Թուրքիայի տարածքում ջրամբարներ են կառուցում, ջուրն այլևս չի հասնում Ախուրյանի ջրամբար. խնդիր կա նաև Կառնուտի ջրամբարում

Ախուրյանի ջրամբարում քիչ ջուր է ամբարվել: Նախորդ տարվա համեմատ ջրամբարը մոտ 100 մլն խմ մետր պակաս լցվածություն ունի:

Պատճառը մեկն է. Թուրքիայի տարածքից ջուր չի գալիս: «Հայկական ժամանակի» հետ զրույցում այս մասին ասաց Շիրակի մարզպետարանի գյուղատնտեսության բաժնի պետ Անդրանիկ Նալբանդյանը:

«Թուրքիայի կողմից ջուր չի գալիս, ջրամբարներ են կառուցում: Իրենք իրենց ջուրը կօգտագործեն, էլ չի գա մեզ: Մեր գետի ջուրը լրիվ լցվում է Ախուրյանի ջրամբար, էնտեղից էլ հավասար օգտագործվում է»,-ասաց Նալբանդյանը:

Այս ջրամբարից Շիրակի մարզը ոռոգման ջուր չի օգտագործում: Ախուրյանի ջրամբարը հիմնականում Արարատյան դաշտավայրն է սնում: Ջրամբարները, որոնք ապահովում են Շիրակի մարզի ոռոգումն, այս տարի բավարար չափով ջուր են կուտակել: Նախորդ սակավաջուր տարվա համեմատությամբ հիմա մի բան էլ ավելի է ամբարվել: Խնդիրներ կան, սակայն մարզի ոռոգման ծանրությունն իր վրա վերցնող Կառնուտի ջրամբարում:

Գրեթե ամեն տարի Կառնուտի ջրամբարի հետ կապված մտավախոթյուն է առաջանում: Շիրակի մարզպետարանի գյուղբաժնի պետ Անդրանիկ Նալբանդյանը մանրամասնում է, պատճառը դեռ ԽՍՀՄ տարիներից եկող նախկին Լենգեսի ՀԷԿ-ի հետ կնքված պայմանագիրն է: ՀԷԿ-ն այսօր կոչվում է Կապսի, գործում է նույն պայմաններով, ինչը տասնամյակներ առաջ է ամրագրվել: Պայմանագիրը, սակայն, ըստ Նալբանդյանի, բացթողումներ ունի:

«Պայմանագրի մեջ օր ու ժամկետ չկա գրված: Ընդամենը գրված է ոռոգման ժամանակահատված: Այսինքն՝ ոռոգման սեզոնին նոր պետք է ջուր տա ՀԷԿ-ը:  Իսկ էդ ՀԷԿ-ի տերը լավ խորամանկ է էլի, երբ հարմար է իրեն, ասում է դեռ ժամանակը չէ: ՀԷԿ-ի հետ խնդիր կա, բոլորն էլ տեղյակ են:

Էդ պայմանագիրը սովետից է եկել, ուղղակի ղեկավար կա ոռոգման սեզոնը հենց գարունը կհասկնա, ղեկավար կա, երբ կարտոֆիլի ջուր ուզին, էդ ժամանակ կհասկնա: Էդ է խնդիրը:

Շիրակի մայր ջրանցքի սկզբնամասում ջուրը բաժանվում է: ՀԷԿ-ին մի հատ կանալ կար ու մնացախը Շիրկանալ է լցվում: Իսկ հիմա Շիրկանալը լրիվ փակ և ՀԷԿ-ին կերտա ջուրը մինչև ոռոգման սեզոնի սկսվելը»,-մանրամասնում է պատասխանատուն:

ՀԷԿ-ի պատասխանատուն մեզ հետ զրույցում շեշտեց, որ իրենք որևէ խախտում չեն անում, ինչ սահմանված է ունեցած պայմանագրով, կատարում են:

«ՀԷԿ-ն օրենքով աշխատում է, ամեն մի կայան ունի իր ջրային ռեսուրսը: Լիցենզավորված է, ոչ մի խախտում չկա: Ես չգիտեմ ինչի եք զբաղվում դուք էդ հարցերով, ոչ մի թեմա չկա դրա հետ կապված»,-ասաց ՀԷԿ-ի պատասխանատուն՝ տիկին Նառան:

Հիմա դեռ Շիրակում ոռոգման սեզոնը չէ, սակայն պատասխանատուները չանհանգստանալ չեն կարող: Կառնուտի ջրամբարից են սնվում Ախուրյանի հարթավայրը, Ազատան, Արևիկ, Բայանդուր, Երազգավորս, Այգաբաց համայնքները, պոմպակայանով Մեղրաշենն է ջուր ստանում: Մարզի բերրի հողերի ընդհանուր ցանքը ոռոգվում է Կառնուտի ջրամբարից:

«Կոմիտեից ասում են՝ խնդիր չկա, երբ պետք եղավ, ջուրը կդարձնենք, բայց մենք մտավախություն ունինք, որ կարող է չկուտակվի շատ ջուր ու խնդիր ունենանք: Կարող է եղանակը միանգամից տաքանա ու մայիսի 10-ից էլ ոռոգման ջուր պետք գա»,-ասում է մարզպետարանի պատասխանատուն:

Մյուս ջրամբարներում խնդիրներ չկան, անգամ Արփին է իրեն արդարացրել: Տեղումները շատ են եղել, նախորդ տարվա բաց թողնված ջրի քանակը գրեթե լրացվել է: Բայց մարզի բոլոր ջրամբարները մեկ ընդհանուր խնդիր ունեն: Տասնամյակներ շարունակ Սառնաղբյուրի, Վարդաքարի, Կառնուտի ջրամբարների պատվարների ամրացում չի եղել,  վերանորոգման աշխատանքներ չեն իրականացվել: Սրանով էլ բացատրվում է առկա ջրի կորուստները: