Ի վերջո, ինչ էին ուզում ՀՀԿ-ականները՝ հողերը տրվե՞ն, թե՞ չտրվեն, կատարվե՞ն պայմանավորվածությունները, թե՞ չկատարվեն

ՀՀ վարչապետի աշխատակազմի ղեկավարի տեղակալ Տարոն Չախոյանն անդրադարձել է օրերս Սերժ Սարգսյանի տված հարցազրույցի այն հատվածին, որտեղ նա ասում է, որ Ապրիլյան պատերազմի դադարեցման համար որևէ բանավոր պայմանավորվածություն չի եղել, այնուհետև նույն հարցազրույցում Սարգսյանը նշում է, որ պատերազմի դադարեցման մասին ձեռք է բերվել բանավոր պայմանավորվածություն:

«Սերժը՝ մի քանի րոպե տարբերությամբ։

Սեփական ստերի մեջ մոլորվածի պես ընդամենը մի քանի րոպե տարբերությամբ անում է իրար ֆունդամենտալ հակասող հայտարարություններ։ Մեկ ասում է՝ բանավոր պայմանավորվածություններ չեն եղել, իսկ ընդամենը մի քանի րոպե անց հայտնում, որ բանավոր պայմանավորվածությունների հիման վրա դադարեցվել է Ապրիլյան պատերազմը։

Սա ոչ առաջին ու ոչ էլ վերջին դեպքն է, երբ Սերժը հակասում է ինքն իրեն, իսկ Սերժի վերջին՝ մոտ 1,5 ժամ տևողությամբ հարցազրույցի ողջ պատկերը ներկայացված է մի քանի վայրկյան տևողությամբ այս տեսանյութում»,- գրել է Չախոյանը՝ գրառմանը կից հրապարակելով Սերժ Սարգսյանի հարցազրույցի այդ հատվածները:

Չախոյանի հրապարակած տեսանյութն ու կից գրառումը «Ֆեյսբուք» սոցիալական ցանցի իր էջում կիսվել է Հանրային խորհրդի նախագահ Ստյոպա Սաֆարյանը և մի շարք հարցադրումներ հնչեցրել.

«Արդյոք Սերժ Սարգսյանը հաստատո՞ւմ է Անվտանգության խորհրդի քարտուղար Արմեն Գրիգորյանի սկանդալային հայտարարությունը, որ քառօրյա պատերազմը կանգնեցվել է ինչ-որ խոստումների դիմաց։ Այդ դեպքում ինչո՞ւմ է կայացել Իլհամ Ալիևի, Վլադիմիր Պուտինի հետ նրա պայմանավորվածությունը:

Արդյոք 44-օրյա պատերազմի առաջին օրերին Սերգեյ Լավրովն այդ պայմանավորվածությո՞ւնն էր ակնարկում, երբ ասում էր, թե՝ «հայկական կողմը գիտեր, որ վաղ թե շուտ այդ շրջանները Ադրբեջանին պետք է վերադարձնի»: Եթե դա էր Նիկոլ Փաշինյանին թողած Սերժ Սարգսյանի «բանակցային ժառանգությունն ու կետը», այդ դեպքում երբ ՀՀԿ-ն մեծից փոքր մի կողմից Նիկոլ Փաշինյանին մեղադրում էր «հողերը տալու մեջ», կարծեք թե Սերժ Սարգսյանի «բանավոր պայմանավորվածությունները» կատարելու մեջ, մյուս կողմից պահանջում էր բանակցությունները շարունակել իրենց թողած կետից, ուզում էր, որ հողերը տրվե՞ն, թե՞ չտրվեն, Փաշինյանը կատարի՞, թե՞ չկատարի Սերժ Սարգսյանի պայմանավորվածությունները: Ի վերջո, ի՞նչ էին ուզում:

Երբ Սերժ Սարգսյանը պատերազմից անմիջապես հետո հայտարարում էր, որ եթե չլիներ հեղափոխությունը, ինքը Լավրովի պլանով կլուծեր Արցախի հարցը, իսկ այ Փաշինյանը դեմ է եղել Լավրովի պլանին, ակնարկո՞ւմ էր, որ Փաշինյանը սեպ է խրել հողահանձնման եռակողմ բանավոր պայմանավորվածության մեջ: Օգոստոսին ու սեպտեմբերին՝ պատերազմից առաջ, ումի՞ց էր տրտնջում Ալիևը, թե՝ իրեն խոստացել ու խաբել են, և շրջանների «դեօկուպացիա» տեղի չի ունենում։ Տրտնջում էր Սերժ Սարգսյանի՞ց, թե՞ Նիկոլ Փաշինյանից:

Եթե Արցախյան 44-օրյա պատերազմի ողբերգության ու աղետի տակ այսքան կեղտ ու անպատասխան մութ հարցեր կան, ի՞նչ հեքիաթ էր պատմում Սերժ Սարգսյանի ցկյանս տանդեմ Ռոբերտ Քոչարյանը, երբ ասում էր, թե Հայաստանն ու նրա իշխանությունները տավուշյան էսկալացիայով ու ստեփանակերտյան՝ «Արցախը Հայաստան է և վերջ» հայտարարությամբ սադրեցին պատերազմը, և որ եթե ինքը լիներ իշխանություն, հույս կտար Ալիևին...: Ինչո՞ւ պետք է այս ամբողջ նորմի համար դաժան գին վճարեին մի ողջ ազգ ու սերունդ:

Ի՞նչ պայմանավորվածությունների մասին է խոսքը:

Ռոբերտ Քոչարյանը բացատրություն չունի՞ բոլորին իր թողած դժգույն ու գաղջ բանակցային ժառանգության մասին կամ թող հայտարարի, որ ինքը շատ լավ ժառանգություն է թողել, բայց Սերժ Սարգսյանը «վարի է տվել», կամ բացատրություն տա իր թողած ժառանգության մասով...»: