Կամերային թատրոնի 60 հոգանոց աշխատակիցներից դեռ մեկի անելիքն է հստակ. մնացածի մասին հոգում են

Երեւանի պետական կամերային երաժշտական թատրոնի անձնակազմը թատրոնի շենքում այլևս ներկայացումներ չի խաղա:

ՀՀ կառավարության 2021 թվականի սեպտեմբերի 8-ի որոշմամբ՝ թատրոնի շենքը հատկացվեց Պետական սիմֆոնիկ նվագախմբին, նույն որոշման հիման վրա էլ Կամերային երաժշտական թատրոնը միացման ձեւով վերակազմակերպվելու է Հակոբ Պարոնյանի անվան երաժշտական կոմեդիայի պետական թատրոնի հետ:

Մեր տեղեկություններով՝ Կամերայինի տեխնիկական կազմից մի քանի աշխատողներ մնալու են իրենց շենքում, որպեսզի հետագայում Սիմֆոնիկ նվագախմբի հետ այդտեղ աշխատեն: Թատրոնի դերասաններին էլ ասվել է՝ եթե ցանկություն ունեն Պարոնյան թատրոնից բացի այլ թատրոններ գնալ եւ առաջարկներ են ստացել, հանգիստ կարող են տեղափոխվել:

Սեպտեմբերի 8-ից լուծարման գործընթացը սկսված է, եռամսյա ժամկետում, այսինքն՝ մինչեւ դեկտեմբերի 8-ը: Ըստ աշխատանքային ստաժի՝ աշխատողների հետ հերթով խզվելու են պայմանագրերը:

Չնայած ամիսներ տեւած պայքարին՝ ժողովներին, ցույցերին ու հայտարարություններին, թատրոնի անձնակազմը, ի վերջո, ստիպված եղավ համակերպվել Կառավարության որոշման հետ եւ հրաժարվել շենքից: Օրեր առաջ Կամերայինի ֆեյսբուքյան էջով հայտարարություն տարածեցին, որ թատրոնի շենքում այլեւս ներկայացումներ չեն խաղալու:

60 հոգանոց անձնակազմից այս պահին հստակ է միայն դերասաններից մեկի որոշումը. խոսքը Արա Դեխտրիկյանի մասին է: Նա գնալու է Պարոնյան թատրոն: Դեխտրիկյանը նախկինում էլ է Պարոնյան թատրոնում աշխատել:

Կամերայինի անձնակազմին աշխատանքի վերցնելու պատրաստակամություն են հայտնել նաեւ Երեւանի պետական տիկնիկային եւ Սոս Սարգսյանի անվան համազգային թատրոնները:

Տիկնիկային թատրոնի գեղարվեստական ղեկավար Ռուբեն Բաբայանը «Հայկական ժամանակ»-ին տեղեկացրեց, որ իրենք 5 հոգու համար կարող են աշխատանք ապահովել: Առաջարկն արդեն արվել է, քննարկման փուլում է: «4 դերասան եւ 1 բեմի մեքենավար. մենք պատրաստ ենք այդքան մարդու ընդունել, բայց ցուցակը Կարո Շահբազյանի մոտ է, պետք է դերասաններին առաջարկի, ընտրություն կատարենք»,- ասաց Բաբայանը:

Համազգային թատրոնից էլ հետաքրքրվեցինք՝ քանի՞ հոգու են աշխատանք առաջարկել իրենք: Թատրոնի տնօրեն Արման Նավասարդյանը հայտնեց, որ դեռ ոչ մեկին ոչինչ չի առաջարկվել: «Առայժմ հաստիքներ եմ ուզել, դեռ խնդրանքս չի հաստատվել»,- ասաց Նավասարդյանը՝ հայտնելով, որ ԿԳՄՍ նախարարությունից 30 հաստիք է ուզել, որից, սակայն, միայն 3-ն են դերասանի հաստիք, հիմնական մասը տեխնիկական են:

Պետական կամերային երաժշտական թատրոնի տնօրենի պաշտոնակատար Արամ Թորոսյանն էլ հայտնեց, որ գործընթացը նոր է սկսվել, պաշտոնապես որեւէ տեղեկություն չի կարող տրամադրել՝ քանի աշխատակից ուր է գնալու: Ըստ Թորոսյանի՝ շենքը շուտով պիտի հանձնվի Պետգույքի կառավարման կոմիտեին: Հարցին՝ ի՞նքն ինչ է նախատեսել անել, ասաց, որ դեռ որեւէ առաջարկ չի ստացել: Առաջարկ կունենա՝ կմտածի:

Հակոբ Պարոնյանի անվան թատրոնի տնօրեն Կարո Շահբազյանն էլ մեզ հետ զրույցում ասաց, որ պատրաստվում է այդ խնդրի առնչությամբ գնալ ԿԳՄՍ նախարարություն:

«Մենք այնպես ենք անում, որ այն մասնագետները, որոնց արդեն մեր թատրոնն ունի, աշխատանքի անցնեն այլ թատրոններում: Հնարավորինս փորձում ենք մտածել ամեն մի անձի մասին: Ոչ ոք առանց աշխատանքի չի մնալու»,- վստահեցրեց Շահբազյանը: Հարցին՝ Պարոնյան թատրոնը քանի՞ հոգի կարող է վերցնել, Շահբազյանը ստույգ պատասխան չտվեց՝ նկատելով՝ այս պահին հնարավոր չէ ասել, քանի որ եթե որեւէ թիվ նշի, գուցե հետագայում դա փոփոխվի եւ թյուր տպավորություն ստեղծվի:

Ինչ վերաբերում է Հայաստանի պետական սիմֆոնիկ նվագախմբին, ապա ավելի վաղ կարծիքներ էին շրջանառվում, թե Կամերայինի շենքը, որը Կառավարությունը հատկացրել է իրենց, այնքան էլ հարմար չէ՝ փոքր է եւ այլն: Հայաստանի պետական սիմֆոնիկ նվագախմբից խնդրեցինք մեկնաբանել այս խոսակցությունները: Մեզ հայտնեցին, որ ավելի քան 15 տարի աշխատել են՝ փորձերի համար առանց համապատասխան տեղ ունենալու, իսկ ՀՀ կառավարության առաջարկած տարբերակը գոնե ապահովում է նվագախմբին շենքային տարածքով։

«Այս պահին նշված տարածքում կարող են անցկացվել միայն նվագախմբի փոքր կազմով (անսամբլների) փորձերը։ Որպեսզի նվագախումբը կարողանա իր փորձերը լիարժեք կատարել, պետք է իրականացվեն լայնածավալ շինարարական աշխատանքներ։ Այդ աշխատանքների հստակ ծավալները պարզ կլինեն միայն այն ժամանակ, երբ շենքը վերջնական հանձնվի Հայաստանի պետական սիմֆոնիկ նվագախմբին, եւ ճարտարապետների, շինարարների, փորձագետների հետ միասին կատարվեն համապատասխան վերլուծություններ»,- մանրամասնեցին Սիմֆոնիկ նվագախմբից: