Ուսանողը կարող է հիմնել սեփական տուրիստական ընկերությունը. «Զբոսաշրջային թարգմանություն» կրթական ծրագիր՝ ԵՊՀ-ում

Երևանի պետական համալսարանը, ընթանալով բարեփոխումների ճանապարհով, որակյալ մասնագետներ կրթելու նպատակով նորանոր ակադեմիական ծրագրեր է ձեռնարկում՝ դրանով նաև լայն հնարավորություններ ստեղծելով ներկա և ապագա ուսանողների համար:

Դրանցից է, օրինակ, «Զբոսաշրջային թարգմանություն (անգլերեն-հայերեն)» մագիստրոսական ծրագիրը: Այն ուսանողներին հնարավորություն կտա ձեռք բերել ոչ միայն նոր գիտելիք՝ կապված տուրիստական ոլորտի հետ, հարստացնել լեզվական հմտությունները, նաև՝ հետագայում ստեղծել սեփական տուրիստական ընկերությունը:

ԵՊՀ թարգմանության տեսության և պրակտիկայի ամբիոնի վարիչ, բ.գ.թ դոցենտ Ռուզան Ղազարյանը «Հայկական ժամանակի» հետ զրույցում շեշտում է՝ այս ծրագիրը նաև կօգնի, որ ուսանողը ստանա տվյալ ոլորտի թարգմանչի որակավորում: Այն մեր երկիրը զբոսաշրջիկներին ներկայացնելու և ճանաչելի դարձնելու քայլերից մեկն է:

«Թարգմանիչ հասկացությունը ընդհանրական միտք է: Սա է պատճառը, որ որոշեցինք ստեղծել կոնկրետ մասնագիտացում պարունակող, ոլորտային որակավորում տվող մագիստրոսական ծրագիր: Ի դեպ, սա առաջինը չէ, մինչ այս՝ արդեն ունեինք «Թարգմանչական գործ» և «Վարչագործարարական թարգմանություն» ծրագրերը, որոնք նույնպես ոլորտային են: «Զբոսաշրջային թարգմանություն» մագիստրոսական կրթական ծրագիրը միջֆակուլտետային ծրագիր է: Համագործակցում ենք ԵՊՀ աստվածաբանության, տնտեսագիտության և կառավարման, իրավագիտության ֆակուլտետների հետ»,- ասում է Ղազարյանը:

Նրա խոսքով՝ զբոսաշրջային թարգմանչի համար կարևոր է, որ իմանա, թե ինչ իրավունքներ ունի օտարերկրյա զբոսաշրջիկն այն երկրում, որտեղ այցելել է:

«Այսինքն՝ ՀՀ քաղաքացին այլ իրավունքներ ունի, զբոսաշրջիկը՝ այլ: Մասնագետը պետք է ունենա հենքային գիտելիք՝ այդ ոլորտում աշխատելու համար: Ծրագիրը ընթանում է երեք կիսամյակով, դասերը լինելու են շաբաթը երեք օր: Ուսանողը կարող է սովորելուն զուգահեռ աշխատել, փորձառություն անցնել այն տուրիստական գործակալություններում, որոնց հետ մենք համագործակցում ենք»,- ընդգծում է զրուցակիցը:

Ըստ նրա՝ թարգմանությունը, որպես այդպիսին, կարևոր դերակատարում ունի ադմինիստրատիվ-վարչական ոլորտում: Այն ներառում է դատական, դատաիրավական, նոտարական, դատաբժշկական, տնտեսագիտական փաստաթղթային մասը: Ուսանողը ձեռք է բերում բանավոր, գրավոր հմտություններ և տիրապետում տվյալ ոլորտի մասնագիտական բառապաշարին:

Առաջին փուլով մեկնարկել է ծրագրի դիմում-հայտերի ընդունումը միայն ԵՊՀ ուսանողների համար: Հուլիսի 15-ից մինչև 30-ը և օգոստոսի վերջ ընկած ժամանակահատվածում ծրագրին նաև կարող են դիմել այլ բուհերի ուսանողները: Կարևոր պայման է, որ տվյալ ծրագրին դիմելու համար ուսանողը տիրապետի անհրաժեշտ լեզվական գիտելիքների:

«Մեր նպատակն է կրթել որակյալ մասնագետ, որը կհամապատասխանի Մայր բուհի դիպլոմին: ՀՀ-ում որևէ բուհ նման ծրագիր չունի, ԵՊՀ-ն առաջինն է: Մագիստրատուրա կարող է դիմել այն անձը, որը ունի բակալավրի աստիճան և տիրապետում է լեզուների. մեր դասախոսները պատրաստ են աջակցել յուրաքանչյուր ուսանողի»,- ասում է Ղազարյանը:

Ուսանողների հետաքրքրվածությունը ծրագրին արդեն նկատելի է, նկատում է նա: Վերջինս շեշտում է՝ կրթությունը ներկայացնում է նույն բիզնես գաղափարը. պետք է ներդնել մտավոր պրոֆեսիոնալ ունակություններ, գիտելիք, որպեսզի արդյունքը նկատելի լինի:

«ՀՀ զբոսաշրջությունը հատուկ ուշադրության ներքո գտնվող ոլորտ է, և դրա զարգացումն ու խթանումը կարևորագույն տեղ են զբաղեցնում ՀՀ մշակութային և տնտեսական զարգացման ռազմավարության մեջ։ Առաջարկվող մագիստրոսական ծրագրի շրջանակներում պատրաստված որակյալ թարգմանիչներն իրենց մասնագիտական կարողություններով ու հմտություններով էապես կխթանեն զբոսաշրջության հետագա զարգացումը Հայաստանի Հանրապետությունում, կշեղվեն տուրիստական գործակալությունների ստանդարտ երթուղիներից, այսինքն՝ հիմա ավելի արդիական են գյուղական համայնքներում կազմակերպվող զբոսաշրջային այցերը»,- նշում է ԵՊՀ թարգմանության և տեսության ու պրակտիկայի ամբիոնի վարիչ Ռուզան Ղազարյանը:

Մագիստրոսական ծրագրի դիպլոմը ընդունելի է նաև օտար երկրներում: Դեռևս, սակայն, այս ծրագրով այլ համալսարանների հետ համագործակցություն չկա, քանի որ ծրագիրը նոր է, բայց ծրագրի հետագա ընթացքը նաև նոր համագործակցությունների դռներ կարող է բացել:

Ռուզան Ղազարյանի խոսքով՝ մեր իրականության մեջ, հատկապես 21-րդ դարի նոր տեխնոլոգիաների դարաշրջանում, թարգմանական ոլորտն ամենամեծ պահանջարկն ունեցող և արդիական բնագավառներից է, առանց որի դժվար է պատկերացնել միջմշակութային և գործնական որևէ հաղորդակցություն: