունների շրջանակներում գտնվող ամենախիստ պատիժները: ՀՖՖ-ն խստորեն դատապարտում է տեղի ունեցածը և ևս մեկ անգամ հորդորում ֆուտբոլային հասարակությանը, ֆուտբոլային ընտանիքի անդամներին պահպանել արդար խաղի կանոնները և չխաթարել ներքին միասնականությունը պատերազմական՝ առանց այն էլ ծանր օրերի ընթացքում»:

Բացի այդ, այսօր տեղի է ունեցել ՀՖՖ կարգապահական կոմիտեի հերթական նիստը, որտեղ քննարկվել են Հայաստանի Պրեմիեր լիգայի 3-րդ և 9-րդ տուրում տեղի ունեցած միջադեպերը։

Վերջին շրջանում ամենամեծ աղմուկ հանած «Գանձասար-Կապան» - «Ուրարտու» հանդիպման ժամանակ հյուրերի գլխավոր մարզիչ Ալեքսանդր Գրիգորյանը հեռացվել էր՝ մրցակից թիմի հասցեին անհարգալից արտահայտություններ հնչեցնելու համար։ Գրիգորյանի հասցեին հնչեցրած վիրավորանքների համար էլ հեռացվել էր կապանցիների դարպասապահների մարզիչ Մարտիկ Մկրտումյանը։ Բացի այդ, «Ուրարտուի» նախագահ Ջևան Չելոյանցը առաջին խաղակեսի միջմնամասից դժգոհում էր գլխավոր մրցավարի գործողություններից՝ ամեն որոշմանը շատ բուռն արձագանքելով։ Մինչ հյուրերի առաջին խփած գոլը, երկրորդ խաղակեսի սկզբում, Չելոյանցը «Ուրարտուի» գլխավոր մարզիչ Ալեքսանդր Գրիգորյանին ՎԻՊ գոտուց հրամայում էր թիմը հեռացնել խաղադաշտից և չշարունակել հանդիպումը՝ ասելով, թե այս ամենը կլոունադա է։ Իսկ գոլից անմիջապես հետո, երբ Ալեքսանդր Գրիգորյանը ստացավ կարմիր քարտ և հեռացվեց խաղադաշտից, Չելոյանցը պնդում էր, որ թիմն անմիջապես լքի խաղադաշտը և գնա հանդերձարան, ինչի արդյունքում հյուրերի ֆուտբոլիստները մոտ 3,5 րոպե անորոշության մեջ սպասում էին իրենց ղեկավարի որոշմանը։ Սակայն, երբ հեռացումից հետո Գրիգորյանը բարձրացավ ՎԻՊ գոտի, Չելոյանցի հետ խոսելուց հետո հրահանգեց թիմին շարունակել հանդիպումը։ Չելոյանցը, լքելով ՎԻՊ գոտին և մարզադաշտը, անվայել հայհոյանքներ է հնչեցրել։

Խաղից հետո «Գանձասար-Կապանի» մարզական տնօրեն Սարգիս Ասոյանը, որն ընդգրկված չէր հանդիպման արձանագրության մեջ և իրավունք չուներ գտնվելու հանդերձարանների մոտ, հնդերձարանների մուտքի մոտ տարաբնույթ հայհոյանքներ է հնչեցրել «Ուրարտուի» գլխավոր մարզիչ Ալեքսանդր Գրիգորյանի հասցեին։

Կարգապահական կոմիտեն մեկական խաղով որակազրկել է Գրիգորյանին և Մկրտումյանին, իսկ Չելոյանցին՝ որակազրկել 3 խաղով։ Բացի այդ, երկու թիմերը, միայն այս խաղում թույլ տված խախտումների համար տուգանվել են 500.000-ական դրամով։

3-րդ տուրի հետաձգված «Գանձասար-Կապան» - «Լոռի» հանդիպումից հետո հյուրերի մարզական տնօրեն Արսեն Մարգարյանը առաջին խաղակեսի ավարտից հետո՝ թունել մուտք գործելուց առաջ, վիրավորական արտահայտություններ է թույլ տվել մրցավարական անձնակազմի հասցեին, ինչի հետևանքով միջադեպ է տեղի ունեցել նրա և 4-րդ պաշտոնյայի միջև: «Լոռին» տուգանվել է 200.000 դրամով։

Տուգանվել է նաև «Վան» ակումբը։ Վերջինիս նախագահ Կարեն Բարսեղյանը, «Արարատ-Արմենիայի» հետ տնային խաղի 62-րդ րոպեին դժգոհելով գլխավոր մրցավարի գործողություններից, սկսել է վիրավորական արտահայտություններ հնչեցնել Զավեն Հովհաննիսյանի հասցեին։ Հանդիպման ավարտից հետո Կարեն Բարսեղյանը ցանկացել է մտնել մրցավարների սենյակ: Հանդիպման ողջ ընթացքում մարզադաշտ են մտել երկրպագուներ՝ հյուրերի բեյջերով, իսկ արդեն երկրորդ խաղակեսի միջնամասում՝ նաև արդեն առանց բեյջերի։ Մարզադաշտում գտնվողների մեծամասնությունը դիմակ չի կրել և չի պահպանել սոցիալական հեռավորություն։ «Վանը» տուգանվել է 300.000 դրամով։