Ֆակուլտետները հայտարարել են անհնազանդությանը միանալու մասին․ պարզվում է՝ դա քչերի որոշումն է եւ ընդամենը «կանաչ լույս»

17 կուսակցություններից բաղկացած «Հայրենիքի փրկության շարժումը» երեքշաբթի օրը՝  դեկտեմբերի 22-ը,  հայտարարել է զանգվածային բողոքի օր։ Այդ մասին՝ դեկտեմբերի 16-ին  «Արժանապատվության  երթն» ամփոփելիս հայտարարել էր ՀՅԴ ԳՄ  ներկայացուցիչ Իշխան Սաղաթելյանը։

Երևանի պետական համալսարանի (ԵՊՀ) մի շարք ֆակուլտետներ այսօր  արդեն հայտարարել են, որ միանում են համազգային անհնազանդության միջոցառումներին՝ տարածելով համապատասխան հայտարարություն:

Անհնազանդության միջոցառմանը միանալու մասին հայտնած Ժուռնալիստիկայի ֆակուլտետի դեկան Նաղաշ Մարտիրոսյանը, սակայն, մեզ հետ զրույցում նշեց՝  այս ակցիան դասադուլ անվանել անիմաստ է, քանի որ դասերն ավարտվել են, հիմա  քննաշրջան է․ «Դասերը ավարտվել են, հետևաբար դասադուլի մասին խոսելն անիմաստ է։ Բարեբախտաբար, միջանկյալներ և քննություններ չկան վաղը, դա մեկօրյա  ակցիա է։ Իսկ դասախոսները իրենք են որոշելու՝ մասնակցեն ակցիային, թե ոչ։ Ովքեր ցանկություն ունեն, կարող են միանալ ովքեր ոչ՝ ոչ, պարտադիր չէ»։

Հարցին, թե արդյոք անհնազանդության միջոցառումներին ֆակուլտետի միանալու մասին հայտարարությունը վերաբերում է նաև ուսանողներին, դեկանը պատասխանեց․ «Եթե վերաբերվեր ուսանողներին, կհայտարարվեր, որ ուսանողները նույնպես միանում են։ Եթե որևէ մեկը ասի, որ ոչ, ես չեմ մասնակցում, որովհետև  անհնազանդության օր է հայտարարված, խնդիր չկա, կգտնենք  միջոցը, որպեսզի այդ ուսանողը  հաջորդ օրը  մասնակցի այդ առարկայի միջանկյալին»։

Իսկ եթե անհնազանդության ակցիան շարունակվի մեկ օրից ավելի, այդ դեպքում, ըստ դեկանի, հաշվի կառնվեն ուսանողների և դասախոսների ընդհանուր կարծիքը․ «Եթե անհրաժեշտ լինի նմանատիպ  հայտարարությամբ նորից հանդես գալու, շարունակելու կամ  նոր ակցիաների մասնակցելու, այդ դեպքում ժուռնալիստիկայի ֆակուլտետի ընդհանուր ժողով կգումարվի՝ դասախոսների  ապա նաև ուսանողների մասնակցությամբ, հարցը կքննարկվի և ինչպես կորոշի ֆակուլտետը կկազմակերպվի այդպես։

Միևնույն ժամանակ դեկանը վստահեցնում է՝ ուսանողների իրավունքները չեն ոտնահարվելու, քննությունները և միջանկյալները պետք է կայանան՝ Ժուռնալիստիկան և Ժուռնալսիտիկայի ֆակուլտետը դուրս պիտի լինեն բոլոր տիպի քաղաքական գործընթացներից։

Արևելագիտության ֆակուլտետի դեկան Ռուբեն Մելքոնյանի խոսքերով էլ՝ սա անհնազանդության գործողությունների ակցիա է, խոսել դասադուլի մասին անիմաստ է, իսկ գործադուլն էլ այս պարագայում ուղղված կլինի ռեկտորի դեմ։

«Սա նշանակում է ստեղծված իրավիճակում ձայն արտահայտել, այն դասախոսները և վարչական աշխատողները, որոնք ցանկություն ունեն, կարող են, որպես  բողոքի դրսևորում վաղը չգնալ աշխատանքի։ Ես նախօրոք տեղյակ եմ պահել ռեկտորին և պրոռեկտրին, որ նախատեսվում է նման ակցիա և հայտարարել եմ՝ այն դասախոսները, որոնք վաղը ունեն քննություն և ցանկություն ունեն անցկացնել քննությունը, ապա կարող են անցկացնել, որպեսզի ոչ նրանց իրավունքնրը ոտնահարվի, ոչ էլ ուսանողների»։

«Սա ուսանողի խնդիրը չէ և չի համարվում դասախոսների և ուսանողների մեծամասնության կարծիք»,- շարունակեց դեկանը։ Իսկ թե ինչու է ֆակուլտետի անունից արվել հայտարարությունը, Մելքոնյանը նշեց․ «Ես հրավիրել եմ նիստ, որին ներկա ենք եղել՝ ես, դեկանի տեղակալը, արհմիության նախագահը և ամբիոնների վարիչները։ Ներկայացրել եմ հարցը, քվեարկության եմ դրել և կողմ են եղել 5-ը, դեմ՝ մեկ ամբիոնի վարիչ։ Եվ ես մանդատ եմ ստացել միանալ ԵՊՀ ֆակուլտետների հայտարարությանը։ Իսկ ուսանողների անունից հայտարարել դասադուլ՝ ֆակուլտետը իրավասու չէ, ուսանողներին սա չի վերաբերվում, ուսանողները իրենք են որոշում իրենց քայլերը և ես իրենց չեմ սահմանափակելու»։

Անդրադառնալով այն հարցին, թե Արևելագիտության ֆակուլտետում չեղարկվել էր վաղը նշանակված արաբերեն առարկայի միջանկյալ քննությունը, որն էլ հարուցել էր ուսանողների և տվյալ դասախոսի դժգոհությունը, ով  քաղաքականությամբ չի հետաքրքրվում և տեղյակ չի եղել որոշմանը, դեկանը պարզաբանեց, որ իրեն հայտնի է այդ դեպքը, իսկ դասախոսի անտեղյակությունը համարում է տեխնիակական խնդիր։

«Ես տեղյակ եմ այդ դեպքից։ Որոշման մասին հանձնարարել էի տեղյակ պահել այն դասախոսներին, որոնք վաղը  ունեն  միջանկյալ քննություն, ենթադրում եմ, որ այդ դասախոսը ունեցել է տեխնիկական խնդիր, դրա համար այդ պահին տեղյակ չի եղել։ Այդ դեպքի հետ կապված քիչ առաջ ամբիոնի վարիչը զանգահարեց ինձ և ասաց, որ եկել են այն եզրահանգման, որ վաղը քննությունը պետք է անեն, որևէ խնդիր չկա, զուտ կազմակերպչական հարց է։ Իհարկե դասախոսները կան, որ հետաքրքված չեն քաղաքկանությամբ և դա իրենց իրավունքն է։ Պետք է նշեմ  նաև՝ որ  արաբերենի առարկայի չորս խումբ կա՝  չորս դասախոս, եթե այդ չորսից մեկը որոշում է  չանել  միջանկյալը , անել գործադուլ՝ ես պետք է այնպես անեմ, որ քննությունը տեղի ունենա, որովհետև գործադուլ անելու ցանկություն ունեցող դասախոսը փոքրամասնություն է կազմում»,- ասում է դեկանը։

Մելքոնյանը նշեց՝ եթե հայտարարվի ընդհանուր պարալիզացում, ինքը դրան դեմ կլինի, քանի որ հակված է, որ բողոքի ակցիաները, հատկապես այս փուլում, որևէ կերպ չխանգարեն քննական շրջանին․ «Հատկապես հիմա, երբ քննությունները օնլայն են, պետք է տեղի ունենան, որովհետև տարին ավարտվում է։ Իսկ ուսանողները և դասխոսները իրենց բողոքի ակցիան արտահայտելու այլ հարթակներ կգտնեն»։

Եվ չնայած սրան, Երևանի պետական համալսարանի դասախոսներից ոմանք լրատվամիջոցներին փոխանցել են, որ տարածված հայտարարության մասին իմացել են հենց լրատվամիջոցներից և վրդովված են։ Ոմանք էլ հավելել են, որ լինելով գիտխորհրդի անդամ, իրենց նույնպես  չեն տեղեկացրել։

ԵՊՀ Եվրոպական լեզուների և հաղորդակցության ֆակուլտետի դասախոսներից Աստղիկ Չուբարյանն ասել է, որ դեկանը պոստֆակտում զանգում է գիտխորհրդի անդամներին և նոր հարցնում վաղը կայանալիք անհնազանդության ակցիային նրանց մասնակցության մասին, այն դեպքում, երբ հայտարարությունը վաղուց տարածված է։

Հ․Գ․ Երևանի պետական բժշկական համալսարանի աշխատակազմի ղեկավար Շուշան Դանիելյանն էլ ֆեսբուքյան իր էջում հաստատել է, որ Բժշկական համալսարանում կան դասախոսներ, աշխատակիցներ, որոնք տեղեկացրել են, որ միանալու են 2020 թ. դեկտեմբերի 22-ի գործադուլին: «Դա իրենց սահմանադրական իրավունքն է, և որևէ մեկն իրավասություն չունի այդ իրավունքը վերցնել մարդկանցից»,- նշել է նա՝ հավելելով, որ  բուհն ապաքաղաքական կառույց է, և բուհի վարչակազմը երբևէ վարչական լծակ չի կիրառել և չի էլ կիրառի իր աշխատակիցների նկատմամբ։

Թե արդյոք գործադուլի մասին հայտարարվել է «Աշխատանքային օրենսգրքով» նախատեսված ընթացակարգերը պահպանելով՝ արհմիության միջոցով եւ այլն, բուհի պաշտոնյան չի պարզաբանել։

Մերի Խաչատրյան