«Սա մեսիջ է». ՄԻՊ-ը խուսափել է Արծրունու հարցաքննությունը քաղաքական հետապնդում որակել

Մարդու իրավունքների պաշտպանի գրասենյակը պատասխանել է երաժիշտ Վահան Արծրունու դիմումին՝ ըստ էության, նրա նկատմամբ ԱԱԾ-ի կողմից իրականացված հարցաքննությունը խուսափելով որակել որպես քաղաքական հետապնդում:

Տեղեկացնելով, որ դեկտեմբերի 14-ին ոմն Գրիգորից զանգ է ստացել եւ հրավիրվել ԱԱԾ, որտեղ եւ հարցաքննվել է իր քաղաքական հայացքների, Խորենացի փողոցում անցկացված բողոքի ակցիաներին մասնակցության, եկամուտների, ընտանիքի անդամների մասին, Արծրունին ՄԻՊ գրասենյակից հետաքրքրվել էր՝ արդյո՞ք առանց կարգավիճակի, ծանուցագրի ԱԱԾ աշխատակցի հետ հանդիպումը չի խախտում ՀՀ սահմանադրության դրույթները, իր իրավունքները եւ օրենքը:

Այս հարցին ի պատասխան ՄԻՊ գրասենյակից նրան պատասխանել են, որ ցանկացած պետական մարմնի, այդ թվում ԱԱԾ աշխատակցի կողմից հեռախոսազանգով համապատասխան պետական մարմին ներկայանալու հրավերը տվյալ անձի մոտ պարտականություն չի առաջացնում: Նման դեպքերում անձն իրավունք ունի տվյալ մարմին ներկայանալուց կամ հարցերին պատասխանելուց:

ՄԻՊ գրասենյակը պարզաբանել է նաեւ, որ եթե առկա է որեւէ անձի տուժող, կասկածյալ, վկա, մեղադրյալ հարցաքննության կանչելու անհրաժեշտություն, ապա օրենքը պահանջում է, որ տվյալ անձին ուղարկվի կոնկրետ կարգավիճակի նշումով ծանուցագիր:

Արծրունին հետաքրքրվել էր նաեւ, թե արդյո՞ք իրեն տրվող հարցերի շարադրանքն ու տրամաբանությունն իր մեջ չի պարունակում քաղաքական ճնշման տարր, խոսքի ազատության սահմանափակում, եւ չի քողարկում իր մեջ որեւէ սպառնալիք:

«Անդրադառնալով ձեր դիմումի մեջ նշված «քաղաքական ճնշմանը» եւ «խոսքի ազատության սահմանափակմանը» վերաբերող հարցադրումներին՝ անհրաժեշտ է նշել, որ տվյալ իրավիճակում հնարավոր չէ տալ նման գնահատական կամ որակում, քանի որ իրավապահ մարմնի հրավերն ընդունելու եւ առաջադրված հարցերին պատասխաններ ներկայացնելու վերաբերյալ ինչպես ձեր դիմումում նշված, այնպես էլ լրատվության միջոցներում հրապարակված տեղեկությունները վկայում են, որ դա տեղի է ունեցել կամովին»,- պատասխանել են երաժիշտին:

ՄԻՊ գրասենյակն արձագանքել է նաեւ Արծրունու ֆեյսբուքյան էջի արգելափակմանը՝ նշելով, որ այդ խնդիրը հասկանալու համար անհրաժեշտ է դիմել ֆեյսբուքի աջակցության կենտրոն, որը կառավարվում է ԱՄՆ-ում գործող մասնավոր ընկերության կողմից:

Վահան Արծրունու համար ՄԻՊ արձագանքը մտահոգիչ է. «Հարգելի համաքաղաքացիներ, ես այդքան էլ քաջատեղյակ չեմ իրավաբանական ձեւակերպումներից, բայց ինձ թվո՞ւմ է, որ ՄԻՊ-ի նամակը ոչ թե պատասխան է, այլ ավելի շուտ պատասխաններից եւ գնահատականներից հմտորեն խուսափելու հերթական օրինակ։ Ստացվում է, որ օրենքով նախատեսված պրոցեդուրան՝ հարցաքննելու հրավերի իրողությունը, արձանագրվում է, բայց չի քննադատվում։ Քաղաքական ճնշում եւ հետապնդում չի արձանագրվում, քանի որ կամովի եմ գնացել։ Իսկ ֆբ էջիս հետ կապված խնդիրների համար պետք է դիմեմ ամերիկյան մասնավոր ընկերությանը։ -)»,- ֆեյսբուքյան էջում գրել է երաժիշտը:

Այս համատեքստում նա ընդգծում է, որ ԱԱԾ աշխատակցի կողմից իրեն ուղղված խիստ քաղաքական բնույթ կրող հարցերը եւ Խորենացի փողոցում հայտնի իրադարձություններին մասնակցությունը, ընդհանրապես, արծարծված չեն ՄԻՊ պատասխան նամակում։

Մեր հարցին, թե որոնք են լինելու իր հետագա քայլերը՝ Արծրունին այսպես պատասխանեց. «Հստակ չեմ կարող այդ հարցին պատասխանել, քանի որ այս պատասխանն առաջին հերթին մտահոգություններ առաջացրեց ինձ մոտ, որովհետեւ այն, ինչի համար ես դիմել էի պաշտպանին, այդ նպատակս չիրականացավ: Ես խնդրել էի գնահատականներ տալ, իրավաբանական ձեւաչափի սահմաններում որակավորել այս գործընթացը:

Ինձ չեն տվել ոչ մի հարցի պատասխան: Կա ընդհանուր բնութագիր, թե ինչ կարգ է նախատեսված, բայց այդ կարգը խախտվել է թե՝ ոչ, չի ասվում: Ինձ ասում են, որ սա քաղաքական հետապնդում չի, որովհետեւ դուք այնտեղ գնացել եք կամովին: Ստացվում է, որ եթե որեւէ մեկը, ներկայանալով որպես էլեկտրացանցի կամ ջրմուղի աշխատակից, թակի ձեր դուռը եւ դուք այն բացեք, պարզվի՝ դա ավազակային հարձակում է եւ ձեզ կողոպտեն կամ վնասեն, դա օրենքի խախտում կամ բռնություն չէ, որովհետեւ կամովին դուռը բացել եք:

Ես երեւի պետք է ինչ-որ հայտարարությամբ հանդես գամ, որ հասկանալի դառնա, որ այդ պատասխանը ոչ միայն ինձ ուղղված պատասխան է, այլ մեսիջ է, ապագա զարգացումների կոնտեքստում ուղերձ է բոլոր քաղաքացիներին, որ եթե ձեզ հետ նման իրավիճակ կրկնվի, այս ատյանին չդիմեք, որովհետեւ կստանաք նմանատիպ պատասխաններ»: