Պատգամավորները տարօրինակ են համարում ՄԻՊ-ի արձագանքն ընդդիմության կոչերին ու հորդորում թիրախային գնահատականներ տալ

ԱԺ պատգամավոր Մարիա Կարապետյանը ֆեյսբուքյան իր էջում դիմել է ՀՀ մարդու իրավունքների պաշտպանին: Պատգամավորը  Հայաստանի ներքաղաքական դիսկուրսին մարդու իրավունքների պաշտպանության տեսանկյունից տված նրա գնահատականները օրեցօր նմանեցնում է Լեռնային Ղարաբաղի երկրորդ պատերազմի ժամանակ միջազգային հանրության որոշ շրջանակների գնահատականներին։

 «Հավատացնում եմ Ձեզ, որ եթե վերջին շրջանի որոշ հանրահավաքներում և հարցազրույցներում հնչող բռնության կոչերին և ատելության խոսքին, վիրավորանքներին և հայհոյանքներին, ինչպես նաև մարդու իրավունքների ոտնահարման այլ դրվագներին Դուք տաք թիրախային գնահատականներ, դրանից Ձեր անաչառությունը կասկածի տակ չի դրվի։ Ընդ որում, հատուկ ընդգծում եմ, որ խոսքը բնավ հանրային իշխանության մարմինների իրավունքների պաշտպանության մասին չէ, այլ, օրինակ, հանրային իշխանության մարմնի ներկայացուցչի՝ պատգամավորի կողմից հանրության մի մասին «ժեխ» անվանելուն թիրախային գնահատական տալու մասին է, կամ հստակ արձանագրելու, թե ով ում է հարկադրել հանրահավաք գնալ կամ չգնալ։

Փոխարենը Դուք «հավասարակշռում» եք հնչող բռնության կոչերին և ատելության խոսքին, վիրավորանքներին և հայհոյանքներին, ինչպես նաև մարդու իրավունքների ոտնահարման այլ դրվագներին Ձեր տված գնահատականները կառավարող ուժի նախկինում թույլ տված սխալների միջոցով կամ այդպիսի սխալների ակնհայտ բացակայության պարագայում՝ իբր կառավարող ուժի կողմից ուղղորդված ֆեյքերի գործունեության միջոցով, որոնց մասին արված պնդումները անհրաժեշտ է փաստերով հիմնավորել:

«Կողմերի վարքով խիստ մտահոգվելը» և «կողմերին զսպվածության կոչեր անելը» բացարձակ չեն ծառայում ո՛չ որպես մարդու իրավունքների տեսանկյունից հանրությանը տված ուղենիշներ (թե օրինակ վերջիվերջո ինչը կարելի է ասել հրապարակային և ինչը՝ ոչ), ո՛չ էլ որպես Ձեր անաչառության վկայություններ»,- գրել է պատգամավորը՝ առաջարկելով ՄԻՊ-ին իր գնահատականներում լինել կոնկրետ, թիրախային և հասցեական։

Նույն թեմային է անդրադարձել նաեւ ԱԺ մեկ այլ պատգամավոր, Մարդու իրավունքների պաշտպանության և հանրային հարցերի մշտական հանձնաժողովի անդամ Արթուր Հովհաննիսյանը: Ըստ պատգամավորի՝ արդեն որերորդ անգամ առնվազն տարօրինակ է թվում ՄԻՊ-ի իշխանության մարմիններին, պաշտոնյաններին ուղղված կոչը՝ հրապարակային խոսքով անհանդուրժողականության խորացման ու լարվածության ավելացնելու մասին, ըստ Հովհաննիսյանի՝ հայտարարությունների տեքստերից հնարավոր է կասկածել դրանց անաչառությանը:

«Վերջին օրերին «ընդդիմության» կողմից Հայաստանի քաղաքացիների, պետական պաշտոնյաների, ԱԺ պատգամավորների հասցեին հնչում են սպառնալիքներ, վիրավորանքներ, տեղ-տեղ՝ հայհոյանքներ պարունակող հայտարարություններ։

Գործադիր մարմնի որեւէ ներկայացուցչի կամ «Իմ քայլը» խմբակցության որեւէ պատգամավորի կողմից լարվածությունը խորացնող հայտարարություն չի արվել, այլ՝ ընդհակառակը։

ՄԻՊ-ը նաեւ, արդեն ոչ մեկ անգամ, նշում է, որ կան թե՛ իշխանության մարմիններին, թե՛ ընդդիմության տարբեր շրջանակներին աջակցող սոցիալական ցանցերի (հատկապես՝ «Ֆեյսբուք») կեղծ էջեր և կեղծ օգտահաշիվներ, որոնք կազմակերպված ու նպատակային հարձակումներ են իրականացնում իրար դեմ:

Սա եւս մեկ չհիմնավորված եւ կեղծ թեզ է, որով մշտապես փորձ է արվել հավասարության նշան դնել նախկին ռեժիմի եւ ներկա կառավարող թիմի եւ քաղաքական մեծամասնության միջեւ։

Եվ հիմա այս թեզը ցավալիորեն արդեն որերորդ անգամ հայտնվում է ՄԻՊ-ի հայտարարության տեքստում։

Եվ հետեւաբար թույլ տվեք կասկածի տակ դնել նման շեշտադրումներով հայտարարությունների անաչառությունը։

Կոչ եմ անում առավել մանրամասն ուսումնասիրել որոշ «քաղաքական» շրջանակների կողմից արվող հայտարարությունները եւ հանդես գալ կողմնակալության տպավորություն չստեղծող, կասկածներ չառաջացնող կոչերով»,- գրել է նա:

Հիշեցնենք՝ Հայաստանի մարդու իրավունքների պաշտպանի աշխատակազմը հայտարարություն էր տարածել, որով շեշտում էր, որ պաշտոնյաներն ու ընդդիմության տարբեր շրջանակներ իրենց հրապարակային խոսքով չպետք է նպաստեն անհանդուրժողականության խորացմանը: