Շրջվեք, ինքներդ տեսեք արդյունքը. երեւանցիները քաղաքապետի ու նրա հնարավոր պաշտոնանկության մասին

Արդեն մի քանի օր է՝ ակտիվ քննարկումների թեմա է դարձել Երեւանի քաղաքապետ Հայկ Մարությանի՝ գործադիր իշխանության հետ հարաբերությունները:

Գործադիրի եւ քաղաքային իշխանության որոշ ներկայացուցիչներ արդեն հասցրել են լրատվամիջոցներով հանրայնացնել քաղաքապետի մասին իրենց դիրքորոշումը, շեշտել, որ սխալ են համարում Մարությանի՝ իր թիմին նախընտրական շրջանում չաջակցելը: Եվ չնայած Երեւանի ավագանու հերթական ընտրությունները նախատեսված են 2023 թվականին՝ սկսել են լուրեր շրջանառվել, թե քննարկվում է Երեւանի ավագանին ժամկետից շուտ ցրելու հնարավոր տարբերակը:

Երեւանցիների շրջանում երեկ հարցախույզ անցկացրինք՝ հետաքրքրվելով, թե եթե ավագանին լուծարելու եւ քաղաքապետի փոփոխության գործընթաց սկսվի, իրենք դա ճի՞շտ, թե՞ սխալ կհամարեն: Նաեւ հետաքրքրվեցինք, թե ինչպե՞ս են գնահատում քաղաքապետ Հայկ Մարությանի գործունեությունը պաշտոնավարման 2,5 տարիների ընթացքում:

Մեր հարցվածների գերակշռող մասի կարծիքով՝ Երեւանի քաղաքապետ Հայկ Մարությանը կատարել է քաղաքացիներին տված իր խոստումները, իհարկե, դրանց մի մասը դեռ իրագործման փուլում են, ուստի, նրանց խոսքով, քաղաքապետը պիտի մնա եւ շարունակի սկսածը: Նրանք, ովքեր արդյունավետ են համարում քաղաքապետի պաշտոնավարման տարիները, առաջնայինը նշում են Երեւանի մաքրությունը, բակերի բարեկարգումը, տրանսպորտի նոր ու հարմարավետ շարժակազմը, ինչու չէ՝ նաեւ կենդանիների պաշտպանությունը՝ շների ստերջացում եւ այլն:

Շատերի մոտ դեռ թարմ են քաղաքապետարանի՝ քաղաքի աղբահանությամբ զբաղվող «Սանիթեք» ընկերության հետ ունեցած պայքարը: Ըստ մեր զրուցակիցների՝ թեկուզ այդ պրոցեսների ժամանակ քաղաքն անմաքուր էր, բայց քաղաքապետը կարողացավ աղբահանության խնդրին համակարգային լուծում տալ:

Մարդիկ գոհունակություն են հայտնում նաեւ նոր ավտոբուսներից՝ նկատելով՝ չնայած դեռ բավարար չափով համալրված շարժակազմ չունենք, բայց հույս ունենք՝ քաղաքապետը կլինի իր խոստման տերն ու այս դեպքում էլ համակարգային լուծում կտա:

Մեր հարցվածներից որոշ մարդկանց համար էլ Հայկ Մարությանը քաղաքապետի ցանկալի կերպար է, քանի որ խելացի է, ինտելեկտուալ եւ զուսպ: «Միայն բարձր ինտելեկտ ունեցող մարդը կարող էր տալ այն հումորային պրոդուկտը, որը ժամանակին տեսել ենք մենք»,-շեշտեց հարցվածներից մեկը:

Եթե Հայկ Մարությանի կուսակցական թիմի անդամներին դուր չի եկել, որոշներին էլ զայրացրել է նրա չեզոքությունը, ապա քաղաքացիների մոտ Մարությանի այս քայլը լրիվ հակառակ արդյունքն է տվել: Համենայնդեպս մեր հարցվածները այդպես էին վստահեցնում: «Ինձ դուր է գալիս, որ Մարությանը քաղաքական ուժերից զերծ է պահում իրեն, չի թաթախվում իրենց խաղերի մեջ, գլուխը կախ իր գործն է անում»,- սա մեր լսած բավականին շատ նմանօրինակ դիտարկումներից մեկն է:

Մարությանի մասին իրենց կարծիքը արտահայտող մեր քաղաքացիները նաեւ քաջատեղյակ են վերջինիս հետ կապված վերջին զարգացումներին: Հարցվածներից մեկն էլ նկատեց. «Եթե որպես քաղաքապետ ոչինչ չաներ եւ բռներ մյուսների պոչը, բնականաբար, ես էլ կդատապարտեի, բայց այդ մարդն իր գործի մեջ է, փորձում է քաղաքի համար ինչ-որ լավ բան անել, միայն այն, որ իշխող ուժի հետ որոշակի անհաշտություններ ունի (դա էլ դեռ հարց է, թե իրականում ինչ է կատարվում), բնականաբար, պատճառ չէ ժամկետից շուտ անվստահություն հայտնելը»:

Սիրիայից Հայաստան տեղափոխված 60-ամյա մի տղամարդ, որն արդեն 9 տարի է՝ Երեւանում է ապրում, կարծիք հայտնեց, որ չի ցանկանա քաղաքապետը գնա: Ըստ մեր զրուցակցի՝ Երեւանը վերջին տարիներին անհամեմատ ավելի մաքուր ու հյուրընկալ է դարձել:

Որոշներն էլ, խուսափելով երկար-բարակ խոսել, քաղաքապետի աշխատանքի մասին իրենց վերաբերմունքն ու կարծիքը արտահայտեցին մեկ դրական բառով, երբեմն էլ միայն ժպտալով, բութ մատը ցույց տալով: Քաղաքացիներից մեկն էլ, ի պատասխան մեր հարցի, թե արդյունավետ համարո՞ւմ է Երեւանի քաղաքապետի աշխատանքը, ասաց. «Պտտվեք, ինքներդ տեսեք արդյունքը»: Շրջվեցինք, եւ այդ պահին անցնում էր նոր միկրոավտոբուսներից մեկը:

Քաղաքապետի աշխատանքից գոհ մեկ այլ քաղաքացի էլ, լսելով անվստահություն հայտնելու եւ ժամանակից շուտ Մարությանին հեռացնելու մասին տարածված լուրերը, ասաց. «Ինչի՞, իրենց ձայն չի տվել, դրա՞ համար են դժգոհ: Կոմիտասում ենք ապրում, նախկինում մեր թաղամասը զիբիլի մեջ կորած էր, իսկ հիմա մինչեւ գիշերվա հազարը աղբաման են մաքրում: Մենք շատ գոհ ենք»:

Մեկ այլ հարցվածի կարծիքով էլ՝ ղեկավարներ փոխելով՝ քաղաքի խնդիրները չեն լուծվելու, այլ ընդհակառակը՝ օբյեկտիվ պատճառներով դրանց լուծումը հետաձգվելու է. «Մարությանը նոր- նոր հունի մեջ է ընկել, ինչ էլ չգիտեր սովորում է, ծանոթանում, հիմա մինչեւ հաջորդը գա, հարմարվի, էլի ժամանակ ենք կորցնելու, քաղաքն է տուժելու»:

Մեկ ուրիշն էլ ասաց՝ ճիշտ կլինի Մարությանին հանգիստ թողնել որ իր գործն անի: «Քանի որ մենք չգիտենք, թե հաջորդն ով կգա, ինչպես կաշխատի, հաստատ չենք ուզի, որ հիմա Մարությանը գնա: Եվ հետո, եթե մարդն աշխատում է ու վատ չի աշխատում, խնդիրն ո՞րն է: Ես կարծում եմ, որ նա պիտի մնա ու սահմանված ժամկետում գոնե կարողանա ավարտին հասցնել այն, ինչը որոշել է անել: Թույլ տանք, որ այդ մարդն իր ծրագրերն ավարտին հասցնի: Ավելի լուրջ հարցեր ունենք հիմա, անվտանգության հարցով թող առաջնայինը զբաղվեն: Իսկ քաղաքապետի կազմակերպչական ձիրքը տեղն է, լավ էլ անում է իր գործը, գուցե տեղ-տեղ մի բան մի քիչ մեր ուզած ժամկետում չի լինում, բայց անում է»,- ասաց նա:

Իհարկե, բազմաթիվ դրական կարծիքների ու չեզոք դիրքորոշումների կողքին կան նաեւ մարդիկ, ովքեր միանշանակ դեմ են Հայկ Մարությանի քաղաքապետի պաշտոնում մնալուն: Որոշները նկատեցին՝ ինչպես 2018 թվականին էին այն համոզմանը, որ քաղաքապետարանը Հայկ Մարությանի տեղը չէ, այնպես էլ հիմա: Այս 2.5 տարում նրանց կարծիքն ավելի է ամրապնդվել:

Հարցվածներից մի տարեց տղամարդ էլ կարծիք հայտնեց, որը Երեւանն իրեն արժանի քաղաքապետ ունեցել է 1970-ականներին, հետո չի ունեցել: Միակ արժանի քաղաքապետը, ըստ նրա, Գրիգոր Հասրաթյանն է եղել (1962-1975թ.թ): «Նա քաղաքի մասին մտածող, լուրջ մարդ էր: Հայկի տեղը կինոյում է: Նա գլուխ չհանեց»: Դժգոհելով գերծանրաբեռնված երթեւեկությունից ու տրանսպորտի վատ աշխատանքից՝ քաղաքացին ասաց. «Գերմանիայում ոնց է. վայրկյանների ճշտապահությամբ գալիս են ավտոբուսները: Ես գիտեմ՝ մեզ համար դա երազանք է, կարող է գալիք սերունդը տեսնի, բայց մենք հաստատ չենք տեսնի»:

Քաղաքական անցուդարձով բավականին հետաքրքրված մեկ այլ քաղաքացու համոզմամբ էլ՝ քաղաքապետի գալուց հետո էական դրական փոփոխություններ չեն եղել Երեւանում. «Համենայնդեպս նախկինների ու ներկայիս քաղաքապետի գործունեության մեջ տարբերություն չենք տեսնում: Պրոյեկտում չկա էլ մեկը, որի հետ հույսեր կապես կամ մտածես, որ եթե այս մեկը վաղը լինի քաղաքապետ, էական փոփոխություն կլինի: Կարծում եմ՝ այս երկրում որեւէ գլոբալ դրական փոփոխություն չի էլ լինի: Մարդկանց հույսերն էլ չարդարացան, ու այս մարդիկ իրենց սպառեցին, եւ հույսերը, թե մի օր կգան մարդիկ, ովքեր ամեն ինչ դեպի լավը կփոխեն, չիրականացան: Պողոսն էլ եկավ՝ ոչինչ չփոխվեց, Պետրոսն էլ եկավ՝ էլի ոչինչ չփոխվեց: Այս ամենը երեւաց նաեւ մեր ընտրությունների արդյունքներով, մարդիկ գնացին, չարյաց փոքրագույնին ընտրեցին՝ իմանալով, որ ո՛չ սա է մի բան, ո՛չ էլ էն նախկինը»:

Հարցվածներից երկու կին էլ ասացին, որ մեզ հանդիպելուց ընդամենը րոպեներ առաջ քննարկում էին Մարությանին: Պարզվեց՝ քաղաքապետին անձամբ են ճանաչում: Նշեցին՝ իրենց շատ հարազատ մարդ է, բայց հետը լեզու չեն գտնում: «Շինթույլտվությունների հետ կապված անիմաստ խնդիրներ է ստեղծել, բարդացրել է ամեն ինչ: Լավ տղա է, սկզբունքային, բայց մի քիչ էլ տարօրինակություններ ունի: Ես հավատում եմ, որ ինքը անկաշառ է, բայց.... Կողմ ենք, որ գա այնպիսի քաղաքապետ, որը բիզնեսին չի վնասի: Կարծում եմ՝ քաղաքապետարանն այնքան էլ իր տեղը չէ»,- ասաց նրանցից մեկը: Տիկինը չցանկացավ ասել, թե ինչ շինթույլտվության մասին է խոսքը:

Հարցվածներից մի կին էլ, որը երկու մանկահասակ երեխաների մայր է, նշեց, որ կորոնավիրուսից հետո Հայկ Մարությանի՝ մանկապարտեզները չբացելու անհասկանալի որոշման պատճառով զրկվել է աշխատանքից. «Կարանտինի ժամանակ բոլոր ժամանցի վայրերը բացվեցին, սրճարանները, ռեստորանները, ամեն ինչ աշխատում էր, իսկ ինքը մանկապարտեզները փակել էր ու կտրուկ դեմ էր վերաբացմանը: 4 տարեկան տղաս 2 ամիս առաջ նոր ընդունվեց մանկապարտեզ: Աշխատում էի, ու ինձ շատ էր պետք, որ նա երկու տարեկանից գնար: Հիմա ինձ համար շատ բարդ է աշխատանք գտնելը»: