Դուք միշտ և ամենուր արժանի եք լավագույնին. Հայրենիքի պաշտպանի վերականգնողական կենտրոնը պրոթեզավորման նոր կենտրոն ունի

«Հայրենիքի պաշտպանի վերականգնողական կենտրոնում» այսօր տեղի ունեցավ պրոթեզավորման նոր կենտրոնի բացման արարողությունը: Այն կհամալրվի ժամանակակից սարքավորումներով, որոնց շնորհիվ Արցախյան երկրորդ պատերազմի ընթացքում վիրավորում ստացած այն զինվորները, որոնք զրկվել են ոտքերից կամ ձեռքերից, այսուհետ կունենան որակյալ և ֆունկցիոնալ պրոթեզներ:

Կենտրոնի բացմանը ներկա էին Երևանի պետական բժշկական համալսարանի ռեկտոր Արմեն Մուրադյանը, կրթության, գիտության, մշակույթի և սպորտի նախարար Վահրամ Դումանյանը, առողջապահության նախարար Անահիտ Ավանեսյանը, «Հայաստան» համահայկական հիմնադրամի գործադիր տնօրեն Հայկակ Արշամյանը և այլք:

Բժշկական համալսարանի ռեկտորը, հանդես գալով բացման խոսքով, պրոթեզավորման նորաբաց կենտրոնն անվանեց կենտրոնի ազգային արժանապատվության և հպարտության կենտրոն: Ըստ նրա՝ այս կենտրոնը ի ցույց է դնելու հայ զինվորի անկոտրում կամքը:

«Ցավոք, այս տարի բժշկական համալսարանը չի կարող գրանցել հաջողությունների այն շարքը, որը ունեցել է 100 տարի շարունակ: Արցախյան երկրորդ պատերազմի ընթացքում համալսարանի 33 ուսանողներ իրենց կյանքը նվիրել են հայրենիքին: Այս կենտրոնը բժշկական համալսարանի և գործընկերների համատեղ աշխատանքի արդյունքն է: Այս կենտրոնն այն առանցք է, որի շուրջ հասարակությունը կարող է ունենալ համաձայնություն, տեսանելի արժանապատվություն՝ աշխարհի համար ի ցույց դնելով անկոտրում հայ զինվորի կամքը և հայ հասարակության միասնականությունը: Վերականգնողական կենտրոնը, ունենալով պրոթեզավորման ամբողջական հնարավորություն, վերաձևավորվեց՝ որպես Հայոց զինվորի տուն, և ողջունելով բոլորիդ՝ կցանկանամ այս ամբիոնից ասել՝ կեցցե՛ հայ զինվորը, կեցցե՛ հայ բժիշկը, կեցցե՛ անկոտրում հայոց կամքը և հայոց պետականությունը»,- ասաց նա:

ԿԳՄՍ նախարար Վահրամ Դումանյանն իր խոսքում շեշտեց՝ պրոթեզավորման նոր կենտրոնը պատերազմին մասնակցած զինվորների անձնազոհության դիմաց նվազագույն երախտագիտությունն է: «Շնորհակալ եմ ձեր դիմելաձևի համար՝ սիրելի դիմելաձևի, ես ուզում եմ, որ բոլորս այսուհետ միմյանց դիմենք սիրելի բառով, և այդ բառը արտահայտում է այն ներքնաշխարհը, որ մենք ունենք մեր երկրի, ժողովրդի, հայրենիքի, մեր զինվորների և մեր ամեն ինչի նկատմամբ:

Սիրելի զինվորներ, դուք հայրենասիրության, նվիրումի, անձնազոհության փայլուն օրինակներ եք, մենք հավերժ պարտական ենք ձեզ, դուք միշտ և ամենուր արժանի եք լավագույնին: Շնորհակալ եմ Երևանի պետական բժշկական համալսարանին, Աջակցություն վիրավոր զինվորին, «Հայաստան» համահայկական հիմնադրամին, Նիդեռլանդների հայ համայնքին և բոլոր նրանց, ովքեր աջակցել են պրոթեզավորման կենտրոնի բացմանը: Թող այստեղ գտնվող զինվորներից բացի՝ ոչ մեկին պրոթեզավորելու կարիք այլևս չլինի»,- ասաց նախարարը՝ իր խոսքում հատուկ առանձնացնելով և անձնական շնորհակալություն հայտնելով Հայրենիքի պաշտպանի վերականգնողական կենտրոնի տնօրեն Հայկուհի Մինասյանին և Բժշկական համալսարանի ռեկտոր Արմեն Մուրադյանին:

Առողջապահության նախարար Անահիտ Ավանեսյանն էլ նշեց՝ այս առիթը ևս մի խորհուրդ ունի. ի հեճուկս այն տառապանքի, ցավի և կորուստի՝ հայ ազգը ունակ է շարժվել առաջ և վերականգնվել: «Թող այս խաղաղ պահը մեզ հիշեցնի, որ մենք պարտք ունենք յուրաքանչյուրս մեր ոլորտում: Ես վստահ եմ՝ ամեն մի զինվոր, որ այստեղով անցնի, պետք է զգա այն սերը և ջերմությունը, որը մեր սրտերում է: Կենտրոնը ստեղծվել է մեր վախերը ամոքելու հիմքի վրա և նաև լինելու է տարածաշրջանում մեզ հպարտություն պարգևող կենտրոններից մեկը»,- հավելեց նախարարը:

Մերի Խաչատրյան