ՎԵՐԱՔՆՆԻՉ ԲՈՂՈՔ ԵՆ ՆԵՐԿԱՅԱՑՐԵԼ

Հարություն Հարությունյանը, ով ՀՀ գլխավոր դատախազության ընդհանուր բնույթի հանցագործությունների գործերով վարչության ավագ դատախազ է, պահանջում է բեկանել Կենտրոն եւ Նորք-Մարաշ վարչական շրջանների ընդհանուր իրավասության դատարանի դատավոր Մնացական Մարտիրոսյանի` հունվարի 19-ին կայացրած դատավճիռը: Հիշեցնենք, որ Մացոն Նիկոլ Փաշինյանին ՀՀ քրեական օրենսգրքի 225 հոդվածի 1-ին մասի «Զանգվածային անկարգությունների կազմակերպում» մեղադրանքով դատապարտել էր 7 տարվա ազատազրկման, իսկ 316 հոդվածի 1-ին մասի «Իշխանության ներկայացուցչի նկատմամբ բռնություն գործադրելը» մեղադրանքով արդարացրել էր: Հարություն Հարությունյանը վերաքննիչ քրեական դատարանից պահանջում է Մացոյի դատավճիռը բեկանել եւ 316 հոդվածի առաջին մասով արդարացումը վերացնել ու այդ մեղադրանքով եւս մեղադրական դատավճիռ կայացնել: Ինչպես հայտնի է, Նիկոլ Փաշինյանին առաջադրված «Իշխանության ներկայացուցչի նկատմամբ բռնություն գործադրելու» մեղադրանքի հիմքում դրված են 2007-ի հոկտեմբերի 23-ի հայտնի իրադարձությունները: Այդ օրը Նիկոլ Փաշինյանը, մոտ երեսուն այլ քաղաքացիների հետ Երեւանի կենտրոնի փողոցների մայթերով իրազեկման երթ էր անցկացրել եւ քաղաքացիներին տեղեկացրել դրանից երեք օր անց Ազատության հրապարակում ՀՀ առաջին նախագահ Լեւոն Տեր-Պետրոսյանի մասնակցությամբ կայանալիք հանրահավաքի մասին: Երբ իրազեկող երթի մասնակիցները հասել էին Աբովյան եւ Կորյունի փողոցների խաչմերուկ, «Ուրարտու» խանութի դիմաց նրանց վրա էին հարձակվել ոստիկանական ուժերը` ՀՀ ոստիկանության Երեւանի վարչության այն ժամանակ պետի տեղակալի պաշտոնը զբաղեցնող Սաշիկ Աֆյանի գլխավորությամբ: Երթի մասնակիցների նկատմամբ բռնություն կիրառելուց հետո, նրանց մի մասին բերման էին ենթարկել Ոստիկանություն: Ոստիկանների հանցավոր գործունեությունը քողարկելու նպատակով հետագայում քրեական գործ հարուցվեց Նիկոլ Փաշինյանի, «Չորրորդ իշխանություն» թերթի գլխավոր խմբագիր Շողեր Մաթեւոսյանի, «Ժողովրդավարական Հայրենիք» կուսակցության նախագահ Պետրոս Մակեյանի եւ վերջինիս երկու որդիների` Տիգրան եւ Կարեն Մակեյանների նկատմամբ: Հետագայում, այս քրեական գործը միացվեց Մարտի 1-ի քրեական գործին: Այն որ Նիկոլ Փաշինյանին առաջադրված երկու մեղադրանքներն էլ մտացածին են, վաղուց հաստատված ճշմարտություն է: Սակայն, Մացոյի դատավճիռը, ըստ որի, 2007-ի հոկտեմբերի 23-ի միջադեպի ժամանակ Նիկոլ Փաշինյանի կողմից իշխանության ներկայացուցչի նկատմամբ բռնություն կիրառելու մեղադրանքն ապացուցված չէ, մի կողմից անսպասելի էր, բայց միեւնույն ժամանակ տրամաբանորեն հասկանալի: Մացոն գործնականում արեց այն, ինչ իրենից ակնկալում էր ՀՀ ղեկավարությունը, նա Նիկոլ Փաշինյանին դատապարտեց յոթ տարվա ազատազրկման: Բայց նա այդ արեց միայն մեկ` Նիկոլ Փաշինյանի կողմից զանգվածային անկարգություններ կազմակերպելու կեղծ մեղադրանքը հաստատելով: Ինչպես տեսնում ենք, Նիկոլ Փաշինյանին անազատության մեջ պահելու խնդրի լուծման այդ տարբերակը ՀՀ գլխավոր դատախազության սրտով չէ, Հարություն Հարությունյանը վերաքննիչ քրեական դատարանից պահանջում է հաստատել նաեւ երկրորդ կեղծ մեղադրանքը: Ըստ Հարությունյանի ստորագրած վերաքննիչ բողոքի, Մացոն իր դատավճռով, Նիկոլ Փաշինյանին Քր.օր.-ի 316 հոդվածի 1-ին մասով արդարացնելով, իբր, դատական սխալ է թույլ տվել, որն «ազդել է գործի արդյունքի վրա»: Չնայած, Հարությունյանը պահանջել է Մացոյի դատավճիռն այդ մասով բեկանել եւ մեղադրական դատավճիռ կայացնել, սակայն, որեւէ կերպ չի անդրադարձել պատժաչափի խնդրին: Ի դեպ, ուշագրավ է, որ վերաքննիչ բողոքը ստորագրել է միայն Հարություն Հարությունյանը. Նիկոլ Փաշինյանի գործով դատավարության ժամանակ որպես մեղադրող հանդես էր գալիս նաեւ Կորյուն Փիլոյանը, ավելին, կարող ենք ասել, որ հիմնական մեղադրողը հենց նա էր, իսկ Հարությունյանը գործնականում նրա օգնականն էր: Նիկոլ Փաշինյանի փաստաբան Երվանդ Վարոսյանը մեզ հետ զրույցում ասաց, որ մեղադրող դատախազի կողմից վերաքննիչ բողոք ներկայացնելը ընդամենը ձեւական է: Այսինքն, եթե դատախազությունը չբողոքարկեր դատավճիռը, ապա կստացվեր, որ Նիկոլ Փաշինյանին անհիմն մեղադրելու փաստը` առնվազն իշխանության ներկայացուցչի նկատմամբ բռնություն կիրառելու մասով, ընդունել է: Փաստաբանն ուշադրություն հրավիրեց այն հանգամանքի վրա, որ Հարությունյանը նույնությամբ կրկնել է մեղադրական եզրակացությունը, որում բերված մեղադրանքները դատավարության ընթացքում բազմիցս հերքվել են: Այսինքն, ՀՀ գլխավոր դատախազությունն ընդամենը փորձել է այդպիսով ցույց տալ, որ պնդում է իր կողմից սարքված գործը, եւ անկախ նրանից, թե հանրության շրջանում իր մեղադրանքների մասին ինչ են մտածում, միեւնույն է Նիկոլ Փաշինյանին առաջադրված մեղադրանքից իրենք չեն ցանկանում հրաժարվել: Ի դեպ, քաղբանտարկյալի փաստաբանները եւս առաջիկա օրերին վերաքննիչ բողոք կներկայացնեն: Բողոքարկման ժամկետն ավարտվում է փետրվարի 19-ին: Թերեւս, Նիկոլ Փաշինյանի փաստաբանների վերաքննիչ բողոք ներկայացնելուց հետո առավել պարզ կդառնա, մեղադրող կողմի քայլի էությունը եւ իրական դրդապատճառները: